РЕСПУБЛИКА ПАЗЫНЫҢ ТУЗАЛЫҒ ЧӦПТЕРІ
03.09.2021
Хабарлар
Студенттернең тоғазығ. Пу неделяда Хакасия пазы Валентин Коновалов Хакас хазна университедінің тархын паза право институдының 1-ғы курстағы студенттерiне улуғ нимес лекция хығырған
Полған на пастағы курстарның студенттеріне ӱгредіг чылын мындағ чапсых тоғазығнаң пастирға оң тӱспинче полар, неке. 1 сентябрьдох чииттер университеттің ректорынаң танысчалар паза регион пазының лекциязын истіпчелер! Аннаңар, неке, лекция алнында ХГУ-ның актовай залында чыылған студенттернің аразында улуғ нимес хорығыс, сағыссырас пілдірткен. Чииттер блокноттарында азынада сурығлар тимнепчеткеннер, преподавательлерінең чӧптесчеткеннер...
Хакасия пазы Валентин Коновалов, тізең, позы хаҷан-да пу университетті хызыл дипломнығ тоосхан. Ол «Юриспруденция» кӧстегҷе ӱгренген. ХГУ-ның студенті, чалтырама карьера идіп, амды регионның устағҷызы полча, республикада ӧӧн кізі тиирге чарир! Пу пастағы курстағыларға кӧзідім.
Лекция пасталар алнында, Хакас хазна университедінің ректоры Татьяна Краснова, хайзы хаҷан даа наа нимелер сағын таап алча, республика пазы Валентин Коноваловсар айланған:
- Пастап піс Сірерге улуғ нимес тест иртірібізерге сағынчабыс, - теен ол Валентин Олеговичке.
Регион пазы лекция піди пасталар тіп сағынмаанға тӧӧй полған, сала ӱрӱк парған.
- Сірер мині хызартарға сағынчазар ба? - кӱлінібіскен ол.
Мына пастағы сурығ.
- Институттың директоры Валентина Владимировна Наумкина Сірерні ӱгреткен ме?
- Я, ол мині ӱгреткен. «Конституционное право» предметче преподаватель полған, - сах андох нандырған губернатор.
- Диплом тоғызының темазын оңнапчазар ба?
- Оңнапчам, минің темам «Форма государства» адалған. Аны піс наука устағҷызынаң хада таллап алғабыс.
- Хынған преподавательлерің сағыста халған ма? - сурған ректор Татьяна Григорьевна.
- Минің хынған преподавательлерім аудиторияда одырчалар - ол Валентина Владимировна Наумкина, Эдуард Алексеевич Сагалаков... Оларны мин ундутпинчам.
- Аарлығ студенттер, - айланған пастағы курстағы студенттерзер ректор, - сірер лекцияларны, сыныхтағлығ тоғыстарны иртірбезер, Валентин Олегович чіли, ідӧк прай преподавательлеріңні ады-солаларынаң пілерзер, хайди ӱгренгеннеріңні ундутпассар.
Хакасия пазы Валентин Коноваловха сурығлар пирері тоозылғанда, Татьяна Краснова ағаа «зачет» танығ турғыс пирген.
Мына мындағ чапсых кирекнең пасталған лекция. Аннаң андар Валентин Олегович студенттерге «Хазна паза ӱлгӱ» темаҷа лекция хығырған. Ол сурығ нандырығ оңдайха ирткен. Студенттер пу темаҷа тирең піліс алғалах таа ползалар, хазна пӱдізінеңер ол-пу пілістерін кӧзіткеннер паза губернаторнаң чоох алысханнар. Халғанҷызында Валентин Коновалов чииттерге тузалығ чӧп пирген.
- Историк алай ба юрист полар сурығ алнымда турыбысханда, мин ікінҷізін таллап алғам. Пу кӧстег мағаа чағын, пілдісііг паза хынығ. Аннаңар чииттер, таллағ итчетселер, иң пастап постарына чағын специальность таллирға киректер. Ідӧк пілерге кирек, пу сфера уғаа нандырығлығ. Мин аны имҷілернің тоғызынаң тиңнестірчем. Олар ағырчатхан кізінің мыннаң мындархы чуртазына чол салчалар. Имҷілер алҷаас ит салзалар, кізі ӱреп парарға алай кинен пол парарға айабас, имнеп алзалар, тізең, чуртас аннаң андар парар. Юристтер ідӧк. Олар алҷаас ит салзалар, чуртағҷының чуртазы сайбал парарға айабас алай ба юрист аның чуртазын хыйалдаң ал халар. Аннаңар, таллағ итчетсеңер, чӱректеріңе чағын специальностьты таллаңар. Андада тоғыс сірерге ӧрініс ағылар.
Мына мындағ тузалығ кӧзідімде тоозылған чапсых тоғазығ. Мындағ лекцияларны Хакас хазна университеді кибірге кирерге пӧгін тутча.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы