ЧОРЫХ НИИК ПАЗА ХОРҒЫС ЧОХ ПОЛЗЫН
12.11.2021
Хабарлар
Ӧрініс. Федеральнай программаҷа Хакасияа 18 наа школа автобузы пирілді. Оларның пірсі Асхыс аймаандағы Чоғархы Асхыс аалдағы ортымах школаа читірілді
РЕСПУБЛИКАНЫҢ АСХЫС, ПИИ, АЛТАЙ, БОГРАД, ОРДЖОНИКИДЗЕ, ШИРА ПАЗА АҒБАН ПИЛТІРІ АЙМАХТАРЫ 11 ПАЗ, ПИС ГАЗ ПАЗА ІКІ УАЗ АЛҒАННАР. ХАЛҒАНҶЫЗЫНЫҢ ПІРСІ ЧОҒАРХЫ АСХЫСХА ПИРІЛГЕН. УАЗ-та 13 ПАЛАА ПАЗА ПІР УЛУҒ КІЗЕЕ ОРЫН КӦРІЛ ПАРҒАН.
- Амға теере пістің олғаннарыбысты он орыннығ автобус тарт чӧрген, че аның тоғынар тузы ирт парған. Ағаа хоза ол пістің чолларға килістіре полбаан. Чоғархы Асхыстағы школада Аңчыл чон, Казанов ааллардаң Казанов паза Кызлас станциялардаң палалар ӱгренчелер. Оларны пастағы урокка тузында ағыл килер ӱчӱн, водительге ӱс хати чолға сығарға килісчең. Ол пастап Аңчыл чондағы паза Казановтағы ӱгренҷілерге парчаң анаң - Казанов станциязар, соонаң - Кызлас станциязар. Пістің аал улуғ, аннаңар ідӧк ырах чуртапчатхан олғаннарны авғобуснаң ағылып, нандыра апарчабыс. Наа автобус пирілгенде, амды водитель ікі ле хати чорыхха сых турар!
Наа транспортты піс хаҷанох сахтапчатхабыс. Мағаа 10 ноябрьда аны аларбыс тіп искіргеннерінде, мин сах андох ӱгретчілерге, паба-іҷелерге искіргем. Прайзы ӧрінче, аны чидікпин сахтапча, - кӧңнін чазырбинча школа директоры Татьяна Межекова.
Чоғархы Асхыстағы ортымах школаа мына мындағ пӧзік паза кӱстіг автобус хаңанох кирек полған. Аңҷыл чон аалзар ӧӧнінде чол хомай нооза.
- Хысхызын хар тирең чаап парза паза часхызын хар хайыл сыхса, чорыхха кӱрҷек чох сыхпачаңмын. Пірее орыннарда пат таа парчаңмын. Амды, тізең, УАЗ-наң пір дее хорыхпин чӧрерге чарир полар. Ол кӱстіг паза пӧзік,- чоохтапча водитель Степан Толмашов.
Автобустарның пірсі Шира аймаандағы Азах Сӧӧт аалдағы школаа пирілген. Пу школазар тарт чӧрчеткен аалларның аразында чол ідӧк хомай.
Хайди чоохтапча Хакасияның ӱгредіг паза наука министрі Лариса Гимазутина, мындағ автобустар пістің республикаа пастағызын на пирілді. Хакасияның ӱгредіг паза наука министерствозы федеральнай кіннең мындағ УАЗ-тарны сыбыра сурҷаң полтыр. Ааллар аразындағы чолларның кӧбізі хомай, аннаңар палаларны тарт чӧрерге сидік. Пу сурығ хоостыра министерствозар іҷе-пабалар удаа айланҷаңнар.
- Хакасияа мындағ кӱстіг автобустарның кирексінізін киречілеп пирер ӱчӱн, піске Россияның просвещение министерствозынаң пір ле ай чоохтазарға, чӧптезерге киліспеен. Че ол тик полбаан, Хакасияа ікі автобус пирілген. Мыннаң мындар піс мындағ автобустар сурарын узарадарбыс, - таныхтаан ӱгредіг министрі Лариса Николаевна.
Асхыстағы лицей-интернат, тізең, кӧп орыннығ автобус алған. Пу ӱгредіг организациязында ікі автобус палаларны тарт чӧрче. Пастағызы - пасталығ класстарны, ікінҷізі - пасхазын. Ағаа хоза Пӱктіг аалзар ӱгренҷілерге чӧрерге килісче.
- Школада олғаннар ікі сменача ӱгренчелер. Аннаңар пастап пастағы сменадағы олғаннарны тарт чӧрче, анаң ікінҷі сменадағыларны. Автобустарның пірсі халғанҷы чылларда удаа сайбал сыххан паза ол соох полған. Пирілген наа автобуста, тізең, пістің ӱгренҷілерге чӧрерге чылығ, истіг паза хорғыс чох полар. Ідӧк піс амды олғаннарнаң хада олимпиадаларға, марығларға, экскурсияларға паза даа пасха чорыхтарға хорыхпин сых турарбыс, - чоохтапча директорның тоғызын толдырчатхан Николай Чебодаев.
Кӧп орыннығ автобус ідӧк Пии аймаандағы Алахтайлар аалының школазына пирілген. Пу ӱгредіг организациязында алты аалның олғаннары ӱгренче. Ырахтағылар школа интернадында чуртапчалар, Салғын паза Чаптых ааллардаң олғаннарны кӱннің сай тартчалар.
- Ӱгренчілердең пасха, іҷе-пабаларның сурынызы хоостыра піс ідӧк кічіг палалығ іҷе-пабаларны Алахтайлардағы олған садынзар апарчабыс, - таныхтапча Куйбышев аалдағы школа директоры Ольга Чаптыкова.
Наа автобустарны алған школа директорларын, водительлерні чылығ алғыстаан Хакасия пазының орынҷызы Ольга Пономарева.
- «Ӱгредіг» нацпроект хоостыра улуғ хайығ школаларға салылча. Че палаларға хорғыс чох полғанынаң артых ниме чоғыл. Ол санда школазар чорых. Школа автобустарында тоғынчатхан водительлер пістің палаларыбысты арачылапчалар, транспортты сыбыра сыныхтапчалар паза олғаннарны иптіг тарт чӧрчелер. Аннаңар олар наа, амғы тусха килістіреавтобуснаң тоғынзыннар, - айланған Ольга Игоревна.
2021-2022 ӱгредіг чылында Хакасияның 12 муниципальнай пӱдізінде кӱннің сай ӱгренҷілерні школаа тарт чӧрчелер. 118 автобус 130 аалдаң 3200 ӱгренҷіні школазар читірче.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы