ПРАЙ ТОҒЫСТАР ТУЗЫНДА ТОЛДЫРЫЛЗЫН
22.09.2021
Хабарлар
Селекторӌа чыылығ. Хакасия пазы Валентин Коновалов правительство кізілерінең паза муниципалитеттер устағҷыларынаң хысхаа тимненіс хайди парчатхан сурығҷа видеоселектор пастыра чыылығ иртірген
РЕСПУБЛИКАНЫҢ ТИМНЕНІЗІ
Пу чыылығ Россияның Хазна Думазынзар табығлар алнында иртірілген, че мероприятиеде табығлардаңар пір дее чоох парбаан. Видеоселекторны тоғындырчатхан оператор, полған на муниципалитетнең палғалыс тудып, хайдағ устағҷы чыылығның тоғызында аралазарын орталатхан.
Валентин Коновалов, чыылығның ӱзӱриине сығарылчатхан сурығларны чарыдып, республиканың хай пірее муниципальнай пӱдістерінде тураларға чылығ пиріп пастабысханын таныхтаан.
Хайди искірген Хакасияның пӱдіріг паза чурт-коммунальнай хоных министрі Валерий Келин, республикада 2632 объект хысхаа тимненіс паспортын алып алған, 72 объект, аймах алымнарын читіре чаап полбин, тимненіс паспортын ал полбаан. Республиканың хысхаа тиксі тимненізі 97,8 процентке тиңнелче. Чурт фонды соохтар пасталарына тимде. Тураларға чылығ пирерінҷе Харатаста хай пірее читпестер пар, оларны чағынғы туста тӱзет саларға молҷапчалар.
Муниципалитеттерге хысхаа тимненер тоғыстар толдырарына 125,6 миллион салковай субсидия оңдайынаң позыдылған, 96 миллион салковайға контракттар иділген. Пірее муниципальнай пӱдістер, амға теере контракттар итпин, тоғыстарны сентябрь-октябрьда ла толдыр салар план тутчалар. Республика муниципалитеттерге хоза 67 миллион салковай пирерге тимде, анзы ӧӧнінде котельнайларға хара тас читкіхе аларына кӧстелче.
Алтынзархы аймахтардағы аалларда тураларға чылығ пиріп пастабысханнар. Амды хысхаа тимненіс тоғыстары прай даа объекттерде хыызында парча. Іди Шира аймаандағы Наа чир аалда тураларға чылығ пирчелер. Алтай аймаандағы Хубачар аалда 2 № котельнайны тыхтап салғаннар, анда наа оборудование турғызылған. Таштып аалның тимненізі 95 процентке тиңнелче, анда хай пірее читпестерні тӱзет саларға кирек. Харатас город хысхаа 98 процентке тимде, пу сурығҷа муниципалитеттер устаанаң чыылығ иртірілген. Городха пӱӱл чылығны Ағбандағы ТЭЦ пирер. Асхыс аймаандағы Писхамҷы аалда читпестер ілезіне сығарылған, ол санда топливо читкіҷе пилетирінҷе, хара тас аныпчатхан разрезтер полызарға тимделер. Олар чағынғы туста котельнайларға хара тас тартып пастирлар.
Тимненіс паспорттарын алар тоғыс узарадылча, муниципалитеттерні Ростехнадзор органнары сыныхтапчалар. Котельнайларның тоғынҷылары аттестация иртчелер, Орджоникидзе аймаандағы Приисковай поселоктың котельнайы ам даа тимненіс паспортын ал полбаан. Сорығда андағ паспорттар аларға тимненчелер.
Валентин Коновалов прай объекттерге тимненіс паспорттарын 1 ноябрьға теере алып аларға чахығ пирген, ілезіне сығарылчатхан читпестерні 15 октябрьға тӱзет саларға чахаан.
САН ПИРІСТЕР
Шира аймаа пазының орынҷызы Евгений Циконың чооғынаң, аймахтың чурт фонды хысхаа 94 процентке тимде, котельнайларның тимненізі - ідӧк 94 процент. Сон пилтірі аалдағы котельнайда наа хазан турғызылча, Жемчужнай поселокта тимненіс тоғыстары узарадылча. Чылығ пирчеткен сетьтернің тимненізі 98 процентке тиңнелче, суғ пирҷең сетьтернің тимненізі - 97 процентке. Наа чир аалдағы паза Коммунар поселоктағы аал чӧптері, чӧптезіглер идіп, котельнайларны тоғындырыбысханнар. Хара тас читкіҷе тимнелген, ідӧк топливо хоза тартылча. Коммунардағы котельнайның туразында Ростехнадзор чіктен парған стенені ілезіне сығарған, аннаңар тимненіс паспорты алылбаан.
Алтай аймааның пазы Татьяна Раменскаяның искіриинең, прай тоғыстар план хоостыра апарылчалар. Хубачар аалда ӱс котельнай тоғынча, хара тас читкіҷе тартылған. Ызых паза Чынай аал чӧптерінде котельнайларның тураларында читпестер табылған.
Хайди искірген Асхыс аймаа пазының орынҷызы Николай Асочаков, аймахта сидіксіністіг сурығлар чоғыл. Тӧӧ пазы поселокта чурттарға чылығ пиріл сыххан, котельнайларда хара тас читкіҷе пилетелген. Пирілген субсидиянаң тузаланары сала сӧӧ тартылча, ахча орай арах килген. Тимненіс паспорттарын тузында аларынаң хорғыс парох, че пу тоғыс толдырыл парарына ізеніс пирілче. Пилтір аал чӧбінде ілезіне сығарылған читпестер тӱзеділер.
Таштып аймааның пазы Алексей Дьяченконың чооғынаң, аймахта прай тоғыстар толдырарына чӧптезіглер иділген, оборудование алылған, амды чылығ пирҷең сетьтер алыстырылча. Тураларға чылығ тузында пирілер. Аймахтың имнег туразының котельнайында ыс сыхчатхан трубада читпестер табылған, оларны пос кӱзінең тӱзет саларлар.
Боград аймаанда прай тоғыстар чахсы толдырылчалар, аймах пазы Сергей Клименконың чооғынаң, хысхаа тимненіс паспорттары тузында алылар, топливо читкіҷе.
Харатас город пазының пастағы орынҷызы Виталий Кутахиннің искіриинең, чылығ пирхең сетьтернің пис участогында читпестер пар, анда тыхтағ тоғыстары апарылча. Котельнайларда хара тас пір айға читкіҷе пилетелген. Чурт фонды хысхаа 97 процентке тимде, социальнай сфера - 95 процентке. Тимненіс паспорттарын алар тоғыс узарадылча.
Пии аймааның устаа ӱчӱн сан пиріс тутхан Кирбі аал чӧбінің пазы Валентин Карчигашев. Аның чооғынаң, тимненіс паспорттарын алар пічіктерде алҷаастар табылған, олар ам тӱзеділчелер. Котельнай тоғынҷылары аттестация ирткеннер. Хара тас андар тартылча. Паспорттарха сыныхтағ хатап 7 октябрьда иртірілер.
Сорығ городтың пазы Владимир Найденов тимненіс паспорттарын алар тоғыстаңар искірген. Іди 17 пунктча тоғыстар толдырылтыр, 16 пунктча тоғыс узарадылча.
ИСТІГ ОҢДАЙЛАР ТӦСТИРІ
«Городта истіг оңдайлар тӧстирі» программаҷа республикада тоғыстар хайди апарылчатханнаңар чоох ӱр парбаан. Хайди таныхтаан министр Валерий Келин, ікі муниципалитетте тоғыстар сӧӧ тартылча: Саяногорскта паза Пииде. Ағбанда тоғыс читіре толдырылбаан, че ол кӱстіг муниципалитет, прай тоғыстарны чағынғы туста пос кӱзінең толдыр салар. Саяногорскта тоғыстарны 15 ноябрьға теере тоос саларға молҷапчалар. Пии аалда графиктең ікі неделяа халчалар.
Ідӧк чоох парған Харатастағы септиктердең алылған ниме-нооны Ағбан пилтірінзер тартардаңар. Пу тоғыс ӱчӱн пааларны 2,5 хати кӧдірібістірлер. Аннаңар идінҷектер ниме-нооны анда-мында тӧгібісчелер. Пу оой нимес сурығны Хакасия пазы сентябрь тоозылғанҷа пӧк саларға чахығ пирген. Тоғыстарға кирек ахча позыдылар.
- Харатастың тархынында пӱӱл танығлығ кирек полар - городха чылығ наа режимде пирілер. Ағбандағы ТЭЦ-таң город чуртағҷыларына чылығ килер. Мында хайығ саларға кирек - наа режимнең сетьтер тоғын сыхса, хай пірее орыннарда сайбағлар даа сығызар. Ӧӧні - чуртағҷыларның кӧңні кӧдірілзін, оларға чуртирға истіг ползын.
Республикада тураларға чылығ пирер тоғыстарны муниципалитеттер пастары тӧреміл сыныхтағда тутсыннар, прай тоғыстар тузында толдырылзын. Хысхаа тимненіс паспорттарын алар тоғысты кӱннің сай сыныхтағда тудыңар, - теен Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде