Хакасия ӱчӱн турызарына ізенербіс
24.09.2021
Хабарлар
Табығлар соондағы сағыстар. Хазна Думазынзар табығлар ирт парды, республикадаң андар орындағы нимес кізі табылды - Сергей Сокол. Хайдағ салтарлар идерге чарир пу табығлар соонаң?
Россияда аймах-пасха синдегі табығлар, ол санда Хазна Думазынзар, тоозыл парды. Ӱс кӱн парған табығларның салтарларынҷа тиксі Россияда табығҷыларның араласханы, хазнаның Ӧӧн табығ комиссиязының кнезі Элла Памфилованың искіриинең, ортымахти 51,68% пол парған. Регионнарны алза, табығҷылар араласханы тың пасхалалча. Чечен чирінде табығҷылар араласханы 94,18%-ке, хонҷых Тувада 86,45%-ке читкен полза, Иркутск облазында ол 36,59% ле полған. Хакасияда табығҷылар араласханы ідӧк тӧбін - 37,52%. 2016 чылда Хазна Думазынзар табығларда табығҷыларның араласханы ікі процентке кӧп полған. Хакасияның табығ комиссиязы кнезі Александр Чуманиннің искіриинең, чылығ кӱннер турыбысханы сала харығ пол парған - чуртағҷыларның кӧбізі яблах хазарға дачаларынзар, ӱӱҷіктерінзер парыбысхан. Че мында, арса, пасха сылтағ парох - чон табығларнаң палғалыстығ суум-саамнаң майых парған даа полар.
Пӱӱл табығлар алнындағы кӱрезіг, ӧӧнінде Хазна Думазынзар кандидаттар аразында, хазыр ирткен. Пістің 35№ пір мандаттығ Хакас табығ округынҷа ол кӱрезігде 10 кандидат араласхан. Ӧӧн кӱрезіг «Единая Россия» партияның кандидады Сергей Соколның паза КПРФ кандидады Валерий Старостиннің аразында парған. Че пу кӱрезігде пос посты сығарған кандидат Евгений Челтыгмашев партия кандидаттарынаң пір дее халбаан - ӧткін хайынып, табығҷыларның ас нимес ӱнін чыып алған.
Табығлар «ізіг» парғанын ідӧк аймах-пасха сайбағлар киречілепче. Ӧӧркі Чӧп кнезі Владимир Штыгашевтің адынаң хакас чонынзар (кандидаттарның пірсіне ӱн пирерге хыйғылығ) айланыс чіли пазылған тайма пічіктер тарадылғаны даа учураан.
Че? Хайди даа полза, республикадаң Хазна Думазынзар наа кізі иртіп алған - Сергей Сокол. Ӱн пирістің салтарларынҷа табығҷыларның 28,97%-і ағаа ӱнін пирген. Орындағы ікі кӱстіг кандидат, Валерий Старостин (22,51%) паза Евгений Челтыгмашев (16,83%), соона хала парған.
Ниме піс пілчебіс Сергей Соколдаңар? Ол «Единая Россия» партияның кізізі, 2020 чылның 19 мартынаң сығара Россияның читінҷі хығыртии Хазна Думазының депутады. Алында Хызылчар крайы паза Иркутск облазы губернаторының орынҷызы, Иркутск облазы губернаторының тоғызын толдырчатхан кізі, Иркутск облазының Закон сығарҷаң чыылииның кнезі полған. Пір сӧснең политикада улуғ опыттығ кізі.
2021 чылда часхызын ол «Единая Россияның» Ирткутск облазынҷа списоктар сығарҷаң праймеризте араласханынаңар искіріглер пар. Андада ол «Иркутск облазының чуртағҷыларына туза ағылып тоғынарбын» тіп молҷаан. Че анаң ол ноға-да Хакасиязар Хазна Думазы табығларында аралазарға килібіскен. Партия чахиинҷа тіп сағынарға халча - Хакасияны ӱлгӱ партиязы холына айландырарға кирек нооза.
Орындағы кандидаттарның аразында, тізең, «Единая Россия» кандидадынаң тиңе кӱрес полҷаы ікі кандидат полған - Валерий Старостин паза Евгений Челтыгмашев. Олар Хакасия чуртағҷыларына чахсы таныс политиктер, ікізі Ӧӧркі Чӧп депутады. Валерий Старостин Ӧӧркі Чӧпте нинҷе-де хығыртығ тоғын салған, комитет кнезі. Хазна Думазынзар табығларға аны пістің регионда кӱс алынып алған КПРФ партиязы сығарған. Евгений Челтыгмашевті, ӧткін политикті, улуғласнаң тузаланчатхан меценатты чіли, чахсы таныпчалар. Ідӧк ол Хазна Думазынзар табығларға сыхханнарның аразында хакас фамилиялығ чалғыс кандидат полған. Олар ікӧлең орындағы экономика сидіксіністерінең паза кирексіністерінең хай-хай чахсы таныстар. Че, іди дее полза, олар пасха чирдең килген, орындағы чонға чахсы таныс нимес Сергей Соколны ас полбааннар.
Хайдағ салтарлар идерге чарир? Табығлар кӧзіткеннер - табығҷылар наа кізее ізенчелер. Мында ідӧк аның федеральнай синдегі палғалыстары санға алылған полар. Ол «Единая Россияның» кізізі полча, аннаңар ағаа регионның кирексіністерін арачылапчатхан пастағларны иртірерінде ӱлгӱ партиязы ағаа хабазар тіп сағынча поларлар.
Ниме амды? Амды, табығларнаң палғалыстығ суум-саам тохтап парғанда, аннаң андар чуртирға кирек. Наа табылған Хазна Думазы депутады Сергей Михайлович Сокол Хакасия чуртағҷыларына пирген молҷағларын прай толдырар, федеральнай синде республика кирексіністері ӱчӱн турызар тіп ізенербіс.
Автор :
Альберт Толмашов
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы