ЧОНҒА ХОРҒЫС ПОЛБАЗЫН ӦРТТЕР
25.08.2021
Хабарлар
Комиссия чыылии. МЧС-тың Хакасияӌа Оӧн управлениезіңде сағыбаан саайлар, ӧрттер полдыртпас паза оларның салтарларын чох идерінҷе комиссияның (КЧС) чыылии ирткен
ӦӦРТТЕР СЫҒАРЫНА ТИМНЕНІС
Чыылығның тоғызын азып, Хакасия пазының орынҷызы - КЧС кнезінің пастағы орынҷызы Юрий Курлаев ӱзӱрілер сурығларны таныхтаан. Аның чооғынаң, хорғыстар ағылчатхан кӱскӱ-хысхаа тимненеріне прайзына алынҷа хайығ саларға кирек. Амды чахсы кӱннер турча, анзы ӧріңдірче, че аңда-мыңда ӧрттер сых ла парча. Пӱӱл республикада чахсы урожай полар, от маңат сыххан. Орттер сығарбас пӧгіннең, чоннаң тоғыс апарарға кирек.
Кӱскӱде, ӧрттер сығарынаң хорғыстығ туста, хайдағ кӱннер турардаңар искірген Хакасияның гидрометцентрінің пӧлии пастығының тоғызын толдырчатхан Ольга Нарутдинова. Аның чооғынаң, августтың ӱзінҷі чардығында республикада чахсы кӱннер турча, хай пірее орыннарда наңмыр чаар. Сентябрьда ідӧк тың сӧрӧн полбас, наңмырлар ол тустағы ортымах синнең кӧп чағбас.
Хакасияның ГО, ЧС паза ПБ управлениезі пастығы Николай Старков республикада ӧрттер сығарбас тоғыс хайди апарылчатханнаңар чоохтаан. Аның искіриинең, пӱӱл регионда 3356 ӧрт ӱзірілген, аңда 35 кізі ӱреең, 15 кізі палығлатхаң. Управлеңие тоғыңҷылары, аалларда иблеп чӧріп, 20 муң азыра кізіңең ӧрттер сығарбас правилоларҷа чоохтазығлар апарғаннар. Амды планда ӧрт ӱзірҷең наа депо пӱдірері, ңаа техңика алары. Наа техника килзе, тузаланылған техңика аалларзар ызылар. Ааллар ибіре ӧрт иртірбес полосалар тарт саларға, ӧрт ӱзірҷеңнерге суғ алҷаң орыннар тимнирге кирек. Ідӧк чыылчатхан сӧп-сапты тузында сығарарға, патруль ӧмелерін сыныхтағнаң чӧргізерге кирек полар.
Арығларда паза аал хонии чирлерінде ӧрт сығарбас оңдайлардаңар чоохтааннар Хакасияңың чир-чайааң ис-пайы паза экология министрінің тоғызын толдырчатхан Ольга Лушникова паза аал хонии паза ас-тамах министрі Сергей Труфанов. Муниципалитеттер пастары паза аймахтардағы КЧС устағҷылары постарының чирлерінде пу кӧстегҷе хайдағ тоғыс апарылчатханнаңар искіргеннер.
- Муииципальнай пӱдістердегі прай даа аалларда от, киндір пӧзік ӧс парғап Сыныхтағ, аалларҷа чӧріп, устағҷыларны хатығлап сыххалахха, ӧрт сығарбас тоғыстарны толдыр салыңар. Амды полған на аймах ӱчӱн ӧрт ӱзірҷеңнернің тоғынҷызы нандырығлығ полар, андағы киректерні сыныхтағда тудар, - теен Юрий Курлаев.
ЖКХ ОБЪЕКТТЕРІНДЕ
Хакасияның пӱдіріг паза ЖКХ министрі Валерий Келин чурт-коммунальнай хоных объекттері хысхаа хайди ирткеннеңер чоох апарғаң. Хайди ол искіргең, прай объекттерде 112 сайбағ ілезіне сығарылған. Сорығ городтың тимненізі сағыссыратча, Харатаста паза Хубачарда тоғыстар уйан толдырылчалар. Харатастағы тураларда трубалар иргілен парғаннар, олар сайбаларға айабастар. Республика хысхаа 78 %-ке тимде, Харатас - 73%, Сорығ - 64 %, Хубачар - 82 %. Хысхаа тимненерге бюджеттең 177 миллион салковай позыдылған, ол муниципалитеттер аразында ӱлестірілген. Котельнайларға тимненіс паспорттарын аларға кирек. Оларда 56 муң тонна хара тас пилетелген. Пірее саай полза, аны тыхтирға 125 кізіліг бригада тимде.
Энергетика объекттерінің хысхаа тимненізінеңер искірген Хакасияның энергетикаҷа паза тарифтерҷе хазна комитеді кнезінің тоғызын толдырчатхан Елена Лобань. Аның чооғынаң, прай объекттер сыныхтағда тудылчалар, саай полза, бригадалар тоғынарға тимделер.
ТАБЫҒЛАРНЫ ИПТІГ ИРТІРЕРГЕ
Республикада 19 сентябрьда иртер табығларға тимненіс хайди парчатханнаңар искірген Хакасияның Табығ комиссиязының кнезі Александр Чуманин. Аның чооғынаң, табығлар прай Россияда ӱс кӱн иртер, 17 сентябрьдаң 19 сентябрьға теере. Мыңдағ улуғ мероприятиені чахсы, иптіг иртірібізерге кирек. Хакасияда ӱннер пирҷең 382 орын тимнелче. Табығ участоктарында тоғыс хайди парчатханын видеокамералар сыныхтағда тударлар, оларның саны кӧп. Прай участоктарзар чарытхы тудығ чох пирілерін азынада кӧр саларға кирек, хайдағ-да алымнар ӱчӱн аны ӱзібіспезіннер. Аймах сайбағлар пол парарына чарытхы пирҷең хоза станциялар тимде резервте ползыннар. Оларны аар-пеер тарт чӧрер оңдай поларға кирек. Табығ участоктары орныхчатхан тураларның ээлері муниципальнай пӱдістер полчалар, олар ӧрт сығарбас мероприятие ӱчӱн нандырығлығ поларлар. Участоктар тоғызына чарытхы кӧп киректелер, аннаңар ӧрт сығарбас правилоларҷа тудынарына хайығ айландырарға кирек.
ПАСХА ДАА СУРЫҒЛАР
Хакасияның ГО, ЧС паза ПБ управлениезі пастығы Николай Старков республикада сағыбаан саайлар полдыртпазына паза оларның салтарларын чох идеріне ахчалығ паза кирек тиріглер резервін тӧстирдеңер сурығны чарытхан. Аның чооғынаң, полған на муниципальнай пӱдісте андағ резерв поларға кирек.
МЧС-тың Хакасияҷа Ӧӧн управлениезінің суғларда кізілерге хорғыс полдыртпас пӧлиинің ӧӧн специалист-эксперті Валерий Шишлянников «Хакасиядағы суғларда кізілерге хорғыс чох оңдайлар пирердеңер» сурығҷа чоох тутхан. Хайди ол таныхтаан, республикада пӱӱл 24 пляж азылған, оларда 12 арачылағ посты тоғынған. Суғларда 59 административнай сайбағ ілезіне сығарылған. Кічіг судноларнаң тузаланар правилоларны сайбаан ӱчӱн ікі кізі хатығлатхан.
Ӱгредіг заведениелері наа ӱгредіг чылына хайди тимненчеткеннеңер искірген Хакасияның ӱгредіг паза наука министерствозының пӧлік пастығы Александр Гуреев.
- Прай миңистерство-ведомстволар паза муңиципалитеттер, хада-пірге тудынып, кирек тоғыстар апарарына ізенчем. Постарыңны, чонны хайраллаңар, кізілерге хорғыс чох чуртир оңдайлар пирерге сыбыра тимде полыңар, - теен Юрий Курлаев.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде