ПАСТАҒЫ ЧИҢІС - ПАСТАҒЫ ХААЛАҒ
24.09.2021
Хабарлар
Чайаачы марығ. Тӱрк пічиинің паза культуразының кӱннеріне чарыдылған «Минің тӧреен тілім» республика синіндегі марығ пӱӱл ӱзінӌі хати иртті. Ӱр ниместе аның чиңісчілеріне дипломнар паза сыйыхтар читірілген
Пу марығның тӧстегҷізі Хакасиядағы Чайаачылар туразы полча. Ол Хакасияның национальнай паза территориальнай политика министерствозы хабазиинаң ӱс чыл мының алнында чуртасха кирілген. Тӱрк пічиинің паза культуразының кӱннеріне чарыдылған республика синіндегі чайаачы марығның пӧгіні Хакас чирінде чурттығ чоннарның тіллерін ӱгренерге паза кічіг чир-суубыстың тархынын, культуразын істезерге кӧӧктірері полча. Аннаң пасха, ол республика чуртағҷыларының хоос произведениелер чайир оңдайларын тилідерге хабасча. Марығ араласчылары частары хоостыра ӱс группаа пӧліл парчалар. Пастағызынзар 14 - 20 частығлар кірчелер, ікінҷізінзер - 21 - 35 частығлар, ӱзінҷізінзер - 36 паза аннаң улуғ частығлар.
Чоохтирға кирек, «Минің тӧреен тілім» марығның темалары чыл сай алыстырылчалар. 2021 чыл Хакасияда Алыптығ нымах чылы тіп чарлал парған. Аның ӱчӱн Чайаачылар туразы пӱӱлгі марығны «Алыптығ нымахтардағы изен-минділестер паза алғастар» темаа чарыт саларға чаратхан паза ӱс номинация - «орыс тілінең пазылған литература тоғыстары», «хакас тілінең пазылған литература тоғыстары» паза «хоос ролик» - кӧр салған.
- Пӱӱл араласчылар саны ідӧк асхынах нимес полған. Чайаачы тоғыстар Боград, Шира, Ағбан пилтірі аймахтарынаң, Харатас городтаң ызылғаннар. Че Ағбан городтағылар паза Асхыс аймаандағылар иң ӧткін араласханнар, - искірген Хакасиядағы Чайаачылар туразының методизі Ирина Юсупова.
Амды чиңісчілерні адап пирерге чарир.
Орыс тілінең пасхан 14-20 частығ чииттер аразында пастағы орынға Аланго Сунчугашева турысхан. Ол Хакас национальнай гимназияның ӱгренҷізі. Ағаа республика мариина эссе пазарға воспитатель Лидия Михайловна Саражакова полысхан.
Орыс тілінең пасхан 21 -35 частығлар аразында чиңіс Хакас хазна университедінің студенті Светлана Акатоваа пирілген. Пуох категорияда, че хакас тілінең пасхан оол-хыстарның аразында иң артых чайаачы тоғыс Асхыс аймаандағы Кызлас аал чуртағҷызы Екатерина Марткачаковани пол парған. Ол «Минің тӧреен тілім» марыға кибеліс оңдайынаң пазылған алғастарны ысхан.
Ӱзінҷі категорияда чиңісчілер пол парғаннар: Асхыс аймаандағы Ус чул аалдағы М.Е.Кильчичаковтың адынаң ортымах школаның ӱгретчізі Виктория Николаевна Томочакова (ол хакас тілінең пасхан) паза Асхыс аймаандағы Калинин аалдағы ортымах школаның ӱгретчізі Галина Васильевна Боргоякова (ол орыс тілінең пасхан).
Пу категорияда ікінҷі орыннарға турысхан устарны ідӧк дипломнарнаң паза сыйыхтарнаң таныхтааннар. Олар - Боград аймаандағы Пушной аалдағы культура туразының тоғынҷызы Валерия Анатольевна Лыкум паза национальнай гимназия-интернаттың воспитательі Римма Сергеевна Боргоякова.
Римма Сергеевна республиканың пу ӱгредіг заведениезінде он азыра чыл тоғын парир. Ана олох син тус воспитатель кізі гимназияның Алғасчызы полча тиирге чарир. Анда иртірілчеткен полған на мероприятиені, ирбен отнаң ыстап, алғас сӧстерін читіріп, ол асча нооза. Улуғ аалҷыларны удурлирға киректелзе, Римма Сергеевна ӱгренҷілерінең хада сах андох тимде полча.
- Гимназияда минің позымның чайаачы ӧмем пар. Хызыҷахтарым теелбектенчелер, сарнапчалар. Піс аймах марығларға чӧрчебіс, сыйыхтығ орыннар алчабыс. Іди мағаа хакас чонның кибірлерінең кӧп тузаланарға килісче, ол санда алғастарнаң. Аннаңар «Минің тӧреен тілім» марыға ызылған «Чииттерге алғас» тоғызым ідӧк оой пазыл парған. Итсе, мин хоос произведениелер чайир марығда пастағызын на араластым, - ӱлескен чайаачы кӧңніліг воспитатель.
Тӱрк пічиинің паза культуразының кӱннеріне чарыдылған «Минің тӧреен тілім» республика синіндегі чайаачы марығның пу чылда хозылған «Хоос ролик» номинациязының чиңісчізі полыбысхан Ағбан городтағы 24 № школаның хакас тілі ӱгретчізі Олеся Илларионовна Улугбашева.
Сағынчабыс, мындағ марығлар Хакасияда чурттығ чоннарға улуғ туза ағылчалар. Оларға, устарын сынап кӧріп, чайаачы чолзар хаалағлар идерге чахсы оңдай пирілче нооза.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы