ИСКІРҶЕҢ САҒЫЗЫҢ ПАР ПОЛЗА, ЧООХТАН!
03.12.2021
Хабарлар
«Халых чоохтазығ». Хакасияда 30 ноябрьдаң коронавирус чуғынҷах ағырығ сурығларынҷа гражданскай форум тоғызын пастабысхан
ЧЫЫЛЫҒДА РЕСПУБЛИКАНЫҢ ХАЛЫХ ОРГАНИЗАЦИЯЛАРЫ, ПІРІГІСТЕРІ, МИНИСТЕРСТВО-ВЕДОМСТВОЛАРЫНЫҢ КІЗІЛЕРІ, ИМҶӀЛЕР ПАЗА ДАА ПАСХАЗЫ АРАЛАСХАН. ІДӦК ПАСХА РЕГИОННАРНЫҢ СПЕЦИАЛИСТТЕРІ ИНТЕРНЕТ ПАСТЫРА ПАЛҒАЛЫСХА СЫХХАННАР. ФОРУМ АЗЫЛҒАНДА, АНЫҢ АРАЛАСЧЫЛАРЫНЗАР ВИДЕОПАЛҒАЛЫСЧА ХАКАСИЯ ПАЗЫ ВАЛЕНТИН КОНОВАЛОВ АЙЛАНҒАН.
- Коронавирус чуғынҷах ағырығны тараттырбас ӱчӱн кирілчеткен хатығластардаң паза наа правилолардаң піс прайзы майых парғабыс. Чонда вакцинация иртері, (QR-кодтар паза локдаун кирілері хоостыра кӧп талазығ сығысча. Аннаңар піске ағырығнаң харбазарынҷа пір стратегия тӧстеп аларға кирек. Пу пӧгіннең пістің республикада «Халых чоохтазығ» гражданскай форум тоғынып пастабысты. Ізенчем, чоохтазығ кӧп сурыға нандырығ пирер паза чуғынҷах ағырығнаң харбазарға полызар, - таныхтаан айланызында Валентин Олегович.
«Халых чоохтазығ» гражданскай форумның ӧӧн пӧгіні - ікі пасха кӧрістіг чуртағӌыларға коронавирус чуғынӌах ағырығ хоостыра сағызын искірерге оңдай пирері, вакцинациядаңар чоох алызары паза халых чонда сығысчатхан сурығларға нандырығ пирері.
Чыылығда ӧӧнінде вакцинация иртер паза QR-кодтар кирілер сурығлар ӱзӱрілген.
Наталья КОГАН, Хакасияның чуғынҷах ағырығ имнег туразының ӧӧн имҷізі:
- Пістің имнег туразында прививка турғысхан паза турғыспаан кӧп пациент чатча. Че оларның ағырииның сині уғаа тың пасхалалча. Пастағыларының ағырии ниик ирт парыбысча, олар «хызыл зонада» чатпинчалар, че прививка турғыспааннарға COVID-19 улуғ ӱрег ағылча. Оларның ӧкпелерін ағырығ пір-ікі ле «чібісче». «Хызыл зонада» чииттер кӧп, хайзыларының хазии пик, спортнаң айғасчалар... Чуғынҷах ағырығдаң имненіп алзалар даа, олар реабилитацияны ӱр иртерлер паза нинҷе-нинҷе чыл хазиин тыыдарлар.
Иван МАНАНКИН, халыхчы:
- Мин ковиднең пис неделя ирееленгем, ӧкпемнің 75 процентін ағырығ «чібіскен» тиирге чарир. Хазиимны тыыдып алар ӱчӱн пір ле чыл кирек полбас, аннаңар прайзын вакцинация иртерге хығырчам. Че олох туста мин (QR-кодтаң тоғырбын. Минің кӧрізімнең, пу COVID-19 тиктең нимес тилекейҷе тарапча, ол кемге-де тың кирек. Кемге? Піс аны хаҷан даа пілбеспіс, неке. Че прай ниме оларның планы хоостыра парча. Халых чон табырах пирінібіссе, пос салыныбысса, олар ідӧк табырах чиңіп аларлар. План - ол маскалар, вакцина, (QR-кодтар...
Ергаш ТОПОЕВ, имчі (Москва г.):
- Мин Москвада даа чуртапчатсам, тоғынчатсам, Хакасиядағы хабарларны, алызығларны сыбыра хайығда тутчам, чӱрексіпчем. Хазых хайраллиры ӱчӱн матап сағыссырапчам. Ковидтің пастағы салғағында Москваның табырах полызығ пирҷең станцияларының тоғынҷылары, имҷілері прайзы ағырыбысхан тиирге чарир. Прививка турғызыбысханда, ікінҷі паза ӱзінҷі салғағында піс азахта пик турғабыс. Аннаңар мин тіпчем, СМИ-ларда, Интернетте «чайылчатхан» искіріглерге киртінерге кирек чоғыл, кирек имҷілернің, специалисттернің чоохтарына хайығ айландырарға. Вакцина - ол чалғыс оңдай, хайзы пісті ағырығдаң арачылап алар.
Халғанҷы туста «антиваксеры» наа сӧс хазнаҷа тарап сыхты. Олар - вакцинадаң тоғыр полчатхан кізілер. Андағлар полған на площадкада кізілерні прививка турғыстырбасха чӧптепчелер. Минің хылығым тутча пу чӧрімге кірчеткеннерге. Оларға тиирҷікпін: «Син прививкадаң
тоғыр ползаң, пол! Тапсабин одыр чылығ ибіңде. Кирек чоғыл, эфирлерге сығып, чонны прививка турғыстырбасха хығырарға! Син пілбинчезің, хайди ирееленчелер имнег тураларында чатчатхан пациенттер паза хайдағ аар оңдайларда тоғынарға килісче «хызыл зонадағы» имҷілерге!»
QR-кодтаңар чоохтаза, сағынчам, ӱлгӱ, ковидтең тоғыр харбазар паза пасха оңдай таппин, аны кирерге пӧгінче полар.
Снежана МИЦУКОВА, іҷе, ӱгретчі:
- Амды кӧп чоох парча саарбахтарға вакцина турғызардаңар. Ол, тізең, толдыразынаң істезілбеен. Мында кӧп сурығ сығысча. Хайди ол пістің палаларыбыстың хазиина теелер? Аның соонаң оларның пала полар ба? Толдыразынаң экспертиза ирткен ме...? Аннаңар саарбахтарға прививка турғызарға маңзырабасха кирек тіп сағынчам.
«Азых чоохтазығ» гражданскай форумда полған на кізее аралазарға чарир, ол санда zoom пастыра (https://zoom.us/]/961960909б9). Площадкаларның графигінең форумның сайтында http://dialog19.ru танызып аларға чарир. Андох чоохтазығда аралазардаңар сурыныс пічиин артыс саларға оңдай пар.
- Мыннаң мындар халых чон кизе-тоғыр кӧрістіг полбас ӱчӱн піске чоох алысчаң мындағ площадка кирек полған. Хайда піс удур-тӧдір позыбыстың сағыс-кӧрізібіснең ӱлесчебіс. Піс піліп аларға кирекпіс, халых чон паза хазна пірге полып ла, коронавирус чуғынҷах ағырығны чиңіп аларбыс, - таныхтаан чооғында экономист Евгений Мамаев.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде