«ТЕРЕМОККА» АХЧАЛЫҒ ПОЛЫЗЫҒ ПИРІЛЕР
29.09.2021
Хабарлар
Сыныхтағлығ чорых. Хакасия пазы Валентин Коновалов пу кӱннерде «Теремок» республиканың тура-интернадының тоғызын сыныхтаан
ПАНДЕМИЯ ТУЗЫНДА ПРАЙ УЧРЕЖДЕНИЕЛЕРНІҢ ТОҒЫЗЫНА АЛЫЗЫҒЛАР КИРІЛГЕН. ОЛАРНЫҢ ӦӦН ПӦГІНІ ЧОН АРАЗЫНДА ЧУҒЫНӋАХ АҒЫРЫҒНЫ ТАРАТПАЗЫ ПОЛҒАН. РЕСПУБЛИКАНЫҢ ОЛҒАН ТУРАЗЫ ДАА АННАҢ ХЫЙА ТУРБААН ТИИРГЕ ЧАРИР. ӰР НИМЕСТЕ АНЫҢ ТОҒЫНӋЫЛАРЫ, КАРАНТИНГЕ ПАРЫБЫЗЫП, ІКІ НЕДЕЛЯ, ИБЗЕР НАНМИН, ТОҒЫСТА ЧУРТАПТЫРЛАР. АМДЫ «ТЕРЕМОК» КӰНӦРТЕ АНДА ХАЗИИН ТЫЫТЧАТХАН ОЛҒАННАРҒА ПАЗОХ ІЗИИН АЗАРҒА ТИМНЕНЧЕ. ПӰӰНГІ КӰНДЕ, ТУРА-ИНТЕРНАТ ПРАЙ КӰЗІНЕҢ ТОҒЫНАР ӰЧӰН, АЙМАХ ПӦЛІКТЕРДЕ ТЫХТАҒ ПАЗА ДЕЗИНФЕКЦИЯ ТОҒЫСТАРЫ АПАРЫЛЧА.
Комиссия чыылии. МЧС-тың Хакасияча Оӧн управлениезінде республиканың сағыбаан саайлар паза ӧрттер полдыртпазынҷа паза оларның салтарларын чох идерінҷе комиссиязының чыылии ирткен
КӰСКӰ ХОРҒЫС ЧОХ ИРТСІН
Чыылығның тоғызын апарғаннар Хакасия пазының орынҷызы Юрий Курлаев паза МЧС-тың Хакасияча ГУ-зының пастығы Александр Мулл.
Хайди искірген Юрий Курлаев, комиссияның теестегі чыылииның ӱзӱриине илееде сурығ сығарылған. Кӱскӱ-хысхаа тимненер тоғыстарны узарадарға кирек. Орттер сығарынаң хорғыс чіт парбаан, аннаңар муниципалитеттер профилактика тоғызын чахсы апарзыннар. Шира аймаандағы Коммунар посёлокта хайдағ хорғыстар сыхчатханын энергетика компаниялары сыныхтағда тутсыннар. Тоғынҷыларны хорғыс чох тоғынар оңдайларға ӱгредерге кирек.
Итсе, амға теере улуғ тоғыс толдырылған, че муниципальнай пӱдістерге ам даа кӧп тоғынарға кирек. Мының алнында турғызылған пӧгіннер чахсы толдырылбааннар. Сентябрьға теере прай тоғыстарны тоос салар пӧгін турғызылған. Мында муниципалитеттернің тоғызы чахсы кӧрінминче, ӧӧнінде ӧрттердең тоғыр служба ла прай тоғысты апарча. Ахча позыдылча, муниципальнай пӱдістер счёттары чабыл парғанына сылтанчалар, андағ нимелерге сылтанмин, топливоны, техниканы тимнирге кирек.
Хакас гидрометцентрінің директоры Вагиф Гусейновтың искіриинең, республиканың алтынзархы паза кидеркі чирлерінде хар чаап парған. Приисковай посёлокта харның халыны 63 сантиметрге читче. Октябрьның пастағы 10 кӱнінде хараазын 3 - 8 градус чылығ, кӱнӧрте 5 - 10 градус полар, час хар чаар. Ікінҷі 10 кӱнінде хараазын 2-3 градус соох, кӱнӧрте 3 - 8 градус чылығ турар, улуғ нимес наңмыр, хар чаар. Ӱзінҷі 10 кӱнінде Хакасиязар чылығ кӱннер пазох айланар.
МЧС-тың Хакасияҷа Оӧн управлениезі пастығының орынҷызы Андрей Якуниннің чооғынаң, пӱӱл ӧрттерде ӱрееннернің саны ӧс парған. Оӧнінде чурттар кӧйчелер, че прай ӧрттернің 60 проценті сӧп-сап паза хуруғ от кӧйчеткеніне килісче. Город-аалларда сӧп-сапты анда-мында тӧгібісчелер, постарының чирлерін арығлабинчалар. Чоннаң тоғынарға кирек, ааллар ибіре ӧрт иртірбес полосалар тартарға, аның чалбаа 10 метрдең асхынах полбазын.
Пу кӧстегҷе Асхыс, Пии аймахтарында чахсы тоғынчалар. Орт ӱзірчеңнерге суғ алҷаң орыннар тимнирге кирек.
Хайди чыылығда искірген Хакасияның ГО, ЧС паза ПБ управление пастығының орынҷызы Виталий Петрук, республиканың чазыларында пӱӱл 156 ӧрт ӱзірілген (пылтыр - 216), хуруғ ӧзімнерде 214 ӧрт сыххан (пылтыр - 203). Иң кӧп андағ ӧрт Ағбан пилтірі, Асхыс аймахтарында, Саяногорскта, Харатаста таныхталған. Муниципалитеттерге ахча ызылча, аал чӧптеріне аннаң тӱзімніг тузаланарға кирек. Управление тоғынҷылары сыныхтағнаң чӧрчелер, методика оңдайынаң полызығ пирчелер. Ааллар ибіре ӧрт иртірбес полосаларны 15 октябрьға теере тарт саларға кирек.
Хакасияның чир-чайаан ис-пайы паза экология министрі Владимир Лебедевтің чооғынаң, пӱӱл региондағы арығларда 9 ӧрт сыххан. Автоном учреждениелері арығларҷа патрульнаң чӧрчелер, авиация полызиинаң даа арығлар хадағда тудылча. Сыныхтағ оңдайынаң 1871 рейд иртірілген, ӧрт сығарбас правилоларны сайбааннарға протоколлар пазылған. Министерство, федеральнай органнарнаң палғалыс тудып, искіріглернең алысча. Хакасияның 39 аалы арығларға чапсыра орныхча, оларға анда сыххан ӧрттердең улуғ хорғыс полар.
Чыылығда ідӧк чоох парған ЖКХ паза энергетика объекттерінде хысхаа тимненчеткен туста саайлар полдыртпас сурығдаңар. Чуртағҷыларны хорғыс чох оңдайларға ӱгредердеңер искірген Виталий Петрук. Аның чооғынаң, пу чылның 8 айында 143800 кізі андағ ӱгредіг ирткен. Чонға памяткалар тарадылған, марығлар иртірілген, олғаннарға хорғыс чох ай чарлалған. Ӱгредіг мыннаң тоозылбинча, ол тӧреміл узарадылча.
Сағыбаан саайларда алай ӧрттерде хыйалға кіргеннерге психологтың полызиин пирердеңер паза тиксі Россиядағы «Волонтёры-медики» халых пірігізінең палғалыс тудардаңар искірген Хакасияның ӧрттер ӱзірчең службазының психологы Лидия Якунина.
Хакасияда тілег-арачылағ халых службазын тӧстирдеңер чоох тутхан МЧС-тың Хакасияча ГУ-зының пӧлік пастығы Сергей Миначёв. Аның искіриинең, амды республиканың тілег-арачылағ отряды Саяногорскта орныхча. Анда пӧзік тимнегліг спортсменнер тоғынчалар, ағаа хоза 74 кізі тимненіс ирткен. Приисковай посёлокта андағох отряд тӧстелер, анда туризм кирее тиліпчеткенде, арачылағчылар хайди даа поларға кирек. Оларны техниканаң тиріндірерге кирек полар, ідӧк ахча сурии пӧгілгелек.
Чыылығның тоғызын тоозып, Юрий Курлаев таныхтаан:
- Отряд тӧстиріне ікі миллион салковай позыдылар. Чахсы, хаҷан арачылағҷы поларға кӧп кізі сағыс тутча. Прай сурығлар пӧгілер, тёстег тоғызын право саринҷа иптирге кирек. Арачылағҷылар отряды Саяногорскта орныхча, чағынғы туста Приисковайда отряд тёстирбiс. Анда туризм чахсы тиліпче.
Город-ааллардағы сӧп-саптаңар чоохтаза, піс 7 октябрьда (Владимир Путиннің тӧреен кӱні) город-аалларны арығлир субботник чарлабызар пастағнаң сығалар. Ізенчем, прай тоғыстар толдырыл парар. Піс муниципальнай пӱдістерні критикаа тартпинчабыс, олар постарының тоғызын толдырзыннар. Ахчанаң сидіксіністер полза даа, тоғысты чахсы апарарға кирек. Орттерні ӱзірерінең пасха, профилактика тоғызын чахсы апарыңар. Прайзына алғыс!
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде