«КУЛЬТУРА» НАЦПРОЕКТ НАА ЧУРТАС ПИРЧЕ
22.10.2021
Хабарлар
Ӧрініс. 19 октябрь Ағбан пилтірі поселокка танығлығ кӱн полған - анда Ю.А.Гагариннің адынаң культура туразы паза библиотека тиксі тыхтағ соонаң пайрамни азылғаннар
Ағбан пилтіріндегі культура туразы 1961 чылда пӱдірілген. Ол тустаң сығара анда мындағ улуғ тыхтағ иділбеен.
Тиксі тыхтағ тоғызы «Культура» нацпроектче толдырылған. Культура туразының тасты нааӌылалған, прай кӧзенектер паза ізіктер алыстырылған. Пу тоғысха тиксі 4,5 млн салковай хорадылған. Тыхтағ тоғызына ідӧк Ағбан пилтірі аймаа бюджедінең 1,5 млн салковай позыдылған. Ол ахчаа гример пӧліктері, фойе, гардероб, пасхыстар тыхталғаннар паза чарытхы тартылған.
Культура туразы тиксі тыхтағ соонаң азылғанынаң Ағбан пилтірі чуртағӌыларын алғыстирға килгеннер Хакасияның культура министрі Светлана Окольникова, Ағбан пилтірі аймааның пазы Елена Егорова, Н.Г.Доможаковтың адынаң национальнай библиотеканың директоры Юлия Костякова.
Елена Егорованың таниинаң, пӱӱл тиксі Ағбан пилтірі аймаандағы культура учреждениелеріне «Культура» нацпроект полызиинаң наа чуртас пирілген: Чарков паза Піӌі пазы ааллардағы клубтарда кӧрігӌілер заллары нааӌылалғаннар, «Ынархас» культура туразына паза Сапогов аалдағы клубха кӧрігӌілерге одырчыхтар алылған. «Аалларның тиксі тилізі» хазна программазы хоостыра Тазоба пилтіріндегі культура туразының тасты нааӌылалча.
«Культура» нацпроектче Ю.А.Гагариннің адынаң культура туразына ідӧк автоклуб алылған. Ол 6 миллионӌа салковайға тур парған. Шоу-мобиль амғы тусха килістіре чарытхылығ паза аудио-кӧзідіг системалығ, кічіг сценалығ. Ол «тегілектіг культура туразы» тізе, саба полбас. Амды шоу-мобиль полызиинаң Ағбан пилтірі аймааның хайдағ даа аалында пӧзік синніг концерт иртірерге чарир. Елена Егорова мындағ чахсы алызығлар ӱчӱн Хакасияның культура министерствозына паза министрі Светлана Окольниковаа аймахтың прай чур-тағӌылары адынаң алғызын читірген.
- Мындағ танығлығ кирекнең сірерні, Ағбан пилтірі чуртағҷыларын, Хакасияның правительствозы адынаң алғыстапчам. «Культура» нацпроект полызиинаң культура учреждениелері иптелчелер. Пӱӱн піс ідӧк наа тӧлнің библиотеказын асчабыс. Нимедір ол наа тӧлнің библиотеказы - ол уғаа чахсы оборудованиеліг, техникалығ паза наа кинделіг истіг библиотека. Пӱӱн библиотеканың тасхахтарынзар 4 муң азыра наа, сіліг, хынығ книга турғызылған. Республикада пу ӱзінҷі библиотека, хайзы «наа тӧлнің амғы тустағы, модельнай библиотеказы» статустығ. «Культура» нацпроект пісті ӱр ӧріндіреріне ізенчем, - алғыстаан прайзын Светлана Окольникова.
Анаң Хакасияның культура министрі Ағбан пилтірі аймааның администрациязының культура, чииттер политиказынӌа, спортча паза туризмӌе управление устағӌызы Оксана Фёдороваа Культура туразының клӱзін читірген. Оксана Фёдорова Хакасияның культура министерствозына, Ағбан пилтірі аймааның устағ-пастаана «Культура» нацпроектті чуртасха кирерге ахчанаң чахсы хабасхан ӱчӱн алғызын читірген. Аның чооғынаң, автоклубтың гаражын пӱдіреріне аймахтың устағ-пастаа 2 миллион салковай пирген. Ол гараж пӱдіріл парған.
Светлана Окольникова техниканаң мааннап тудынарға паза республикаӌа концертнең чӧрерге чӧп пирген.
- Сірернің артисттерің уғаа сарынҷы. Амды аал хонии тоғынҷыларын алғыстирға тус чағдап килген, аннаңар оларны тиксі Хакасияҷа алғыстирға чӧрген ползаңар, чахсы поларҷых, - таныхтаан культура министрі. Анаң пайрамға килген чонға Ю.А.Гагариннің адынаң культура туразының артисттері концерт кӧзіткеннер. Концерт соонаң прайзын нааӌылалған библиотеказар хығырғаннар.
Модельнай библиотека Культура туразының ікінӌі хадылында орныхча. Хазии уйан паза кинек кізілерге андар чидіп аларға уғаа аар.
Аннаңар анда библиотека тоғынӌызын хығыртчаң система паза пасхысча сыхчаң подъемник турғызылған. Аның полызиинаң коляскалығ кізілерге тураның ікінӌі хадылынзар пасхысча сығып аларға чарир.
Библиотеказар килгенде, кӧрігӌілерні робот удурлаан. Ол, экскурсия иртіріп, хайдағ пӧлікте ниме парын чоохтаан. Хығырӌаң залда наа компьютерлер турчалар, хайзылары хығырығӌыларға интернет пастыра национальнай электроннай библиотеканың кинделерін хығырар оңдай пирчелер. Библиотека уроктарын, мастер-класстар иртіреріне интерактивнай чарды кӧріл парған.
- Мында мин чуртапчам. Минзер удаа ааллап кил турыңар. Хынығ полар ӱчӱн, мағаа, арса, робот-харындастар чыып аларбыс, - теен робот.
Анаң робот прайзын ӧменең тоғынӌаң залзар хығырған. Пу пӧліктің тасхахтарында олғаннарға паза чииттерге кӧрілген кинделер чатчалар. Тасхахтар пӧзік, потолокка теере. Библиотекарьлар кирек киндені, пасхысха сығып, ал пирерге тимделер.
- Сынап чоохтаза, республикада мындағ читі библиотека пар, «Культура» нацпроектче тыхталғаны - ӱзінҷізі. Кызлас, Индіркі Паза, Катанов аалларда мындағох истіг библиотекалар.
Олар, книгалар пирчең пункттардаң пасха, ідӧк пос тусты паза мероприятиелер иртірчең орыннар полчалар. Библиотека аалның культура кіні пол сыххан. Ағбан пилтірі поселоктағы наа библиотека улуғларның, саарбахтарның, олғаннарның хынҷаң орны пол парар тіп сағынчам, - таныхтаан Светлана Окольникова.
Н.Г.Доможаковтың адынаң национальнай библиотеканың директоры Юлия Костякованың чооғынаң, Ағбан пилтіріндегі библиотеканы тыхтирында кӧп сидіксініс полған. Иң пастап законға тудынарға кирек полған, тиксі тыхтағ тоғыстары ӱчӱн нандырығ заказчикке артылча, тоғыс толдырылбазынаң страховка, тізең, пирілбинче.
Культура туразы паза библиотека пайрамни азылған соонда Ағбан пилтірі поселоктың чуртағӌызы Анна Красникованаң (Сагатаеванаң) чоохтазып алғам. Ол пу поселокта ӱзінӌі чылы чуртапча. Наа ла кӧс килгенде, Культура туразы иргілен парғаны тастынаң кӧрінген.
- Культура туразынзар кіргем. Уғаа истіг. Тастындағы даа, істіндегі дее кӧрімі алыс парған. Палам кӧмес ӧс парза, пеер удаа кил турарбыс. Клуб тыхтал парғаны ӧріндірче, - сағыстарынаң ӱлескен Анна Красникова.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде