ЧУРТАҒҶЫЛАРҒА ХОРҒЫС ПОЛБАЗЫН
22.10.2021
Хабарлар
Селекторҷа чыылығ. Хакасия пазы хысхаа тимненіс тоғыстары хайди толдырылчатханынӌа муниципалитеттер устағӌыларынаң видеоселектор пастыра чыылығ иртірген
ХОПТАР САНЫ ХЫЗЫРЫЛЧА
Чыылығның тоғызын пастап, Валентин Коновалов устағӌыларның хайиин алында пирілген чахығлар хайди толдырылчатханына айландырған. Аның чооғынаң, муниципальнай пӱдістердегі прай объекттер хысхаа тимненіс паспорттарын аларға сурыныстарны Ростехнадзорзар ам даа пиргелектер. Аннаңар амды устағӌыларның сан пирістерін истіп аларға кирек полар.
Хакасияның пӱдіріг паза чурт-коммунальнай хоных министрі Валерий Келин республикада ЖКХ объекттері хысхаа хайди тимнен салғаннаңар искірген. Хайди ол чоохтаан, республиканың соохтарға тимненізі 99 % тиңнелче. Министерствоның «ізіг линия» телефонынӌа чуртағӌылар квартираларға чылығ уйан пирілчеткенінӌе айланчалар, че халғанӌы туста андағ хоптар саны илееде хызырыл парған. Иң кӧп айланыс Харатастаң кірче.
Пӱӱл Харатасха чылығны Ағбандағы ТЭЦ пиріп пастапча. Че прай ла туралар ол сетьке кирілбеен. Чылығ чахсы пирілбинчеткен киректерӌе прокуратура, сыныхтағлар иртіріп, пыролығларны нандырыға тартча. Чылығ пирері пасталғаннаң сығара городта 18 сайбағ ілезіне сығарылған, андағ даа полза, киректер чахсы саринзар айланчатханы кӧрінче.
Республикадағы котельнайларда 59,4 муң тонна хара тас пилетелген. Аны садызарға кӧп ахча хорадылча, аннаңар предприятиелерге хара тасты, посредниктердең садыспин, разрезтердең кӧнізінең аларға кирек.
Коммунальнай объекттернің 85 % хысхаа тимненіс паспортын алып алған. Ам даа оларны аларға 35 сурыныс пирілген, пічіктер Ростехнадзорда кӧрілчелер. Министерство муниципалитеттердегі суғ, чылығ пирӌең сетьтер схемазын орталадар сурығларны сыныхтағда тутча.
ӰЗӰРІГЛЕР
Хайди искірген Алтай аймааның пазы Татьяна Раменская, аймахтағы прай ЖКХ объекттері хысхаа тимненіс паспорттарын алар сурыныстарны Ростехнадзорзар ызыбысханнар. Суғ, чылығ пирӌең сетьтер схемаларын орталадар тоғыс ам даа апарылча. Хубачардағы 5 № котельнайда тыхтағ тоғыстары толдырылча, андар насосты хырығ озаринаң ағылчалар, амды ол хырығдағы таможняны иртібістір.
Асхыс аймаа пазының орынӌызы Николай Асочаковнаң палғалыс тударға оң полбаан. Ол сан пиріс тудып пастабысса, селекторӌа палғалыс ӱзіл парчатхан, аннаңар Валентин Коновалов аймах пазына телефонӌа сан пиріс тударға чахығ пирген.
Харатастағы киректердеңер искірген город пазының пастағы орынӌызы Виталий Кутахин. Аның чооғынаң, городха чылығны Ағбандағы ТЭЦ пиріп пастабысханда, чуртағӌылардаң кӧп хоп кірген, че амды кирек чахсы саринзар айланча. Ирткен кӱнде ікі ле хоп кірген. Городтағы Центральнай котельнайдаң чылығ читкіӌе пирілбинче, аның кӱзі читпинче, аннаңар прай тураларны ТЭЦ-тың сетьтеріне хозарға кирек.
Саяногорсктың пазы Михаил Валовтың искіриинең, городтың ЖКХ объекттері хысхаа тимненіс паспорттарын тимнир тоғыстарны тоос парирлар, чағынғы туста оларны Ростехнадзорзар пирібізерлер. Хакасияның пазы ағаа городта истіг оңдайлар тӧстирінӌе тоғыстар хайди толдырылчатханнаңар сурығ пирген. Михаил Валовтың чооғынаң, ӱс площадьта тоғыстар апарылча. Анда кічіг архитектура пӱдіріглері турғызылча, амды брусчатка тӧзирге, одырчыхтар, чарытхы турғызарға кирек. Подрядчикнең контракт 20 ноябрьға теере узарадылған. Читі тура аразы иптелген, оларда ідӧк одырчыхтар ла турғызары халған.
Ағбан город администрациязының ЖКХ пӧлиинің советнигі Алёна Суевалованың искіриинең, городта хысхаа тимненіс паспорттарын алар пічіктер ам даа тимнелчелер.
Олар ӧӧнінде энергетика объекттеріне теелчелер. Іди ТЭЦ-ты Росэнерго сыныхтағда тутча. Чағынғы туста пу сурығ пӧгіл парар.
Хайди искірген Сорығ город пазының пастағы орынӌызы Александр Кузьмин, хысхаа тимненіс паспорттарын тимнир пічіктерде 33 читпес ілезіне сығарылған, 21-і тӱзеділген, 12-зінӌе тоғыс ам даа толдырылча. Суғ, чылығ пирӌең сетьтер схемазын орталадар тоғыстарға подрядчикнең чӧптезіг иділген, ол тоғыс ноябрьның ортызынзар толдырыл парар.
Пии аймаа пазының орынӌызы Татьяна Акользина сан пиріс тударға палғалысха сыххан, че ноға-да ол пір дее сурыға нандыр полбаан. Аймах пазынаң чӧптезерге кирек тіпче, анзы, тізең, ағырча одыр. Пасха сурығӌа ЖКХ пӧлии пастығынаң сурирға кирек тіпче, анзы ідӧк больничнайда полтыр. Валентин Коновалов аймах чыылыға тимненмеенін таныхтаан, аймах пазы хазыхтанып алза, телефонӌа палғалызарға чахығ пирген.
Чыылығда ідӧк пасха даа аймахтар устағӌылары сан пиріс тутханнар, оларның чоохтарында тың сидіксіністіг сурығлар чох полған.
- Хысхаа тимненіс паспорттарын алар сурыныстарны пирбеен объекттерні город-аймахтар пастары сыныхтағда тутсыннар. Таныхтапчам - постарың ол тоғысты сыныхтаға алыңар. Суғ, чылығ пирӌең сетьтер схемаларын орталадар тоғысты чағынғы туста тоос салыңар. Пии аймаа, чыылыға тимнен салыңар, пазағы чыылығда сірерні истербіс. Прай киректерні сыныхтағда тудыңар, соохтарда чуртағҷыларға хор-ғыс полбазын, - теен Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде