ХАКАСИЯНЫҢ ТУРИЗМНІ ТИЛІТЧЕҢ СТРАТЕГИЯЗЫ ПАР
06.10.2021
Хабарлар
Чыылығ. Пу кӱннерде Хакасия правительствозының туризмӌе координационнай чӧбінің чыылии иртті
Пу мероприятие ікі чардыхтаң пӱткен. Иң пастап туризм сферазында істенчеткен улусты профессиональнай ӱлӱкӱннең алғыстааннар. Ол 27 сентябрьда таныхталча. Республика пазы Валентин Коновалов, чыылған чонны алғыстап, оларға тоғыста пӧзік чидіглерге чидерге, хазых, часкалығ поларға алғаан. Хакасия пазының алғыстас пічиине турысханнарның санында «Суғның кӱзі» туроператор» ООО-ның директоры Елена Гопинаны, Хакасияның экономика тилізі министерствозының туризмҷе департаментінің устағҷызы Ольга Кузьминаны, Туризмҷе хабарлар кінінің (ТИЦ) тоғынҷылары Павел Чураковнаң Елена Павлованы адирға кирек.
Чыылығның ікінҷі чардығы улуғ нимес сан пиріснең азылған. Аны Хакасия пазы Валентин Коновалов иткен. Хайди таныхтаан Валентин Олегович, туризм сферазында пістің республиканың чидіглері илееде. 2021 чылда республикада наа турист маршруттары азылғаннар. Кӧзідімге, чорыхчыларның Бородинодағы хуйуда, кӱргеннер хазылчатхан орыннарда пол килер оңдай пар. Пастағы объект тыхтағ тоғыстары соонда азылған. Ідӧк аалҷыларны Сойан-Сус ГЭС-та сағыпчалар. Таштып паза Асхыс аймахтарында глэмпингтер турғызылғаннар.
Пӱӱл республикада пастағызын на «Сибирь. ПРИтяжение» чоннар аразындағы турист форумы ирткен. Форумның ӧӧн салтары - инвестиция чӧптезіглері иділгені. Аның тиксі сині - 4 миллиард 246 миллион салковай. Хакасияда алты турист кластері тӧстелче: «Приисковай», «Кимдегі хаалха», «Карлов хыстым», «Хан тигір алты» паза «Тағлығ Хакасия», «Ширадағы кӧллер». Пу тоғыс аннаң андар узарадылар. Амғы туста пістің республиканы Россия синінде чахсы таныпчалар. Тиктең нимес TourDom.ru саблығ портал Хакасияны туризм иң чахсы тиліпчеткен хазнаның ӱс регионы санына кир салған. Республика правительствозының пӧгіннері кӧп, оларның ӧӧні
- Хакас Республиканың 2035 чылға теере туризмні тилітчең стратегиязын чуртасха кирері. Чооғының халғанҷызында Валентин Олегович чыылған чонзар айланып теен:
- Туризм проекттерінде ӧткін араласчатхан министерство-ведомстволарға, город-аймахтар пастарына, идінҷектерге алғызым читірчем. Ізенчем, хада-пірге тудынып, піс Россияның турист сферазының алнында парчатхан регионнарының санында поларбыс. Санапчам, пу пӧгінге чидерге Хакасияның прай оңдайлары пар.
Сан пиріс соонда чыылығ араласчыларын Хакас Республиканың 2035 чылға теере туризмні тилітчең стратегиязы проектінең таныстырғаннар. Аны Хакасияның экономика тилізі министерствозы тимнептір. Пастағы искірігнең республика пазының орынҷызы Ирина Войнова сыххан. Ол хысхаҷахти Хакасияның турист оңдайларынаңар, пӧгіннерінеңер, турист кӧрімнерінеңер чоохтап пирген. Оңдайлардаңар чоохтаза, пістің республикада чоннар аразындағы пір аэропорт, культура ис-пайының 1050 объекті, 24 музей, 5 санаторий, 16 чир-чайаандағы ӧнетін хадарылчатхан чир, 100 гостиница (анда 300 муң артиинаң номер) пар. Тоғысты 8 туроператор апарча. Че Хакасияда турист паза инженер инфраструктуразы тың на чахсы нимес. Шира кӧллерінде идінҷектернің 70 %-і чарадығ чох тоғынчаттыр. Чорыхчылар республиказар ӧӧнінде чайғызын на тынанарға килчелер. Кізілерге самолеттығ учуғары аарлыға тур парча. Пу читпестер туризм сферазын тилідерге харығ полчалар. Ағырсымнығ сурығларны пӧгіп, Хакасия правительствозы турист кластерлерін тӧстепче, инвесторларны республиказар тартча. Чапсых орыннарзар парчатхан чоллар улуғ хайығда. Ӱлгӱлер идінҷектерге гранттар мариин иртіріп, ӱгредіге ызып хабасчалар.
Ирина Ивановнаның искіриинің ӧӧн чардығы турист кӧрімнеріне чарыдылған. Пістің республикада культура-чарыдығлығ, ӧткін хайыныстығ, специализация турист кӧрімнерін тилідерге пӧгінчелер. Пастағызынзар этническай, экология туризмі кірчеттір. Хайди таныхтаан Ирина Войнова, чорыхчылар национальнай ӱлӱкӱннерде полып аларға, хамнарнаң чоох алызарға сағынчалар. Чапсых орыннардаң иң улуғ кирексіністе Оғлах тағ полтыр. Туристтернің кӧңніне Бородинодағы хуйу, Иванов кӧллері, тӧстелчеткен Маран кӧл чир-чайаан паркы хайди даа кірер. Хакасияда ӧткін хайыныстығ туризмге прай оңдайлар пар. Пеер хуйуларҷа чӧрері, тағ индіре чылары, снегоходнаң ойладары, спорт паза суғ туризмі кірче.
Специализация туризмі олғаннарға, хазии уйаннарға, фермерлерге кӧріл парған. Пістің республикада аалдағы туризмні тилідерлер. 2022 чылдаң Хакасияның аал хонии паза ас-тамах министерствозы аннаң айғазарға сағынчатхан фермерлерге гранттар мариин иртірер.
Ідӧк чыылығ тузында республиканың экономика тилізі министрі Виктор Богушевич, культура министрі Светлана Окольникова, транспорт паза чол хонии министрі Дмитрий Василиади, ТИЦ-тың устағҷызы Ирина Дерюшева, «Суғның кӱзі» туроператор» ООО-ның директоры Елена Гопина чоох тутханнар. Виктор Богушевич чыылған чонны «Аалңынын картазы» турист продуктынаң таныстырған. Аның полызиинаң чапсых орыннарзар билеттерні ниик паанаң садызып аларға чарир. Картаны ТИЦ-та тикке пирчелер. Культура министрі Светлана Окольникованың искірии национальнай ӱлӱкӱннерге паза музейлерге чарыдылған. Светлана Анатольевнаның таниинаң, иң кӧп аалңы «Хуртуйах тас» музейде полчаттыр. Улуғ алызығлар «Обекелер чолы» объектті сағыпча. Пазағы чылда анда кроманьонецтің чурты пӱдірілер. «Салбых чазызының пурунғы кӱргеннері» музейде, тізең, аалҷылар кіні полар.
Хакас Республиканың 2035 чылға теере туризмні тилітчең стратегиязы хоостыра ӱзӱріглер ам даа парар. Сағыстарынаң муниципалитеттер ӱлезерлер. Чыл тоозылғанңа ол алыл парарға кирек.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы