ПРАЙ ТОҒЫСТАР ТУЗЫНДА ТОЛДЫРЫЛЗЫН
27.08.2021
Хабарлар
Селекторӌа чыылығ. Хакасия пазы Валентин Коновалов республиканың чурт-коммунальнай хоных объекттері хысхаа хайди тимненчеткеннері сурығча правительство кізілерінең паза муниципалитеттер пастарынаң теестегі чыылығ иртірген
ЖКХ ОБЪЕКТТЕРІНІҢ ТИМНЕНІЗІ
Республиканың чурт-коммунальнай объекттері хысхаа тимненіс тоғыстарын хайди апарчатханнарын паза ілезіне сығарылған читпестер хайди тӱзеділчеткенін Хакасия правительствозында муниципальнай пӱдістер пастарынаң неделя сай ӱзӱрчелер. Амды сӧрӧн кӱннер пасталчатханда, ЖКХ объекттеріне, чурт фондына паза социальнай учреждениелерге чылығ пирер тусха чахсы тимнен саларға кирек.
Амғы туста хысхаа тимненіс тоғыстары хайди апарылчатханнаңар искірген Хакасияның пӱдіріг паза ЖКХ министрі Валерий Келин. Аның чооғынаң, министерство тоғынҷылары Ростехнадзор органнарынаң хада устапчатхан компанияларның тоғызын сыныхтааннар. Іди 35 компанияның тимненіс тоғызы сыныхталған, оларның салтарларынча илееде читпестер ілезіне сығарылған. Харатас городха кірчеткен Пригорсктағы объекттерні тимниріне 16 миллион салковай позыдылған полған. Аның 9 миллионы чылығ паза суғ пирҷең сетьтерні тыхтирына ызылған, 7 миллион салковай - ӱгредіг учреждениелерін тимниріне.
Республиканың хысхаа пӱкӱлее тимненізі 83 процентке тиңнелче. Кӧп тоғыс толдырыл парған, аймахтарға паза аал чӧптеріне контракттарча тоғыстар апарарына 125,6 миллион салковай позыдылған. Дотация оңдайынаң муниципалитеттерге 45,6 миллион салковай пирілген. Амды ӧӧн тимненіс тоғыстары сентябрь-октябрьға чылдырылчалар.
Таштып аймаа хысхаа 93 процентке тимде. Аймах кінінде Луначарскийнің орамазындағы сетьтін 55 метр участогы сайбалған, ағаа тыхтағ тоғыстары киректелче. Хубачар аал 75 процентке тимде, андағы котельнайда тыхтағ тоғыстары апарылча, ідӧк анда насостарны алыстырарға кирек.
Прай даа суғ, чылығ пирчең сетьтерде трубалар тимірдең иділгеннер. Халғанҷы туста тимірге паалар тың ӧс парыбысхан, аннаңар муниципалитеттернің кӱзі, ахчазы андағ сетьтерні алыстырарына читпинче, аннаң сидіксіністер сығысча. Сорығ тыхтағ тоғыстарын чахсы апарча. Аймахтарда, хысхаа тимненіс тоғыстарына тың хайығ айландырбин, хайдағ-да пасха нимелернең айғасчалар. Аймахтар пастары прай киректер ӱчӱн нандырығлығ ползыннар. Республикада 56,4 муң тонна хара тас пилетелген.
Валерий Келин хайдағ аал чӧптерінде нинче читпестер табылған саннарны искірген.
САН ПИРІСТЕР
Асхыс аймааның пазы Абрек Челтыгмашев хысхаа тимненіс тоғыстары аймахта хайди апарылчатханнаңар искірген. Аның чооғынаң, Тӧӧ пазы поселокта чурт фонды хысхаа 100 процентке тимде, чылығ пирҷең сетьтер - 85 процентке. Писхамҷыда чурт фонды ідӧк 100 процентке тимде. Андағы котельнайда хара тас чоғыл, банктағы счеттар чабых. Пилтір аал чӧбінде 12 читпес ілезіне сығарылған, олар ам тӱзеділчелер. Тоғынҷыларға аттестация график хоостыра иртірілче. Паалар тың ӧс парған, подрядчиктер постарына ӱрегліг тоғыс апарарға хынминчалар.
Хайди искірген Таштып аймааның пазы Алексей Дьяченко, аймах кініндегі котельнай 95 процентке тимде. Анда тыхтағ тоғыстары апарылча, аның хыры наачылалча, тӱрчедең прай тоғыстар толдырыл парар. Сетьтің сайбалған участогы чағынғы туста алыстырылар. Ростехнадзор хай пірее читпестер таныхтаан, олар тӱзеділчелер. Кочегарлар аттестация иртібіскеннер. Аймахха сайбалған сеть участогын тыхтирына ахчалығ полызығ киректелче. Ол участок санға алылбаан, аның ээзі паза пічіктері дее чоғыл. Росреестрдең выписка ла алып алар оңдай пар, пасха документтер чоғыл. Валерий Келин ээзі чох участокка ахча пирілбес теен. Валентин Коновалов аймахха дотация ыс пирерге чахығ пирген.
Алтай аймааның пазы Татьяна Раменская Хубачардағы котельнайдаңар чоох апарған. Полған на чыылығда пу котельнайдаңар чоох парча. Татьяна Раменскаяның чооғынаң, амды анда материаллар читкіче, тыхтағ тоғыстары узарадылча. Ростехнадзор 25 читпес ілезіне сығарған, оларның 12-зі пічіктерге теелче. Тоғыстар толдырарына нандырығлығ кізілер турғызылған, аттестация иртірер график тимнелген.
Чыылығда ідӧк сан пиріс тутханнар Орджоникидзе аймааның пазы Анатолий Тайченачев паза Ағбан пилтірі аймаа пазының пастағы орынҷызы Иван Белоус. Олар аймахтарында тимненіс тоғыстары хайди толдырылчатханнаңар искіргеннер. Пии аймаандағы Кирбі аал чӧбінің пазы Валентин Капчигашев аалдағы котельнайда тыхтағ хайди парчатханнаңар чоохтаан.
Валерий Келин Асхыс аймаандағы киректер чахсы саринзар алысчатханын таныхтаан.
ИСТІГ ОҢДАЙЛАР ТӦСТИРІ
Пӱдіріг паза ЖКХ министрі город-аалларда истіг оңдайлар тӧстир сурығны хысхачахти чарытхан. Хайди ол искірген, муниципалитеттер пастары халых чон полчатхан орыннарға хайығ тың салбинчалар. Киректер иң уйан парча Саяногорскта. Анда кӧрілген тусха объекттерні тузаланысха кирбинчелер, пічіктерні тузында тимнебинчелер, андағ оңдайнаң республика кӧзідімнерін тӧбін тӱзірчелер. Ідӧк Сорығда пу сурығча тудығлар пар. Саяногорсктың, Сорығның паза Абазаның пастары, сан пиріс тудып, прай читпестерні чағынғы туста тӱзет саларға молчааннар.
- Муниципальнай пӱдістер пастары прай тимненіс тоғыстарын постары хатығ сыныхтағда тутсыннар, олар аймахтардағы киректер ӱчӱн нандырығлығлар. Пічіктерні тузында тимнирге кирек. Піс федеральнай кін алнында сан пиріс тутчабыс. Сірер тоғыстарның заказчигі полчазар, аннаңар сидіксіністіг сурығларны тузында таныхтап турыңар, министерство оларны пӧгерге хабас пирер, - теен Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде