КӰСТЕНіС ЧИҢІСКЕ АҒЫЛЧА
24.11.2021
Хабарлар
Пістің «чылтызыбыс». Н.Ф.Катановтың адынаң национальнай гимназия-интернаттың 6-ҷы класстағы ӱгренҷізі Арина Саражакова чахсы ӱгренчеткенінең пасха, ідӧк хоос гимнастикада пӧзік чидіглерге читче
Ағбанның кічіг чуртағҷызы Аринаа - 12 час. Ол кічіг дее полза, аның сағыс-кӧрізі, чооғы улуғларни осхас. Ол пілче, ӱгредігде паза спортта пӧзік чидіглерге чидер ӱчӱн, кӧп тоғынарға паза эрінмеске кирек. Школада уроктар тоозылза, ол гимнастикаа парча, аның соонаң ибдегі тоғысты толдырарға кирек. Ідӧк полған на кӱн иирде ибде упражнениелер итче. Хоос гимнастикаа Арина 4 частығдаң сығара чӧрче.
- Мині іҷем секцияа ағыл килгенде, андағы хызыҷахтар паргер итчеткеннер. Оларның сіліг упражнениелерін кӧре ле, пу спорт кӧріміне хыныбысхам! - сағысха кирче хызыҷах. - Паба-іҷеме теем: «Мин ідӧк сіліг сегірерге хынчам». Тренер Анна Осадчая, мині кӧріп, «гимнастиканаң айғазар оңдайлары пар» теен. Мына пу тустаң мин спортнаң айғас сыххам. Паза мин пілчем, ол минің чуртазымда хаҷан даа полар.
Ӱр ниместе Ағбанда хоос гимнастикаҷа марығ ирткен. Анда Хакасияның паза Хызылчарның спортсменнері араласханнар. Арина Саражакова, 2009-2010 чыллардағы спортсменнернің аразында сыйыхтығ орын алып, пастағы разрядха турысхан.
- Пӧзік чидіглерге чидіп алар ӱчӱн, пір ле упражнениені чӱс азыра хати толдырарға кирек. Мин, кӧзідімге, «Риски» упражнениені орта толдырарға ӱр тус хоратхам. Меспекті пӧзік тастабысчазың ол тӱскенче, мағаа нинҷе-де хати айланыбызарға, тоңхар турыбызарға маңнанарға, анаң тӱсчеткен меспекті тудып аларға кирек. Мында ӧӧні - чапчаң полары, - чоохтапча Арина.
Хоос гимнастика иң сіліг спорт кӧріміне саналча. Россияда ол чахсы тиліпче. Олимп ойыннарында пістің спортсменнерібіс чахсы салтарлар кӧзітчелер. Оларның чидіглері пістің хакас хызыҷахтарыбысха чахсы кӧзідім полча. Чидіге читчеткен спортсменнернең ідӧк тиңнезерге сағынча Арина.
- Пӱӱл Олимп ойыннарында ікістер Дина паза Арина Авериналар араласханнар. Че мин хынчатхан гимнасткалар - ол Лала Крамаренко паза Екатерина Селезнева. Лала Крамаренко - уғаа кӱстіг спортсмен, иң артых сӧӧ тартылча полар. Ол полған на упражнениені сіліг толдырча! - поғдархапча хызыҷах.
Арина Саражакова 2-3 чыл пазынаң спорт узының кандидады полыбызарға пӧгін турғысча. Аны толдырыбызар ӱчӱн, кӧп кӱс саларға, марығларда пӧзік салтарлар кӧзідерге кирек.
Амды ол улуғ марыға тимненче, хайзы пӱӱл наа чыл алнында Москвада иртер. Пілдістіг, марығ - ол улуғ хорадығ. Іҷе-пабазы Владимир Леонидовичнең Елена Константиновна ағаа хабас пирерге нинҷе дее тус паза ахча хорадарға тимделер. Олар пілчелер нооза, спорт кізінің хылиин, сағыс-кӧрізін тыытча.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде