ЧИР ТАМААНЫҢ ТАҢНАСТЫҒ КӦРІМІ
24.09.2021
Хабарлар
Пайрам. Ӱӱҷіктегі ӧзімнерні чыып, аалдағы кізі кӱскӱде кӧмес ниик тыныбысча. Аймах ранеткалар, кабачоктар, яблах сенекте ӱӱллече, орада - банкалар толдыра
Кӱскӱнің ис-пайына махтанып, аал-городтарда кӧзідіглер иртірілче. Пу наада Таштыпта Ӱртӱн тойы ӱлӱкӱн таныхталған. Анда пӱӱл чахсы араластылар аалдағы ТОС-тар - «Наа чуртас», «Саяны», «Юбилейный», «Радуга», «Инициатива», «Октябрьский», «Дружба». Ідӧк Таштып аймааның ветераннар чӧбі, ипчілер чӧбі, Таштыптағы 16 № училище халых чуртазынаң оортах полбааннар. Чоон тыквалар, ачыныстығ сосхаҷахтар (яблахтаң иділген), хузуғастар, чахайахтар сілии... Харахтар аар-пеер ойласча. Че, пылтырғы чылларнаң тиңнестірзе, араласчылар саны асхынах.
«Саяны» ТОС-наң устапчатхан Круговых сӧбірезі сіліг хакас кип-азаана чазан салтыр. Дмитрий паза Людмила тӧрт пала ӧскірчелер, пос киреенең айғасчалар, халых чуртазында сыбыра араласчалар. «Саяны» ТОС 2019 чылда тӧстелген, андар Таштып аалның наа орамалары кірче - Магистральнай, Мир, Коммунальнай, Горнай, С.Майнагашевтің адынаң, А.Матеровтың адынаң, Г.П.Шулбаевтің адынаң, Таштыпскай. Пу се кизіре тағда орныхчалар, андартын прай аал чахсы кӧрінче. Пӧзіктегі наа туралар, олған площадказы харах ӧріндірчелер.
Дмитрий Круговых чоохтапча:
- Пӱӱл пістің ТОС-ты юридическай лицоға айландырарынңа тоғыс апарылча. Анзы хазнадаң аймах полызығ алар оңдай пирер. Олған площадказын аал чӧбі пӱдір пирген, піс, чуртағңылар, тізең, ойнаҷаң ниме-нооны турғызарға, оларны сырлирға полысхабыс. Часхызын сӧп-сап чығабыс, пасха ТОС-тарнаң волейбол мариин иртіргебіс. Халых чуртазында аралазарға маң чох таа полза, сӧбіренең сіренчебіс, айғасчабыс.
Чыылысхан чонны ӧтіг ӱннерінең, хайхастығ теелбектерінең Таштыптағы культура туразының артисттері ӧріндіргеннер. Пандемияның ӱчӱн оларның концерттері тасхар иртчелер. Анаң марығ хоостыра кӧзідіг араласчылары аразында иң чахсылары таллалған. Таштыптағы 16 № училище паза «Наа чуртас» ТОС чиңісчілер пол парғаннар. Оларға даа, пасхазына даа дипломнар паза сыйыхтар читірілген.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы