ОЛАРНЫҢ ТОҒЫСТАРЫ КӦРІНДІРЕ
22.09.2021
Хабарлар
Сыйыхтас. Пӱӱл Россияның эпидемиология службазына 99 чыл толча. Мыңдағ танығлығ кӱнге чарыдып, Хакасия пазы Валентин Коновалов Хакасияӌа Роспотребнадзор управлениезiнiң тоғынӌыларын алғыстаан
- Амғы туста піс эпидемиологтарның тоғызы иң кирек тіп чахсы кӧрчебіс. Правительство паза республика чуртағҷыларының адынаң Хакасияҷа Роспотребнадзор управлениезінің тоғынҷыларын алғыстапчабыс. Сірер, коронавирустаң паза пасха даа чуғынҷах ағырығлардаң тоғыр кӱрезіп, республикаа паза хазнаа улуғ хозым итчезер. Ковидке тың тарирға пирбинчезер. Пӱдіріг тоғыстары, национальнай проекттер ідӧк сірернің тоғыстарыңнаң палғалыстығ. Республиканың тилізі ӱчӱн піс хада пір пӧгін толдырчабыс, аннаңар нандырығлығ тоғыстарың ӱчӱн улуғ алғызым читірчем. Алынҷа таныхтапчам ветераннарны. Сірернің кӧп чыллығ опыдыңар чиит специалисттерге тузалығ. Прайзына хазых, кӱс паза наа чидіглер алғапчам! Сӧбіреңерде часка ползын! - алғыстаан республика пазы Валентин Коновалов.
Анаң Валентин Олегович специалисттерге танығлығ сыйыхтар читірген. Пӧзік профессионализм паза чонның хазиин хайраллапчатхан ӱчӱн «Хакасияның саблығ имӌізі» аарластығ атха Роспотребнадзор тоғынӌызы Юлия Ильина турысхан. Ол региондағы чахсы паза хорғыс чох ас-тамах ӱчӱн нандырча. Абазаӌа, Асхыс паза Таштып аймахтарынӌа Роспотребнадзор устағҷызы Екатерина Кыжинаева Хакасия пазының алғыстас пічиин алған. Ол тоң хакастар чуртапчатхан аймахтарда чарыдығлығ тоғысты ікі тілнең (хакас паза орыс) апарча, чонға масканы хайди орта кизерін, холларны сыбыра арығ тударын, кізілердең оортах тудынарын кӱннің сай чоохтапча.
Пандемия пасталғаннаң имӌілер паза эпидемиологтар, чуртағӌыларның хазиин айландырып, хараа-кӱнӧрте тоғынчалар. Постары даа хорғыстығ ағырыға хаптырт салчалар, хай піреезі тың ағырған. Хазыхтанып алзалар, пазох уйғу пілбес службаларынзар айланчалар. Оларның тынанӌаң даа тус чоғыл. Правительство туразындағы чылығ тоғазығда Хакасия пазының орынӌызы Ольга Пономарева ковиднең ағырған кізілерні тирең диспансеризацияа хығырған. Пу чуғынӌахнаң кӱрезерге ам даа кӧп тус парыбызар, аннаңар республикаа хазых специалисттер кирек.
- Волгада холера пасталғанда паза Ортын Азиядаң чума кірібіскенде, эпидемиология службазы тӧстелген паза тилеен. Чуртағҷыларның хазиин хайраллап халар ӱчӱн, кӧп имҷі чуртазын пир салған, - чоохтаан Хакасияӌа Роспотребнадзор устағӌызы Татьяна Романова. - Мин службада 30 чыл тоғын парирбын. Пу тусха аймах чуғынҷахтарнаң кӱрезерге киліскен. Амды пазох наа ағырығ сығыс килген. Піс аны пір ынағ ӧменең чох идерге кӱстенчебіс. Полған на тоғынҷының хозымы аарлығ.
Тоғазығ тоозылчатханда, Аарластығ пічіктер алған специалисттер мыннаң мындар ідӧк нандырығлығ тоғынарға тимделерін искіргеннер.
- Мындағ сыйых алған ӱчӱн кӧңнім кӧдіре, - ӧрінізінең ӱлескен Абазаӌа, Асхыс паза Таштып аймахтарынӌа Роспотребнадзор устағҷызы Екатерина Кыжинаева.
- Коронавирустаң тоғыр кӧп тоғыс апарылча. Асхыс аймаанда ағырчатханнарның саны хызырылбинча. Чуртағҷылар хазыхтарына нандырығлығ хайзалар даа, че аймахта кізі кӧптеңер, ковид анда ӧткін хайынча. Таштып аймаанда коронавирустың ікiнҷі салғағында кӧп кізі ағырған. Вакцинациядаңар чоохтаза, ӱгретчілер прививканы чахсы турғыстырчалар. Ӱс чулдағы паза Индіркі Тӧӧдегі школалар вакцинацияны 100 % иртібіскеннер.
Санитарнай службалар тоғынҷыларына, коронавирус чуғынҷах ағырығ тарапчатханда, сидік. Аннаңар мындағ улуғ ӱлӱкӱнде пик хазых алғапчам, тоғыстары кӧріндіре ползын. Піс ӧӧнінде профилактиканаң айғасчабыс, аннаңар тоғызыбыс кӧрінминче. Че амғы пандемия пасталғанда, тоғызыбыс іле кӧрінче.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде