ХАДА-ПІРГЕ ТОҒЫНЗАБЫС, ЧОНҒА ХОРҒЫС ПОЛБАС
03.12.2021
Хабарлар
Комиссия чыылии. Хакасия пазының орынҷызы Юрий Курлаев МЧС-тың Хакасияңа Ӧӧн управлениезінде сағыбаан саайларҷа комиссияның чыылиин иртірген
Чыылығның тоғызы пасталар алнында, комиссия кізілері Кемеров облазындағы шахтада пол парған саайда кізілернің чуртазы ӱзілгені хоостыра, пір минута сым турып, ол чобағда хыйалланғаннарға хомзынызын читіргеннер.
Хайди таныхтаан Юрий Курлаев, Хакасияда киректер хомай нимес парча. Чыылығда комиссия алған чарадығлар хайди толдырылғанын кӧрібізерге кирек. Халғанҷы туста республикада чилліг, хуруғ кӱннер турчатханда, чазыларда ӧрттер сыхча. Іди Алтай, Ағбан пилтірі аймахтарда, Саяногорск хыринда ӧрттер сыххан, ӧрт ӱзірҷеңнер, табырах хайынып, орындағы чуртағҷылар полызиинаң оларны ӱзіргеннер. Муниципальнай пӱдістерде патрульлар тӧстелген, ааллар ибіре ӧрт иртірбес полосалар тартылған. Прай мындағ тоғыстарны часхаа теере тоос саларға кирек полар.
МЧС-тың Хакасияҷа ГУ пастығының орынҷызы Андрей Якуниннің чооғынаң, пӱӱл республикада 1943 ӧрт ӱзірілген, анда 36 кізі ӱреен, 19 кізі палығлатхан. Ӧӧнінде сӧп-сап паза хуруғ от кӧйче. Песнең, электрооборудованиенең саба тузаланған сылтаанда удаа ӧрттер сыхча. Орджоникидзе паза Асхыс аймахтарынаң пасха муниципальнай пӱдістерде ӧрттер саны хызырылча. Контейнерлерде сӧп-сап удаа кӧйче, ӧрт ӱзірҷеңнер аңдағ ӧрттерні ӱзірерге 638 хати чӧргеннер. Чағдапчатхан ӱлӱкӱннерде пу сан улам ӧзер.
Хакасияның ГО, ЧС паза ПБ управлениезінің пастығы Николай Старков аалларҷа нинҷе рейд иртірілгеннеңер, нинҷе листовка тарадылғаннаңар искірген. Управление тоғынҷылары, иблеп чӧріп, чуртағҷыларнаң чоохтазығлар апарчалар, тураларда ыс сыхчатханнаңар искірҷең приборлар турғысчалар. Пӱӱл прай 11255 рейд иртірілген, 18644 листовка тарадылған, 77 протокол пазылған, 166 административнай кирек азылған.
МЧС-тың Хакасияҷа ГУ-зының пӧлік пастығы Олег Абашиннің чооғынаң, пӱӱл республикадағы суғларда 10 кізі саайланған (пылтыр - 14), 12 арачылағ посты тоғынған. Хысхыда пуссар сығарға хорғыстығ орыннарда табличкалар турғызылча, чарадығ чох азылған кичіглер чабылча. Олғаннарнаң профилактика чоохтазығлары апарылча.
МЧС-тың Хакасияҷа ГУ пастығының орынҷызы Алексей Максименко чонға искіріглер читірҷең системаларның тоғызынаңар чоохтаан. «Хорғыс чох город» программа хоостыра городтарда 233 видеокамера тоғынча. Сағыбаан саайлар полдыртпас паза ӧрттер сығарбас пӧгіннең муниципалитеттерде объекттер хорғыс чох паспорттар алчалар.
Ідӧк, хайди искірген Алексей Максименко, Кемеров облазындағы «Листвяжная» шахтада полған саайда 51 кізі ӱреен, ол санда 46 шахтер паза 5 арачылағҷы. Хакасияда чир алтында 2 предприятие тоғыстар апарча: Ағбан руднигі паза Коммунардағы рудник. Хакасияның пазы ол предприятиенің устағҷыларынаң анда тоғыс хорғыс чох хайди апарылчатханын истіп аларға чахығ пирген.
«Ағбан руднигі» ООО-ның директоры Виталий Михеевтің чооғынаң, 2016 чылдаң сығара рудникте тоғыстар хорғыс чох наа оңдайнаң апарылча. Анда сыныхтағлар иртірілче, ӧрттең тоғыр наа оборудование алылған. Предприятиеде хадағ службазы тӧстелген, анда 14 кізі тоғынча. Чара чачырас тоғыстары пасталар алнында чир алтынаң прай тоғынҷылар сығарылчалар. Чир алтында вентиляция оборудованиезі тоғынча, ідӧк предприятиеде 23 кізіліг арачылағ отряды тӧстелген. Арачылағҷылар ӱгредіглер иртірчелер, сағыбаан саайларда тоғынарға тимделер.
«Коммунаровский рудник» ООО-наң устапчатхан директорның тоғызын толдырчатхан Игорь Богатырёвтың чооғынаң, предприятиеде 800 кізі істенче, 160 кізі чир алтында тоғыстар апарча. Прайзы аттестация иртче. Предприятиеде 20 кізіліг арачылағ командазы пар, оларның, саай полза, кізілер хайдазын кӧзітчеткен приборлар пар. Арачылағҷылар ідӧк аттестация иртчелер. Пӧзік квалификациялығ кадрлар чоғылын читпеске санирға чарир.
Ростехнадзорның Енисейскай управление устағҷызының орынҷызы Владимир Шафорост Коммунардағы рудникте полған саайдаҷар искірген. Аның салтарында 38 сайбағ ілезіне сығарылған, пыролығ кізілер административнай нандырыға тартылғаннар. Предприятие устағҷызына дисквалификация идер материаллар прокуратуразар ызылған. Аннаң андар чарғы кирек чарадығ алар.
- Прай тоғыстарны сыбыра апарарға кирек. Пірее ниме пол парза ла, сыныхтағлар пасталча. Республикада хара тас аныпчатхан разрезтер тоғынчалар, анда тоғыс азых оңдайнаң апарылча, че олар даа тоғынҷыларға хорғыс полдыртпазына алынҷа хайығ айландырарға кирек. Хакасия правительствозы адынаң чахсы тоғыс ӱчӱн прайзына алғыс сӧстерін читірчем, - теен Юрий Курлаев.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде