СТУДЕНТ ПОЛАРҒА ТИМНЕНЧЕЛЕР
24.11.2021
Хабарлар
Пу наада ХГУ-да азых ізіктер куннері ирткен. Анда хакас кафедразы ӧткін араласхан
Азых ізіктер кӱннерінде чыл сай кӧп ӱгренді паза ортын профессиональнай ӱгредіг учреждениелерінің студенттері араласчалар. Пӱӱл дее илееде оол-хыс анда аймах профессияларнаң танысхан. Хакасияның ӧӧн вузы чиит улусты, нинҷе пар кӧстеглернең таныстырып, позынзар ӱгренерге хығырған.
Хакас кафедразы даа ол кӧстегҷе тоғыс апарған. Пӱӱл аның тоғынҷылары алтынҷы чылы 10-11 класстарның ӱгренҷілеріне хакас тілінең олимпиада иртірді. Анда 22 №, 24 № школаларның паза Н.Ф.Катановтың адынаң национальнай гимназияның ӱгренҷілері араласханнар. Чоохтирға кирек, анда сыйыхтығ орынға турысхан оол-хыстарға вуз хоза балл пирче.
Олимпиада иртірілер алнында хакас кафедразының магистранттары ӱгренҷілерге аймах хынығ ойыннар иртіргеннер. Анда оол-хыстарға удур-тӧдір танызып аларға оңдай пирілген. Улуғ класстарның ӱгренҷілері пастап туртухханнар, че соонаң, ӱс школаның ӱгренҷілері тӧрт группаа чарылып, тӧреен тілін хайди пілчеткеннерін чахсы кӧзіт пиргеннер. Прай пирілген чахығларны толдырыбызып, олар, доска хыринзар сығып, постарынаңар хысхаңахти чоохтап пиргеннер. Хакас кафедразының ӱгретчілері ӱгренҷілер пос тілін хайди пілчеткеннерін паалааннар.
Марығлар соонаң ӱгренҷілер пос пілістерін олимпиадада кӧзіткеннер. Пӱӱл анда 20 азыра саарбах араласхан. Хайди таныхтапча хакас кафедразының устағҷызы Инга Кызласова, чыл сай хакас тілінең иртірілчеткен олимпиадада илееде ӱгренҷі араласча. Сыйыхтығ орынға турысханнарның хай піреезі соонаң оларның студенті полыбысча.
- Пӱӱл иртірілчеткен олимпиадада Ағбандағы 22 №, 24 № школалар паза национальнай гимназия араласханнар. Чоохтирға кирек, піс пасха школаларның ӱгренҷілерінеңер ундутпинчабыс. Олимпиададаңар испин халғаннарына часхызын пазох Азых ізіктер кӱннері иртсе, анда интернет пастыра паза олаңай оңдайнаң аралазарға чарир полар.
Аның салтарлары хоостыра сыйыхтығ орыннар алған оол-хыстарға 4 балл пирілче, сертификаттарға турысхан араласчыларға -2 балл. Ол сертификатнаң ӱгренҷее ікі чыл тузаланарға чарадылча. Пістің студенттерібістің аразында андағ чииттер пар, хайзылары, олимпиадада кӧп балл чыып алып, пістің кафедразар ӱгренерге кіріп алғаннар, - теен Инга Людовиковна.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы