ТАҢНАСТЫҒ ОДЫРЧЫХ, ХООСХА-КӦРІГҶІ ПАЗА ПАСХА ДАА ХАЙХАСТАР
22.09.2021
Хабарлар
Табығлар-2021. Хакасияның Табығ комиссиязының кнезі Александр Чуманин ӱс кӱнніг ӱн пирістің салтарларынҷа пресс-конференция иртірген
РЕСПУБЛИКАНЫҢ ТАБЫҒ КОМИССИЯЗЫНЫҢ КНЕЗІ АЛЕКСАНДР ЧУМАНИН 20 СЕНТЯБРЬДА, ХАБАРҶЫЛАРНАҢ ТОҒАЗЫП, ИРТКЕН ТАБЫҒЛАРНЫҢ АЗЫНАДА САЛТАРЛАРЫНАҢАР ИСКІР ПИРГЕН.
- Пӱӱн табығларның салтарлары иділче, - теен ол пресс-конференция-ны азып. - Табығларның, хайзы Россияның тархынында чапсых страница пол парар. Пу табығлар конкуренциязынаң паза тимненіс оңдайларынаң пасхалалған сылтаанда.
Хакасияның Табығ комиссиязының кнезі таниинаң, пу табығларнын ӧӧн пасхалалчатхан оңдайы - ӱн пиріс нинче-де кӱн ирткені. Табығ комиссияларының тоғызын анзы сидіксіндірген, че республиканың УИК-тары паза ТИК-тары турыстығ тоғыныбысханнар тіп таныхтаан ол.
Паза ирткен табығлар прай саринаң азых полғанынаң пасхалалғанын таныхтаан. Хазнадағы табығ участоктарының 96 %-інде прай тоғыс онлайн апарылған. Хакасияда, видеоға суурылып, 379 табығ участогы паза І3 территориальнай табығ комиссиязы тоғынған.
Республиканың Табығ комиссиязы устағҷызының чооғынаң, ӱс ле орында ол оңдай тузаланылбаан: ӱр нимес тусха тӧстелген табығ участоктарында - істезіг изоляторында паза ікі имнег туразында (республиканың имнег туразында паза Саяногорсктағы имнег туразында).
Ӧӧн объекттер, хайзылары хараа-кӱнӧрте видеокамералар кӧзіне турғаннар, - бюллетеньнерні хайраллаҷаң сейфтер паза сейф-пакеттер.
- Пу табығлар ідӧк пӧзік конкуренциязынаң пасхалалған, - чоохтаан Александр Чуманин. - Кӧзідімге, 2016 чылда Хазна Думазынзар табығларда пістің регионда 6 ла кандидат полған, пу хати харбазығда 10 кізі араласхан.
Конкуренция пӧзік полғаны ідӧк табығлар алнындағы кӱрезіг хазыр парғанынаң пілдірткен. Закон хыйыстыра даа оңдайлар тузаланылған.
Ӱс кӱн аразына Хакасияның Табығ комиссиязынзар 45 хоптығ айланыс кіртір, оларның 43-і Хазна Думазынзар табығларнаң палғалыстығ полтыр, 2 айланыс - орындағы пос устаныс органнарынзар табығларнаң. Хоптарның ӧӧн чардығы табығлар алнындағы агитациянаң палғалыстығ полтыр. Кірген айланыстарның 11-і сын, 7 кирек хоостыра МВД-зар пічіктер ызылтыр. 34 айланысча сайбағ пар полғаны ілезіне сығарылбиндыр. Табығларның салтарларына теелчеткен сайбағ табылбиндыр.
Александр Чуманин ідӧк табығлар тузында хынығ киректер полғанынаңар чоохтап пирген. Кӧзідімге, Пииде видеокамералар полызиинаң пір табығ участогы хыринда тасхар турчатхан таңнастығ одырчых парын піліп алғаннар: кем ол одырчыхсар одырыбысча, прайзы тӱрчедең уйғаа пастырыбысча осхас.
Паза пір участокта ӱн пиріс хайди парчатханын хоосхаҷах матап сыныхтап турған, комиссиядағылар аны «тӱктіг кӧрігҷі» адап салтырлар. Ол хоосхаҷах, табығ участогынҷа пас чӧріп, удаа бюллетеньнер сухчаң харчах хыринда одыр салчаң паза кем хайди ӱн пирчеткенін кӧр турчаң. 19 сентябрьда табығ комиссияларының 4 кізізін тӧреен кӱннерінең алғыстаптырлар.
- Че иң не хайхастығ кирек ідӧк Пииде пол парған, - чоохтаан Хакасияның Табығ комиссиязының кнезі. - Анда пір участковай табығ комиссиязының кнезі полчатхан ипчі участоктаңох сығара пала тапчаң туразар кір парған, оолағас тӧрідіп алған.
Александр Чуманиннің таниинаң, мындағ киректер табығларны иртірерінҷе сидік тоғыс тузында даа хайхастығ паза чапсых нимелерге орын пар полчатханын кӧзітче.
- Амды табығларның салтарларынаңар, - ӧӧн сурыға читкен республиканың Табығ комиссиязының устағчызы. - Пастирбыс Россияның Хазна Думазының депутаттарына табығлардаң.
Ирткен ӱн пирістің салтарларынҷа, Хакасияда табығҷылар араласханы 37 % азыра полтыр, 2016 чылдағызынаң тиңнестірзе, 2 %-ке ас. Иң не ӧткін Орджоникидзе аймаанда ӱн пиртірлер - табығыларның 45 %-і килтір. Иң уйан - Харатаста - 30 %. 35 № пір мандаттығ Хакас табығ округынҷа кандидаттар ӱчӱн пирілген ӱннер піди ӱлестіріл партыр:
Сокол Сергей Михайлович - 28,97 %
Старостин Валерий Николаевич - 22,51 %
Челтыгмашев Евгений Павлович - 16,83 %
Бразаускас Денис Владимирович - 6,7 %
Ильящук Валерий Иванович - 6,59 %
Мяхар Александр Владимирович - 4,52 %
Молчанов Михаил Александрович - 3,61 % м Малеев Виталий Рома-1 нович - 2,7 %
Ягупова Екатерина Владимировна - 2,45 %
Хабаров Алексей Сергеевич - 1,14 %.
Политическай партиялар сығарған кандидаттар списогы ӱчӱн ӱн пирістің салтарларынаңар искіріп, Александр Чуманин 5 %-тіг хырығны ас парыбысхан партияларның на, хайзылары наа Хазна Думазынзар кіріп аларлар, саннарын искір пирген. 14 партия аразында ол хырығны 5 партия азып алған. Хакасияда оларның аразында табығҷыларның ӱні піди ӱлестіріл партыр:
«Единая Россия» - 33,36 %
КПРФ - 29,85 %
«Новые люди» - 9,85 %
ЛДПР - 8,02 %
«Справедливая Россия - Патриоты - За правду» - 6,58 %.
Хакасияда Хазна Думазынзар табығлардаң пасха, орындағы пос устаныс органнарынзар табығлар ирткен. Оларның аразында - Ағбан пилтірі аймаа пазына. Хакасияның Табығ комиссиязының кнезі Александр Чуманиннің искіриинең, ол табығларда, табығҷыларның 37,45 % ӱнін чыып, Елена Владимировна Егорова (ирткен 5 чыл аймахнаң олох устаан) утып алған. Ікінҷі орында - Нина Владимировна Леонченко (33,36 %).
Абаза город депутаттарына табығларда 15 мандаттан 6-зын КПРФ сығарған кандидаттар алып алтыр, 7 мандатты - пос позын сығарған кандидаттар, 2 мандатты - «Единая Россия» сығарған кандидаттар.
Табығларны тиксі алза (Хакасияда 27 табығ кампаниязы ирткен), «Единая Россия» партиядаң 12 кандидат утып алтыр, 8 кандидат - КПРФ-таң, 5 кандидат - «Коммунисты России» партиядаң, 2 кандидат - «Справедливая Россия - Патриоты - За правду» партиядаң, 1 кандидат - «Родина» партиядаң паза 23 - пос посты сығарған кандидат.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде