«КІЗІ ЧИДІГЕ ЧИДІНЕРГЕ САҒЫНЗА, ЧУРТАЗЫН АЛЫСТЫРАРҒА КИРЕК»
22.10.2021
Хабарлар
Кізі паза аның тоғызы. Амғы туста ӧткін паза кӱстенҷік чииттер, килкім ахча тоғынып алар ӱчӱн, тоғыс соонҷа тӧреен-ӧскен чир-суунаң ырах парғлабысчалар. Пір андағ матырыбыс Антон Индыгашев полча
- Антон, позыңнаңар чоохтап пир.
- Мин Алтай аймаандағы Новороссийскай аалда тӧреем, че ӧскем паза школаа чӧргем хонӌых Тустығ кӧл аалда. Іӌемнің ады Марина Яковлевна Индыгашева полча. Ол андағы олған садында 30 чыл азыра воспитатель полып тоғын парир.
Школа соонаң, 2009 - 2012 чылларда, мин Хубачардағы 20 № училищезер аал хонии тоғыстарының тракторист-машинизіне паза слесарьға ӱгренерге кіріп алғам. Андох В паза С категориялығ водитель правазын алғам.
2012 чылда армияа хабылғам. Службаны Бурятия Республиканың Кяхта городында пір чыл ирткем. Анаң, чуртазымны ідӧк кӱс структураларынаң палғалыстырарға полып, армияда халарға чӧптезіг идібіскем. Контрактча службаны Ағбандағы чааӌылар частьында ирткем. Минің армиядағы чуртазым тиксі пис чыл чарым пол парча.
Служба хоостыра аймах чорыхтарға чӧрӌеңмін. Москва, Владикавказ, Хызылчар крайындағы Козулька городтарда полғам. 2015 чылда Хакасия кӧйгенде, чааӌыларнаң хада аны ӱзірерінде ӧткін араласхабыс. Россияның паза Украинаның аразында ыырлас пар сыхханда, Воронеж облазында «Журавка-Миллерово» тимір чол пӱдіриинде араласхам. Минің кӧрізімнең, армия хылиимны улам тыытхан.
2018 чылның пастағы айларында таныстарым мині Северзер тоғынарға хығырғаннар. Мин, отпуск алып, Ханты-Мансийск автоном округындағы Сургут городсар чол тутхам, хайдағ регион полӌаң тіп кӧр кӧрерге. Кізі пірее чидіге чидерге сағынза, ол чуртазын алыстырарға кирек нооза. Мин армияа хылых-оңдайымны тыытхан ӱчӱн улуғ алғызым читірчем.
- Сургутта хайдағ чуртас кӧргезің?
- Сургут мағаа наа опыт пирген. Анда аймах кізілернең танысхам. Тоғыс хоостыра ачырғастығ даа киректер пол парӌаң, хаӌан устағӌылар, чал ахчазын тӧлебин, алаахтыр сал турӌаңнар. Сынны чоохтаза, анда кӧп тоғыс алыстыр салғам. Чахсы чуртасха чидінер ӱчӱн, чобағларға даа тоғазарға килісче. Аннаңар полған на кізінің, армиядағы чіли, А паза Б планнар поларға кирек.
Северде охранада тоғынғанымда, 2-3 хараа узубаӌаңмын. Мин, пір идінӌекте істеніп, позымны чахсы саринаң кӧзіт турғабын. Пірсінде пастығым теен: «Газпром бурение» ООО чахсы водительлерні тоғысха алча. Анда таныстарым тоғынчалар. Че сині тоғысха аларын пір чыл сахтирға килізер».
Мин наа тоғыссар хығыртығны пір чыл сахтаам. Тус читкенде, телефоным сығдыри тӱскен. «Антон Яковлевич, киліңер піссер тоғынарға», - тееннер телефонный пасха саринда.
- Ам хайда тоғынчазың?
- Мин вахтаа чарым чылға чӧрчем. Ам Иркутск облазындағы «Газпром бурение» ООО-да тоғынчам. Андар кізілер вахтаа Россияның аймах пулуңнарынаң килчелер. Хакасиядаң, Хызылчар крайынаң, Кемеров, Новосибирск областьтарынаң, Москвадаң специалисттер чыылчалар.
Мин таарлағны 30 тоннаа теере тарт чӧрӌең самосвалнаң тоғынчам. Пу сын иреннерге килістіре тоғыс. Северде аар-пеер маңзырирға кирек чоғыл. Руль кистінде одырзаң, улам сизіктіг поларға кирек. Тоғыс толдыра. Полған на рейске сығар алнында имнег комиссиязын иртерге кирек.
Піс вагончикте хончабыс. Анда чуртирға прай оңдайлар пар: чылығ пол, чарытхы, суғ, узуӌаң орғаннар. Мылча парох. Чахсы азырапчалар.
- Вахтанаң тоғынарға аар ба?
- Вахтанаң тоғынарға оой нимес. Чоон машиналығ хуюн ӧтіре парарға най сидік. Самосвалнаң мин чир, сай, хум тарт чӧрчем. Пістің пӧгін - газ аныӌаң орыннарны тимнирі, аар техникалар чӧрӌең чолларны тӱзедері. Чол изел сыхса, нааӌылапчабыс. Анда піс удур-тӧдір полызысчабыс. Часхы - вахта тоғынӌыларына иң аар тус. Машина оодылза, аны тізекке теере палғаста тыхтирға килісче. Пір телефонымны андағ палғаста патырыбысхам.
Мин профессияма хынчам. Водитель тоғызын таллап алғаныма хомзынминчам.
- Вахта соонаң ибіңде ниме итчезің?
- Иб аразында хайын чӧрчем. Тоғыс соонаң кӱс алынчам. Хакасияӌа чорыхха чӧрерге хынчам. Тынағ базаларында тынанчам. Форель ӧскірчеткен хоныхсар палых аларға пар килчем. «Саянская форель» хоныхта татхыннығ палыхтар садылча. Севердегі палыхтарның тадии сала пасха арах.
- Антон, чуртазыңда пірее улуғ пӧгін турғысчазың ма?
- Амды минің пӧгін - пос чуртына чидінері. Тураны мин ипотекаа албаспын, ахча чыып аларбын. Ам іӌемнең хада Тустығ кӧл аалда чуртапчам, ағаа иб аразында хайынарға полысчам.
Чуртаста пӧгін турғызып, аны хайди даа толдырарға кирек. Прай ла ниме оой киліспинче. Итсе-де, хай піреезіне чуртаста оң даа пол парча, кем-де лотереяӌа килкім ахча утып алча.
Амғы чииттер тӧреен чир-суунаң ырах парарға тідінминчелер. Хайзын ипчілері вахтаа ыспинчалар. Че прайзы чахсы тонанарға, чазанарға, аарлығ машиналығ ойлат чӧрерге, хырығ озаринда тынанарға хынча. Амғы тӧл прай нимее пір саңай чидініп аларға харасча, че чуртаста андағ полбинча. Мағаа пір нанӌым теен: «Прай нименің тузы пар». Маңзыраза, пірее чирде «частых» таа парарға айабас.
Полған на кізінің позының ӱлӱзі. Мин вахтаа чӧрӌең тоғысты таллап алғам. Кем-де устағӌы тоғызында чахсы істенче. Піреезі, пос киреен азып алып, чидігліг идінӌек полыбысча.
Чооғымны тоозып, мин орындағы чонны удур-тӧдір улуғлазарға хығырчам. Чолда машина оодылып турыбысса, полыс пир турарға. Алай улуғ частығ аға-ууӌаны чол кизіре ӱдезібіс турарға. Кізілер удур-тӧдір улуғласса, андада чуртирға даа оой полар.
Автор :
Чоохтасхан Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде