ІҶЕ-ПАБА ПАЛАА КӦЗІДІМ ПОЛЧА
29.09.2021
Хабарлар
Тоғазығ. Пӱ кӱннерде Хакасия правительствозы туразында республика пазы Валентин Коновалов Россия президентінің пала праволарынҷа уполномоченнайының Пабалар чӧбінің устағҷызы Андрей Коченовнаң тоғасхан
Тоғазығда Хакасия пазының орынҷызы Ольга Пономарева, республиканың пала праволарынҷа уполномоченнайы Ирина Ауль паза Хакасияның ӱгредіг паза наука министрі Лариса Гимазутина араласханнар. Тоғазығ чылығ чоохтазығда паза чалахай кӧңніліг ирткен.
- Сірернің тоғызыңар уғаа танығлығ паза нандырығлығ. Піс Хакасияда сӧбірелернің чуртазына хайығ салчабыс, олар чахсы паза часкалығ чурғир ӱчӱн хабазарға кӱстенчебіс. Палалар хызылбин паза чурғасха хорғыс чох оңдайларда ӧзерге кирек. Чахсы тӧл ӧскірер ӱчӱн, пик паза ынағ сӧбірелер поларына оңдайлар тӧстирге сіренчебіс. Мыннаң мындар, хада-пірге тоғынып, чахсы салтарларға килеріне ізенчем, - теен Хакасия пазы Валентин Коновалов.
Андрей Коченов тоғызынаңар паза пӧгіннерінеңер кӧп чоохтаан. Ідӧк Пабалар чӧбінің проекттерінеңер паза пасха регионнарнаң, хайдағ оңдайнаң палғалызып, апарылчатхан тоғыстардаңар чарытхан. Мыннаң мындар Хакасиянаң ідӧк хада-пірге тоғынарға сағынчатханнаңар сағыстарынаң ӱлескен. Пабалар чӧбі прай Россиядағы ӧткін, паарсах чӱректіг иреннерні пабалар нандырығлығ поларына хайығ айландырарға паза пістің палаларға кӧріндіре полызығ пирер сурығны пӧгерге пӧгін турғысча. Пабалар чӧбінің устағҷызы искірген, пу чағында Россияда Паба кӱнін таныхтирдаңар чарадығда президент хол салыбызар.
- Пу кӱннерде Паба кӱні хазнаның ӱлӱкӱннеріне киріл парар. Аны октябрьның ӱзінҷі позырағында таныхтирдаңар чӧптескебіс. Андағ ӱлӱкӱн кирілзе, пабаларның нандырығлығ тудынызын па за сӧбірее хайиин тилідеріне туза полар, - сағызынаң ӱлескен Андрей Коченов.
Валентин Олегович тее паза Андрей Юрьевич тее кӧп палалығ пабалар, аннаңар оларны ӧскірердеңер паза хайди сӧбіре чуртазын чахсыландырардаңар полғаны ла чахсы сизінче. Кӧзідімге, олғаннарның хорғыс чох чуртазына оңдайлар тӧстирінде паза оларға читірілчеткен искіріглерні хорғыс чох идерінде хайдағ тоғыстар апарарға киректелчеткеннеңер сағыстарынаң ӱлескеннер. Пабалар чӧбінде «Арачыланыс лигазы» тӧстелген, андар интернет индустриязында істенчеткен кізілер кірче. Оларның пӧгіннерінің пірсі - ол палаларға читірілчеткен искіріглерні сыныхтағда тудары. Ідӧк Пабалар чӧбінің устағҷызы таныхтаан, пістің хазнада кибірліг, іче-паба ӧскірчеткен сӧбірелер аарласта. Чон андағ сӧбірелерде чуртирға кӱстенче, чииттерге кибірліг хоныхтар тӧстирінде кӧзідім полча оларның іче-пабалары. Пасха хазналарда хоныхтар паза сӧбірелер тӧстелчеткен сурығлар «ай-пораан» тиирге чарир. Аннаңар полған на кізі олған-узахха, чииттерге кибірліг аарласты чахсы читірерге кирек. Анда-да хазнада турыстығ тӧл ӧзер. Ідӧк Андрей Коченов Пабалар чӧбі хабазиинаң Хакасиядағы 20-че палаа Балтика талайынзар тынанарға парарға оңдай пирілердеңер искірген.
Тоғазығ соонда Хакасия пазы Валентин Коновалов Пабалар чӧбінің устағҷызы Андрей Коченовха сыйых читірген. Чоныбыстың хоозынаң чазалған улуғ нимес абдыра, хайда хакас кибірліг ниме-ноо тимнелген, Чир-суубыстағы чейлер, торымнар, мӧӧт паза Хакасияда сығарылчатхан конфеттер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде