«ПАРАЛИМП ОЙЫННАРЫНЫҢ ОДЫН ТАМЫСХАНДА, ЧӰРЕЕМ ТИБІРЕЕН»
22.09.2021
Хабарлар
Спорт. Чир-суғҷыбыс Ирина Мордакина, стол теннизінҷе Россияның піріктірілген командазының тренері полып, пӱӱл Паралимпиадада араласхан
Токиода ирткен Паралимп ойыннарында Россияның спортсменнері турыстыра кӧрінгеннер. Олар, 118 медаль холға киріп, ӧменең тӧртінӌі орынға сыхханнар. Пу чидігде стол теннизінең айғасчатханнарның хозымы парох. Теннисисттер пістің командаа 7 медаль ағылғаннар: 1 алтын, 2 кӱмӱс паза 4 хола. Токиода хазии уйан спортсменнернең Хакасиядағы тренер Ирина Мордакина тоғынған.
Таныхтирға кирек, Ирина Александровна кинек спортсменнернең тоғынчатхан хазнабыстың иң чахсы тренерлері санына кірче. Аның ӱгренӌілері Россия чемпионаттарында тӧреміл чиңіс тутчалар, чоннар аразындағы марығларда даа турыстыра ойнапчалар. Тӱзімніг тоғызы ӱчӱн 2016 чылда чир-суғӌыбысты Россияның піріктірілген командазының тренеріне турғысханнар. Ол чоохтапча: Кинек спортсменнер диагнозтар хоостыра 11 классха чарылчалар. Кӧзідімге, стол теннизінде турып ойнапчатхан улус пір классха кiрче, коляскада одырып - пасха. Секцияа чӧрчеткеннернің аразында аймах ағырығлығ чон, оларның санында хол-азағы чахсы тоғынминчатханнар, оорха, мойын сындырғаннар, азаанаң алай холынаң кинеп парғаннар пар. Амғы туста ӱгренӌілерімнең коляскада одырып ойнапчатханнарның салтарлары чахсы, аннаңар піріктірілген командада, тренер чіли, пу классха кірчеткен спортсменнернең тоғынчам.
Пӱӱл стол теннизінең айғасчатханнардаң Паралимп ойыннарына таллағны 10 кізі иртібіскен, пизі коляскада одырып ойнапча. Анзы улуғ чидіг. Тренерлердең кемні марыға ызардаңар чарадығны Россияның Паралимп комитедіалча. Таллағны иртібіскен спортсменнернің кӧбізі турып ойнапчатханнар полған полза, мині Токиозар ыспасчыхтар, неке. Марығлар тузында тренер Игорь Александрович Сазоновнаң хада тоғынғам.
Паралимпиадаа парар алнында теннисисттер Южно-Сахалинск городта сборларға чыылыстырлар. Сахалиннің паза Японияның аразында 1653 километр. Спортсменнер Россияның аймах регионнарынаң полғаннар. Олтырыхта марығларға тимненіп, олар пасха климатха, тусха кӧніккеннер. Сборлар тузында кӱнде ікі тренировка полӌаң. Спортсменнер техникаларын чітіткеннер, устарын тиліткеннер. Ідӧк тренерлер устаанынаң полған на «ыырӌыны» ӱзӱріп, аны утып алар оңдай тілееннер. 19 августта команда Токиода полған. Ирина Александровна чооғын узаратча:
- Стол теннизінҷе марығлар Токиода ирткеннер. Олимп аалынаң спортзалзар автобустығ чарым часха чидіп аларға чарир. Игорь Александровичнең иирде кем хайдағ спортсменнең тоғынар тіп чоохтас салҷаңмыс. Пастағы марығлар 9.00 часта пасталчатса, 5.00 часта турчазың, столовайда азыранып алып, 6.00 часта автобусха одырчазың. Полған на спортсменге улуғ нимес тренировка иртірібізерге тус пирілче. Аның соонда теннисисттер ойнапчалар. Тренер спортсменге хабазарға кирек. Партиялар аразында чӧптер пирчезің, кӧңнін кӧдірчезің. Пір кізі ойнабысса, ікінӌізі марыға сыхча.
Иирде марығлар соонда ӱзӱріг парӌаң: ойын хайди иртті, хайдағ алҷаастар полды, пазағы ойында спортсменге тактиканы алыстырарға кирек пе. Іди кӱн ирт парӌаң. Тоғыс кӧп полып, суткада 5-6 ла час узуӌаңмыс. Че спортсменнер чиңіс тутса, прай сидіксіністер ундудылча.
Сынны чоохтаза, устағӌылар коляскада одырып ойнапчатханнарның піреезі сыйыхтығ орынға сығар тіп ікінҷілееннер. Анзы тиктең нимес. Пылтыр пандемия ӱчӱн регионнарда спортзаллар тоғынмааннар, аннаңар кӧбізінің тренировкаларны толдыра кӱзінең иртірерге оңдай чох полған.
Ағаа хоза стол теннизінде хыдаттар паза кореецтер тӧреміл чиңіс тутчалар. Устарына морсынчам, олар робот осхастар. Че Надежда Пушпашева хазыр харбазығда хола призер полып алған. Ол улуғ опыттығ спортсмен, Пекинде паза Лондонда ирткен Паралимп ойыннарында аралазарға маңнанған. Итсе-де, ол марығларда теннисист ипчее оң полбаан. Пӱӱл Токиода аның сағынған сағызы толды. Расул Назировнаң Владимир Топорковты махтирға кирек. Спортсменнер, Паралимпиадада пастағызын на аралазып, пизінҷі орынға сыхханнар. Оларның ӱчӱн матап ӧрінгебіс. Дмитрий Лавровнаң Александра Васильева подгруппадаң сых полбааннар.
Турып ойнапчатхан спортсменнердеңер чоохтаза, Елена Прокофьева чемпион полыбысхан. Маляк Алиеванаң Виктория Сафонова командаа кӱмӱс медальлар ағылғаннар, Юрий Ноздрунов паза Раиса Чебаника ӱзінҷі орынға сыхханнар. Ідӧк Маляк Алиева, Виктория Сафонова, Раиса Чебаника, ӧменең ойнап, хола призер полыбысханнар. Алында Паралимпиадада Россияның теннисисттері ӱс медальдаң кӧп утпаӌаңнар. Санапчам, Токиода пістің команда турыстыра ойнабысхан.
Чир-суғҷыбыстың чооғынаң, пандемияның ӱчӱн олимп аалынаң паза спортзалдаң пасха олар Японияда пасха ниме кӧр полбааннар. Чуртағҷылар аалҷыларны чылығ удурлаҷаң одырлар. Паралимпиада тузында прай араласчыларны кӱннің сай коронавирусха сыныхтачаңнар. Ирина Мордакинаа Паралимп ойыннарының одын тамысханы иң чӱрексіністіг полтыр. Тренер таныхтапча:
- Ойыннар 24 августта азыл-ғаннар, пір кӱнінде стол тенни-зінче марығлар иртчелер. Тынанар орнына, кӱстеніп, Паралимпиада азылғанына пар килгем. Артисттер тимнеен ойын хайиимны тарт-паан. Паралимп ойыннарының одын тамысханда, чӱреем тибі-реен. Команда улуғ марығларда гимні паза флагы чох араласчат-са, изі чох полтыр. Хазна істінде чемпионаттар иртчетсе, анзы тың пілдірбинче.
Ирина Александровна Токиодаң ӱзе майых парып, олох туста кӱс алынып айлан килген. Тренернің пӧгіннер кӧп. Октябрьда аның ӱгренҷілері тиксі Россиядағы марығларда аралазарлар. Ол Великий Новгородта иртер. Ноябрьда спортсменнерні Россия чемпионадында паза первенствозында сағыпчалар. Пӱӱл теннисисттерге хайди даа чоннар аразындағы турнирде аралазарға маңнан халарға кирек. Ирина Мордакина чоохтапча:
- Хакасиядағы спортсменнернің устары Паралимпиадада аралазарға чидерчік тіп сағынчам. Че теннисисттерге чылда чоннар аразындағы тӧрт-пис марығда хайди даа аралазарға кирек. Андада ла олар таллағны иртіп алар оңдайлығлар. Хырығ озаринзар чӧрерге ахча чидіспинче. Пу сидіксініс прай регионнарда пар. Мині спортсменнерге сборлар иртірерге чӧптепчелер. Ағбанда, тізең, коляскалығ улусха истіг оңдайлар чоғыл. Амды прай сағыс Парижте ле. Ӱс чыл пазынаң Хакасиядаң пірее теннисист Паралимпиадада араласхан полза, чахсы поларчых. Сағынған сағысты толдырарға кӱстенербіс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы