Хайдар чöрерге чарабас?
29.10.2021
Хабарлар
Ибде одырӌаң неделяда, 28 октябрьдаң сығара 7 ноябрьға теере, ниме идерге чарир, че ниме – чарабас
1. Рестораннар, кафелер, столовайлар, буфеттер, пiр сöснең чоохтаза, чонны азырапчатхан орыннар тоғынминчалар. Че чiӌең нименi тасхар сығар пир турарға, ибге теере ағыл пир турарға паза гостиницалардағы кiзiлернi, предприятиелердегi тоғысчыларны азырирға чарадылча.
2. Садығ туралары iдöк пиктiглер. Че аптекалар паза ас-тамах садығ туралары тоғынчалар. Ыраххыдаң садығнаң айғазарға чарир.
3. Тiс имнег туралары тоғынминча. Че тiзi тың ағырчатхан кiзiлерге имнег полызии пирiлче.
Чон кöп чыылысчатхан организациялар (мылчалар, сауналар, спортзаллар, кинотеатрлар, ӱтертiнӌең кiннер паза пасхазы) тоғынмастар. Аймах мероприятиелернi Роспотребнадзор чарадии чох иртiрерге чарадылбинохча. Че онлайн иртiрерге чарир.
Транспорт хайди тоғынча?
Ағбан, Харатас, Саяногорск городтарның iстiнӌе чöрчеткен автобус-троллейбустар чöрiстерiн пiр неделяа тохтадыбысханнар. Че муниципальнай пӱдiстер аразынӌа чонны тарт чöрӌең транспорттарға чöрерге чарир. Кöзiдiмге, Саяногорсктаң Ымай тас алай Нымырттығ посёлоктарзар чидiп аларға чарир. Харатас городтаң Пригорск посёлоксар транспорттар чöрче.
Ковидтең прививка турғыстырған такси водительлерiне, кiзiлернi тарт чöрiп, тоғынарға чарир. Тоғынӌылар тоғысха хайди чöрерiн организация-ведомстволарның устағ-пастаа сағынарға кирек.
Кем тоғынар?
1. Чонның хазиин паза чуртазын хайраллапчатхан специалисттер: имӌiлер, МЧС тоғынӌылары, öрт ӱзiрӌеңнер;
2. Устағ компаниялар;
3. Чонны азырапчатхан, товарларны тимнепчеткен организациялар, рыноктар, складтар, курьер службалары;
4. Тöлеглернең айғасчатхан организациялар;
5. Энергетиктер, коммунальщиктер, iдöк аал хонии организациялары, чол пӱдiрiгӌiлерi, искiрiглiг технологиялар специалисттерi, почта тоғынӌылары паза соона салдырбаӌаң тыхтағнаң айғасчатхан тоғысчылар.
Хайдағ хазна полызығлары пирiлче?
60 частығдаң сығара улуғларға ибдең сығарға пiр дее чарабас. Пасхалары 22:00 час иирдең 6:00 час иртенге теере ибде одырарға киректер. Че чарадылча:
– табырах имнег полызиин сурап, имнег туразынзар айланарға;
– COVID-19 ағырығдаң тоғыр прививка турғысчаң пунктсар парарға;
– азых кииде спортнаң алай физкультуранаң айғазарға (удур-тöдiр 5 метр оортах тудынарға);
– чалғызан тасхар пас чöрерге;
– iӌе-пабаларға алай законнай представительлерге палаларнаң тасхар чöрерге (ибдең 300 метрдең оортах нимес);
– ибдең cығара тоғысха чöрерге;
– гаражха алай сад участогына теере чöрерге;
– чалғыс чуртапчатхан туған-чағыннарзар чöрерге;
– садығ туразынзар чöрерге;
– ибдегi аңнарны тасхар сығарарға (ибдең 300 метрдең оортах нимес);
– сöп-сапты идбең сығарарға;
– социальнай полызығлар аларға.
Прай пу киректернi ит чöрчетсеңер, паспорт, тоғыстаң пирiлген справка паза маска хада поларға кирек!
Автор :
Татьяна Тютюбеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде