ПІС - ПІР, КӰСТІГ ПАЗА ПИК ЧОН
24.09.2021
Хабарлар
Айланыс. Хакасияның Улуғлар чӧбінің президиумы тиксі Россияның чонын санға аларына удур чоныбыссар айланча
«Аарлығ чир-суғҷылар! Республиканың хакас чонның Улуғлар чӧбі сірерзер улуғ сурыныснаң айланча паза чағын аларына ізенче.
2021 чылның чарыс айының 15-ҷі кӱнінең кічіг хырлас айының 14-ҷі кӱніне теере тиксі Россияның чонын санға аларында Хакас Республика аралазардаңар чоох парча. Пу уғаа кирек мероприятие, аның салтарларынҷа федеральнай кін полчатхан киректердеңер тиксі искірігні алчатханнаңар, ол тузазынаң табығлардаң халбинча. Санға алғанының салтарларынаң уғаа кирек чарадығлар алылча.
Хомзынысха, халғанҷызын чонны санға алғанында, 2010 чылда, республикада хакастарның саны хызырылғаны таныхталған. Уғаа хомзыныстығ, че олох туста сынны кӧзітпинчеткен саннар.
Хакастар кӧп пол парғаннаңар прай ниме чоохтапча. Чон саны ӧсче паза чахсы тиліпче. Хазнанаң хада оой нимес тустарны тобырып, пістің чоныбыс кізілері туралар пӱдірчелер, сӧбірелер тӧстепчелер, палалар ӧскірчелер, ӱгренчелер, прай профессия киректерінде тоғынчалар, искусствонаң, науканаң, политиканаң, пос киреенең айғасчалар паза чуртаста ӧткін тудынчалар. Прай ол чахсы кӧрінче.
Пӱӱнгі кӱнде пістің чонға пір ле ниме харығ полча - пос «квартираларынҷа» тараза халар кӧңні. Ол сылтағнан 2010 чылда пістің чирібісте кӧп хаас, сағай, хызыл, чулым санға алылған, хакастар саны, тізең, хызырылған.
Аарлығ чир-суғҷылар, піс полған на чонны, сӧӧкті паза алынҷа кізіні улуғлапчабыс. Піс сірер тархынны хайраллапчатхан ӱчӱн, ӧбекелерні аарлапчатхан ӱчӱн, пос чиріне хынчатхан ӱчӱн ӧрінчебіс паза полызарға тимдебіс.
Че, ниме дее полза, Хакас Республиканың адын федеральнай синде пиктир ӱчӱн, хакас чоны хайди тиліпчеткенін паза ӧсчеткенін кӧзіт пирер ӱчӱн, піс сірерні пірігерге сурынчабыс! Сурынчабыс, чонны санға аларында «национальность» графада полғаныбысха ла хакаспын тіп кӧзідерге, хаас, сағай, шор, хызыл нимес... Андағ оңдайнаң піс хакас чон парын паза кӱс алынчатханын кӧзідербіс.
Чоныбыс чітчеткен алай ас халған чоннар санына кирілбеске кирек, іди полза, пісті санға аларға, тилідерге паза піске хабазарға ынабастар.
Піс пір, кӱстіг паза пик чон поларға кирекпіс. Ол кӧстеге хаалағларның пірсі - статистика саннарын утары. Олар сын киректерні таныхтирға паза хакастар саны хозылчатханын паза мында тохтирға сағынминчатханын кӧзідерге кирек».
Автор :
Хакас чонның Улуғлар чӧбі президиумы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы