АҒБАННЫҢ ТАРХЫНЫ - КНИГАЛАРДА
25.08.2021
Хабарлар
Ағбанға - 90 чыл. 21 августта хынчатхан городыбыс тӧреен кӱнін пайрамнирға тимненген, че чуғынӌах ағырығ тарапчатханнаңар чаратпиныбысханнар.
Аннаңар аны чардыхти таныхтап турғаннар. Ағаа чарыдылған кӧп мероприятие ирткен. Оларның пірсі город администрациязында полған аймах чыындылар паза книгалар ирткен тустаңар маңат чоллап пирчелер. Ол даа сылтағнаң, неке, Ағбан городтың администрациязында чапсых тоғазығ полған. Анда Ағбанның тархынынаңар пасхан кізілер араласханнар. Мында алынҷа авторлар даа, газета-журналларның хабарҷылары даа, библиотека тоғынҷылары даа полғаннар. Оларның хайзы даа Хакасия кінінің пайрамын турыстығ таныхтирға улуғ хозым иткен, кирек тоғыс апарылған.
Анзын позының чооғында таныхтаан паза чыылысхан кізілерге алғызын читірген Ағбан городтың пазы Алексей Лёмин. Ідӧк ол Ағбаннаң пір чылда тӧстелген хазна учреждениелерін адаан. Іди пӱӱл ноябрьда постарының 90 чылын таныхтирға тимненчелер А.М.Топановтың адынаң Хакас драма театры паза Л.Р.Кызласовтың адынаң чир-суғ ӱгренҷең музей. Олар постарының тоғыстарында хайди даа Ағбанның пайрамнығ 90 чылын таныхтапчалар, ағаа чарыдылған аймах-пасха мероприятиелер иртірчелер, городыбыстың тархынынаң, аның саблығ кізілерінең хынып таныстырчалар.
Алғыстас сӧстері соонда Ағбан город пазы тоғазыға чыылысхан улусха танығлығ сыйыхтар читіріп пастаан. Иң пастап ол А.М.Топановтың адынаң Хакас драма театрының директоры Владимир Чустеевті хығырған. Алексей Викторович Хакас драма театры аймах-пасха синде иртірілчеткен, ол санда чоннар аразындағы даа фестивальларда аралазып, Ағбанның адын сыбыра махтаға сығарчатханын таныхтаан паза мыннаң мындар даа чидіглерге чит турарға, наа ойыннарнаң кӧрігҷілерні ӧріндірерге алғаан. Хакас драма театрының чайаачы ӧмезі Ағбан иртірчеткен хайдағ даа танығлығ мероприятиелерде ӧткін араласчатханын таныхтап, прайзына улуғ алғызын читірген.
Аның соонда чон алнынзар сыххан Л.Р.Кызласовтың адынаң чир-суғ ӱгренҷең музейнің директоры Андрей Готлиб. Ағбан город пазы Алексей Лёмин музей тоғынҷылары республика кінінің танығлығ пайрамына хайдағ чапсых тоғазығлар, кӧзідіглер, пасха даа мероприятиелер иртірчеткеннеңер чылығ сӧстер чоохтанған, Андрей Иосифовичке ідӧк улуғ нимес сыйых читірген.
Анаң Ағбан городтаңар, аның тархынынаңар книгалар пасхан авторларны сыйыхтар аларға хығырған. Пастап чон алнынзар сыххан писатель, хабарҷы, краевед Алексей Анненко. Чайаачы ус позының хынызын, Ағбаңда чуртирға паза тоғынарға хайди тың истенчеткенін, город чуртағҷыларына паарсапчатханын чарыхха сығарған чыындызында маңат кӧзіт салған. Алексей Николаевичтің пастағы книгазы 2016 чылда сыххан. Сах андох табырах тарап парыбысхан. Хығырығҷылар ағаа кӧп тузалығ чӧптер, хоза танығлар пир турғаннар. Аннаңар автор 2019 чылда ол книганы, хоза тоғынып, хати сығарыбысхан. Ол даа чыынды табырах тарап парған. Ағбаннаңар чыындылар сығар турар сағызын чайаачы ус тастабинча, мындағ хайхастығ городтаңар, аның тархынынаңар ол нинҷе дее пазарға тимде. Килкім пӱдіріглер, саблығ кізілер алынҷа хайығ кирексіпчелер. Полған на кізідеңер книга пас саларға чарир тіпче ол.
Анаң сыйых аларға сыххан Ағбанның тархынынаңар 3 книга пас салған Лидия Белоусова. Город хайди пӱткеннеңер, аның орамаларынаңар, кемнің аттарынаң адалғаннаңар Лидия Ивановна кирек материалларңы чуртазы тооза чыып парир. Аннаңар город пазы ай-тыс пілбес хылыхтығ ипчіні чылығ сӧстернең алғыстаан, тӧртінҷі книганы тоос саларға алғаан. Лидия Ивановна, тізең, Алексей Викторовичсер улуғ нимес сурыныснаң айланған - тӧртінҷі книгазына иргі сомнар киректелче, оңдай табылза, позына полыс пирердеңер чоох пастаан. Ағаа хайдағ сидіксіністерге тоғазарға килісчеткеннеңер пірдең пірге чоохтазарға кирек теен.
- Лидия Ивановна, Сірер паалаҷаа чох тузалығ тоғыс итчезер. Аннаңар хайдағ даа полызығ пирерге тимдебіс, - сала даа ікінҷілес чох ізендір салған Ағбан городтың пазы.
Аның соонаң сыйыхтар хай пірее хабарҷыларға, библиотека тоғынҷыларына читірілген. Алексей Лёмин полғанына ла чылығ сӧстер таап турған, чон аразыңда халых-чарыдығлығ тоғыс апарчатхан улустың кӧңнін матап кӧдірген, таңдағы кӱнге наа пӧгіннер толдырарға кӧӧктірген.
Хайди тидірлер, Ағбаң городтың администрациязында тоғазығ пӧзік сиңде ирткен, турыстығ кізілер сыйыхтарнаң таныхталғаннар. Че мағаа анзы тосхымнығ пілдірбин парған. Ноға ба? Тоғазығ тузында пірдеезі Владислав Михайлович Торосовтың Ағбаннаңар пазылғаң чапсых книгаларынаңар таныхтабаан. Саңай ай-сым, пір сӧс тее чоохталбады. Сала даа ікінҷілес чоғыл, сыйыхтар алған кізілернің хайзы даа чайаачы тоғыс тузында «Ағбан» кңиганаң тузаланған полар.
Ағбан город администрациязы пайрамны таныхтирға аймах-пасха мероприятиелер тимнеп салған. Амды оларны толдырарға ла халды. Городтың аймах пулуңнарында чон чыылыс турар, Ағбанның 90 чылын таныхтир. Чабал ағырығ хорғыс ағылбинчатхан полза, хайди даа чалбах таныхталарҷых пу пайрам пістің хынчатхан городыбыста.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде