ХАКАСИЯНЫҢ ТУРИЗМ ОҢДАЙЛАРЫ ТЫЫДЫЛАР
03.12.2021
Хабарлар
Тоғазығ. Хакасия пазы Валентин Коновалов Москвада «Туризм.РФ корпорация» АО-ның ӧӧн директоры Сергей Сухановнаң тоғасты
Тоғазығның ӧӧн сурии - республикада туризм инфраструктуразын тилідері. Ідӧк Валентин Коновалов паза Сергей Суханов регионның туризм оңдайларын паза корпорацияның Хакасия правительствозынаң пірге тоғызын ӱзӱргеннер.
- Алнында пісті Хакасия правительствозының паза «Туризм. РФ корпорацияның» ӱрге паза тӱзімніг пірге тоғызы сағыпча, хайзы инвесторларнаң палғалызар. Піс ізенчебіс, салтарында туристтерге наа гостиницалар, ниик, хорғыс чох паза хынығ чоллар тӧстеп поларбыс. Республика тынанҷаң
чахсы оңдайлығ, пілістерні алғытчатхан, аал хонии паза экология туризмніг орын адына турыс полар. Прай ол регионның паза хазнаның сығарыс синін ӧскірерге, чуртас-экономиказын тилідерге полызар, - теен республика пазы Валентин Коновалов.
Туризм.РФ корпорацияның паза Хакасияның пірге тоғыс салтары чыл ибіре тоғынар «Поднебесье» турист кінін тӧстиріне, Приисковай аалның тиксі тилізіне, «Гладенькая» саналығ чылҷаң курортты алғыдарына паза «Шира кӧл» курорт» санаторийні нааҷылирына кӧстелген.
- Регионда тилітчең хайхастығ орыннар пар: тустығ суғлығ сын ӧліг талай, им-том палғастығ бальнеология курорттары, пурунғы пай культуралығ орыннар, кӧзідімге, пістің эраның 5 чӱс чыл алнындох тӧстелген Салбых кӱрген чазызы. Пу чағында Хакасиядағы орыннарның чир-чайаан паза туризм оңдайларын паалирға корпорацияның специалисттері ызылар. Иң чахсы оңдайлығ орыннарға мастер-планнар тимнелер, ол санда чол-транспорт паза инженер инфраструктуразының паза тиксі дизайн-кодының схемалары. Тиксі кӧрілген сылтаанда пӱдіріг ай-пораан апарылбинча, нинҷе-де орыннаң пірге турист кластерін тӧстирге полысча, хайда ибіркі чир-чайаанға сибер хайығ паза орындағы чуртағчыларға чуртас-экономика теелізі полар, - таныхтаан Туризм.РФ корпорацияның ӧӧн директоры Сергей Суханов.
«Туризм.Рф корпорация» акционер пірігізі регионнарның туризм инфраструктуразын тилідерге, істіндегі паза тастындағы туризм оңдайларын алғыдарға тӧстелген. Субъекттернең хада корпорация, хазнанаң бизнесті пірге тартып, турист кластерлерін тӧстирінең паза анда инфраструктура тимниріне инвестициялар кирерінең айғасча. Хада-пірге тоғынардаңар чӧптезіглер 20 регионнаң иділген, ол санда Сибирь регионнары: Хакасия, Алтай, Бурятия, Саха (Якутия), Иркутск паза Кемеров областьтары.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде