СИДІКСІНІСТЕР ПОЛЗА, ПОЛЫЗЫҒ ПИРІЛЕР РЕСПУБЛИКА СИНІНДЕ
06.10.2021
Хабарлар
Селекторӌа чыылығ. Хакасия пазы Валентин Коновалов хысхаа тимненіс хайди парчатхан сурығӌа муниципальнай пӱдістернең селектор пастыра теестегі чыылығ иртірген
Азынада чоохтаза, пу чыылығ уғаа табырах иртіп парған. Валентин Коновалов муниципалитеттер устағҷыларынзар прай сурығлардаңар, сидіксіністердеңер, чидіглердеңер, сӧӧ тартпин, искірерге айланған.
Хакасияның пӱдіріг паза ЖКХ министрі Валерий Келин республикада хысхаа тимненіс тоғыстары хайди парчатханнаңар искірген. Аның чооғынаң, министерствоның «ізіг линия» телефонынңа квартираларға чылығ пирер сурығҷа 105 айланыс кірген. Іди Ағбаннаң 62 чуртағҷы айланған, Харатастаң - 36. Кізілер тураларға чылығ тузында алай читкіҷе нимес пирілчеткеніне хоптанчалар. Ағбанның ортызындағы паза алтынзархы сариндағы чурттарға чылығ кизекти пирілче.
Республиканың чурт фонды хысхаа 99 процентке тимде. Бюджеттең хысхаа тимненер тоғыстар толдырарына муниципалитеттерге 128 миллион салковай позыдылған, тоғыстар апарарға 97 миллион салковайға контракттар иділген. Андағ чӧптезіглер ам даа иділбеен Сорығда, Асхыста, Тӧӧ пазында, Боградта, Сарығ хаста паза даа пасхазында. Читпестерні олар октябрьда тӱзет саларға пӧгінчелер.
Хакасияның прай город-аалларында тураларға чылығ пиріп пастабысханнар. Котельнайларда, сетьтернің сайбалған участоктарында тыхтағ тоғыстары узарадылча. Шира аймаандағы Жемчужнай поселокта котельнайға паза чылығ пирҷең сетьке тыхтағ киректелче. 1 октябрьдаң андағы санаторийзер олғаннар кіріп пастабысханнар, аннаңар тоғыстарны табырах тоос саларға кирек. Котельнайның тоғынңылары аттестация иртчелер.
Пуох аймахтың Тустығ кӧл аалдағы котельнайның туразына тыхтағ киректелче. Анда тоғыстарны 15 октябрьға толдыр салардаңар ізендірчелер. Тоғынҷыларға аттестация 8 октябрьда иртірілер. Ідӧк читпестер таныхталчалар Асхыс, Боград ааллардағы котельнайларда. Боградта Ростехнадзор органнары 20 сайбағ ілезіне сығарғаннар. Таштыпта чылығ пирҷең сетьтің сайбалған участогын тыхтап салғаннар.
Харатаста чылығ пирҷен сетьтерні иптепчелер, андар ам Ағбандағы ТЭЦ-таң чылығ пирілче, аннаңар анда-мында сығысчатхан сайбағларны тӱзедерге килісче.
Республиканың котельнайларында 72,7 муң тонна хара тас пилетелген. Анзын чахсаа санирға кирек. Хысхаа тимненіс паспорттарын алғалахтар Сорығдағы, Асхыс паза Хубачар ааллардағы котельнайлар. Октябрьда Ростехнадзор Сорығны сыныхтап пастир.
САН ПИРІСТЕР
Шира аймаанда тимненіс тоғыстары хайди апарылчатханнаңар сан пиріс тутхан аймах пазының орынҷызы Евгений Цико. Аның чооғынаң, Жемчужнай посёлокта санаторийге паза тураларға чылығ пирілче, сидіксініс чоғыл, сайбағлар тӱзеділген. Тустығ кӧл аалда котельнай сыныхталған, тыхтағ тоғыстары толдырылған. Хысхаа тимненіс паспортын аларға ол тимде. Ширадағы котельнайда пилетелген хара тас 9 кӱнге чидер, андар топливо кӱннің сай тартылча.
Асхыс аймаа пазының орынҷызы Николай Асочаковтың искіриинең, аймахтағы тураларға чылығ пирілче, прай объекттер олаңай режимде тоғынчалар. Асхыста теплотрасса чылығлалған, Тӧӧ пазында тыхтағ тоғыстары 15 октябрьға теере толдырыл парар. Чуртағҷылардаң кірчеткен хоптарҷа сыныхтағлар иртірілче, че оларның саны кӧп нимес. Котельнайларда хара тас читкіҷе.
Алтай аймааның пазы Татьяна Раменская командировкаа парыбыстыр, аның орнына сан пиріс тутхан аймах пазының пастағы орынҷызы Виктор Рудских. Хайди ол искірген, Хубачар аалда тураларға чылығ пирілче, объекттерде хара тас читкіҷе пилетелген. Аймах тыхтағ тоғыстары чағынғы туста толдырыл парар.
Боград аймаа пазының орынҷызы Елена Левакова аймахтың чурт-коммунальнай объекттері олаңай режимде тоғынчатханнаңар искірген. Ростехнадзор ілезіне сығарған читпестер тӱзеділчелер. Хара тас читкіҷе тимнелген, Бородино аалдағы котельнайда топливо 7 кӱнге чидер, че андар хара тас ам даа тартылча. Суғ пирңең сетьтерні тыхтирына контракт иділген.
Таштып аалда чылығ пирҷең сетьтің участогы сайбалған полған, амды аны тыхтап, ол орында асфальт тӧзелтір. Аннаңар искірген Таштып аймааның пазы Алексей Дьяченко. Аның чооғынаң, котельнайда 950 тонна хара тас пилетелген. 2 № школадағы котельнайның трубазы сайбалған, аны тых-тирына 1,5 миллион салковай киректелер, че труба ам даа тоғынча. Амды аны тыхтир смета тимнелче.
Хайди чоохтаан Харатас город пазының пастағы орынҷызы Виталий Кутахин, городха чылығ Ағбандағы ТЭЦ-таң пиріл сыххан. Аның сылтаанда сетьтерде анда-мында сайбағлар сығысча, чуртағҷылардаң хоптар кірче. Город хысхаа 95 процентке тимде, читпестер тӱзеділчелер, аймах сурығлар табырах пӧгілчелер. 9-ңы поселоктағы котельнай тоғынып пастабысхан.
Чыылығны тоозып, Валентин Коновалов муниципалитеттерге пӧгіннер турғысхан:
- Чуртағҷыларның хоптарынҷа табырах тоғыс апарыңар, устапчатхан компанияларнаң палғалыс тудыңар, прай тоғыстар тузында толдырылзын, квартираларда чылығ ползын. Ростехнадзор ілезіне сығарған читпестерні табырах тӱзедіңер. Хысхаа тимненіс паспорттарын аларын хайығда тудыңар, аны алар сурыныстар 15 октябрьға теере пиріл парарға кирек. Котельнайларға хара тас читкіҷе тартылчатханын сыныхтағда тудыңар. Хайдағ-да сидіксіністер сығысчатса, чазырбин, правительстваа, пӱдіріг паза ЖКХ министерствозына, сӧӧ тартпин, искіріңер. Сидіксіністіг сурығларны пӧгерге, читпестерні тӱзедерге полызарбыс.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы