ӰРТӰН ТОЙЫ - 3 ОКТЯБРЬДА
29.09.2021
Хабарлар
Штаб чыылии. Коронавирус чуғынҷах ағырығ тарапчатханынаң тоғыр кӱрезерінҷе штабтың теестегі чыылии ирткен
Ирткен суткадағы танығлардаң, республикада коронавирус чуғынҷах ағырығнаң 117 кізі ағырыбысхан. Хазыхтанып алғаннарның саны 33 кізее тиңнелче. Имҷілер хайиинда 3700 чуртағҷы, олар ағырчатхан кізінең палғалыста полғаннар. Ибде наа чуғынҷах ағырығдаң имненчеткеннернің саны 2031 кізее чит парған, имнег тураларында - 766 чуртағҷы, ИВЛ-да - 20 кізі. Чыл пасталғаннаң Хакасияда 20893 кізі коронавирус ағырығны чухтырып алған. Чуғынҷах ағырығ тарапчатханының коэффициент 4 кӱнге - 1,0, 7 кӱнге -1,1.
Пӱӱнгі кӱнде республикада коронавирустаң тоғыр вакцинаның пастағы чардығын 174488 чуртағҷы турғыстырып алған, ікінҷі чардығын - 152451 кізі.
Хайди искірген Хакасияның хазых хайраллаҷаң министрінің тоғызын толдырчатхан Александр Стреленко, республикада эпидемиология киреенең сидік. Аннаңар имнег учреждениелерінде коронавируснаң ағырчатхан кізілерні чатырҷаң орғаннар хозарынҷа тоғыс апарылча. Харатастағы пала тапчаң туразар 27 сентябрьдаң ипчілерні чатырарға тохтадыбысханнар. Халғанҷы пациент ибзер парыбысса, анда хатабох ковид пӧлии азылар. Ирткен неделяда Г.Я.Ремишевскаяның адынаң республиканың имнег туразында, Саяногорсктағы аймахтар аразындағы паза республикадағы чуғынҷах ағырығлар имнег тураларында наа чуғынҷахнаң ағырчатханнарға орғаннар хозылған. Пӱӱнгі кӱнде имнег учреждениелерінде коронавируснаң ағырчатхан кізілерні чатырчаң 1006 орған тӧстелген, оларның 843-інде кізі чатча. Андағ оңдайнаң, имнег тураларында 16 % орған пос. Мыннаң мындар наа орыннар тӧстирі республикадағы эпидемиология киреенең палғалыстығ полар.
- Чонның пӱкӱлее иммунитеді тӧстелер ӱчӱн, республика чурғағҷыларының 80 %о-і прививка турғыстырыбызарға кирек. Пістің, тізең, 53,7 % прививка турғыстырып алған. Тиксі республикада 322 муң чурғағчы вакцинация иртібіссе, чонның коронавирусха пӱкӱлее иммунитет тӧстел парар, - искірген Александр Стреленко.
Ідӧк оперштабта искірілген, Россия Федерациязында пічікке кирілген тӧрт вакцинаның прайзы республиканың имнег организацияларында пар. Вакцинация иртерге сағынчатхан кізі, орындағы имнег туразынзар айланып, прививка турғыстырып алар. Хайди таныхтаан Александр Стреленко, пӱӱнгі кӱнде COVID-19-таң арачыланҷаң оңдай - ол вакцинация иртері, маска режиміне паза дистанцияа тудынары. Ковидтең тоғыр прививканы турғыстырғаннарға ідӧк тымо-тусхахтаң тоғыр вакцинация киректелче. Ол ікі вакцинаның турғыстырҷаң аразы пір ай поларға кирек. Амғы туста республикада тымо-тусхахтаң прививканы 40 муң азыра чуртағҷы турғыстырып алған.
Ідӧк оперштабта Ӱртӱн тойын иртірердеңер чоох парған. Хакас чонның чир тамаа пайрамын паза родтар чӧрімін тилідерге полысчатхан ӱлӱкӱн 3 октябрьда таныхталар. Аны республика ипподромында кӧп кізі чыылыспин паза санитар-эпидемиология оңдайларына тудынып иртірерге чӧптес салғаннар. Ӱлӱкӱнге килген чон ипподромзар кірер алнында вакцинация иртібіскеннеңер алай коронавируснаң ағырғаннаңар пічік кӧзідерге кирек. Аал хонии ярмарказы республиканың аал хонии рыногында иртер тіп искірілген.
- Аарлығ чир-суғҷылар, Роспотребнадзорның чахығларын прай толдырарға сурынчам. Постарыңның паза чағыннарыңның хазиина хомай хайарға чарабас. Піс прайзы нандырығлығ тудынчатханынаң палғалыстығ сидік санитар-эпидемиология оңдайларынаң сығып алары, - таныхтаан республика пазы Валентин Коновалов.
Автор :
Наталья ЧЕБОДАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде