ТЫНАНҶАҢ, СПОРТНАҢ АЙҒАСЧАҢ НАА ОРЫН
26.11.2021
Хабарлар
Ӧрініс. Ағбан городтың Индіркі Согра микрорайонында «Заречье» сквер азыл парған
«Чурт паза город оңдайлары» нацпроекттің «Городта истіг оңдайлар тӧстирі» регион программазынҷа республиканың аал-городтарында парктар, скверлер пӱдірілче, туралар ибіркізі иптелче.
Олох программа хоостыра 2019 чылда Индіркі Сограда сквер пӱдірерінҷе проект рейтинг талластыриин иртібіскен. Пӱӱл Флотскай орамада 7№ школа хыриндағы ачыхта наа сквер пӱдіріл сыххан. Ағаа 20 миллионҷа салковай позыдылған, ол санда федеральнай бюджеттең -17 млн 550 муң 940 салковай, республика бюджедінең - 310 муң 401 салковай, город бюджедінең - 1 млн 633 муң салковай.
Кічіг хырлас айының 24-ҷі кӱнінде сквер пайрамни азылған. Микрорайон чуртағҷылары кӧп чыылыс парғаннар. Ағбан город пазы Алексей Лёмин оларны пу танығлығ кирекнең алғыстаан:
- Пістің городта пір скверге кӧп пол парды. Пӱӱл Ағбанда алғым пӱдіріг программазы апарылчатса даа, пу объект ӧӧннернің санында полған. Ікі чыл мының алнында пу микрорайонның чуртағчылары, пір чӧпнең тудынып, рейтинг талластыриинда пу проекттің ӱчӱн ӱннерін пирібіскеннер. Ікі чыл ирт парғанда, Индіркі Согра чуртағчылары истіг скверге чидінділер. Мында уғаа чахсы спорт площадказы пар. Ағбанда мындағ площадка паза чоғыл. Пу пістің пастағы опыдыбыс полча. Площадканаң чайғыда даа, хысхыда даа тузаланарға чарир. Чайғыда баскетбол, футбол, волейбол ойнирға чарир, хысхыда - хоккей. Мындағ площадкаларны городтың пасха даа орыннарында пӱдірерге пӧгінчебіс. Индіркі Согра чуртағҷыларын алғыстапчам паза сквернең мааннап тузаланарға, аны хайраллирға чӧп пирчем.
Микрорайон старостазы Татьяна Макарова Ағбанның устағ-пастаана, город пазына, скверні пӱдірген подрядчиктерге паза проектировщиктерге чуртағҷылар адынаң алғыс читірген. Аның чооғынаң, пӱдірігҷілер анда хараа-кӱнӧрте, тынағ кӱннерде дее тоғынғаннар. Чуртағҷылар сквер тимге сығарын матап сахтааннар.
«Заречье» сквернің улии - 6433 квадрат метр. Анда кічіг дее, улуғ даа частығларға , чииттерге дее тынанар, спортнаң айғазар оңдайлар пар. Спорт площадказынаң пасха, анда ідӧк воркаутнаң айғазар ачых, олған площадкалары, ойнаҷаң комплекс паза аймах тренажёрлығ ачых пар. Андох теннис ойнаҷаң ікі стол, уғаа кӧп одырчых паза сіліг фонарьлар турғызылғаннар. Сквернің ортызында хармахтапчатхан хоосханың скульптуразы турча.
Кӧп тузалығ спорт площадказы резинанаң тӧзелген. Чайғыда минифутбол, баскетбол паза волейбол ойнаҷаң прай оборудование пар.
Индіркі Согра чуртағҷызы Галина Попова сағыстарынаң ӱлесче:
- Сквер тимге сых парарын матап сағаабыс. Амды олғаннарға ойнаҷаң аға-ууҷаларға тынанҷаң орын пар. Мин пархаларымнаң кӱннің полчам. Хачан даа кӧп пала хайынча. Минің пис пархам прайзы мында ӧсче. Оларға тынанҷаң орын парына ӧрінчем. Піс город кінінзер чӧрҷеңміс, микро-районда ойнаҷаң орын хаҷан даа полбаан. Амды ырах парарға кирек чоғыл. Ӧрінізімнең ӱлезер дее сӧстер таппинчам.
Людмила Калашникова сквернің пайрамни азылғанына 10 частығ Лера пархазынаң хада килген. Ол хости орныхчатхан турада чуртапча. Аның чооғынаң, кӱнӧрте скверде тынағдағы кізілер полчалар, олғаннар чӱгӱріс чӧрчелер. Ӱгренҷілер, уроктары тоозыл парза, пеер килчелер. Людмила Калашникова айғы чахсы поларына ізенче. Пархалары конькиліг чыларға хынчалар.
- Мин «Корабль» ойначаң комплекссер арғыстарымнаң ӧӧрелерімнең аҷамнаң хада кӱннің кил парчам. Хысхыда пеер конькиліг чыларға чӧрербін. Мындағ истіг сквер пӱдіріл парғанына ӧрінчем, - сағыстарынаң ӱлескен Лера.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы