АҒБАН - ХООСТАРДА
24.12.2021
Хабарлар
Ағбанға - 90 чыл. Город пазы Алексей Лёмин Наа чыл алнында хоосчыларнаң тоғасхан, оларға улуғ нимес сыйыхтар читірген, чайаачы тоғыстары ӱчӱн алғыстаан, тузалығ палғалысты тохтатпасха кирек теен
Пӱӱл январь айда городтағы Ф.Е.Пронскихтің адынаң «Чылтыс» кӧзідіг залында «Хысхы - Сибирьдегі хоосчыларның тоғыстарында» чапсых кӧзідіг азылған, кӧп кізінің хайиин тартхан. Ол Ағбанның пайрамнығ 90 чылына чарыдылған полған.
- Піс, хоосчылар, андада сағысха тӱзібіскебіс: ноға постарыбысха «Хысхыдағы Ағбан» хоостар кӧзідиин тимнебізерге чарабас? Ол сағыснаң город пазынзар чӧптезерге килгебіс. Алексей Викторович сах андох хоостар кӧзідиин иртір турарға чарадыбысхан, - ӱлесче позының сағыстарынаң Ағбандағы Д.И.Каратановтың адынаң олған хоос школазының ӱгретчізі Надежда Кобыльцова, пу чӧрімнің пастағӌыларының пірсі.
Город пазының кӧрізінең, тізең, Ағбанның сомнары тиксі махтаға сыхчалар, городыбыстаңар наа книгалар пазылчалар. Че хоостар чоғыл даа тиирге чарир. Аннаңар Алексей Лёмин хоосчыларның сағыс-пӧгіннерін сала алғыдыбысхан, Ағбанның чуртазы чыл ибіре хайди парчатханын чарыт саларға паза кӧзідіглерге сығар турарға. Паза пу тоғысха ӱгренӌілерні ара тартарға. Туза ла полар.
- Чарадығ алылған, толдырарға кирек. Январь айда 30 градус соох. Піс Ағбанның ӧӧн аптеказын хоостап парчабыс. Кізілернің хайхапчатханы оңнығ ла нимес. Оларға хайығ айландырбинчабыс, тоғынҷаан на тоғынчабыс. Холларыбысты чылыдып аларға аптеказар кір пар килчебіс, - чоохха хозылча пос кӧңнінең хоостапчатхан чайаачы ус Алексей Киселев, анаң хосча. - Анзын пір дее ундутпаспын.
Пола-пола килгенде, олғаннарның «Орленок» тынағ паркында, «Чиңіс» культура кіні алнында одыр салған хоосчыларны кӧрерге килісчең. Чайаачы устарға маңзырирға киліскен. Ағбанның тӧреен кӱніне чарыдылған хоостар кӧзідиин 30 апрельде иртірерге чарадығ алылған. Анда хайди даа аралазарға кирек. Пу чӧрімнің устағӌызына Юлия Чурилова турғызылған. Уғаа чалахай чайаачы ус, кемні дее табырах чӧптеп алча, город пайрамына чарыдылған кӧзідіглерні тузында иртір турарға кӧӧктір сыхча, Алексей Викторовичтің хай пірее чазыттығ пӧгіннерін ас пирче. Ол санда хоостар альбомын чарыхха сығарарға тимненчеткеннерінеңер чоохтабысхан.
- Піс, тыстан полбин, город тастынзар даа сығып пастабысхабыс. Анда даа сіліг кӧрімнер. Хоостирға ӱгренчеткен палаларны хада алып алчаңмыс. Іди город администрациязының полызии сылтаанда тӧрт хати Ағбан тастында чайаачы тоғыснаң айғасхабыс, - чоохтапча Ольга Мормылева, олған хоос школазының ӱгретчізі.
- Минің мындағ чӧп - пу хоостарны, чыып салып, чибіргі чыл пазынаң город пайрамына чарыдып, ӧнетін кӧзідіг иртірерге. Чибіргі чыл ӱр пілдірче полар. Че ол табырах ирт парар. Ағбаныбыс 2021 чылда хайдағ полғанын кӧріп аларбыс, - айланча Алексей Викторович хоосчыларзар.
Олар, аның сағызынаң чаразып, айа сабызынаң нандырғаннар. Сынап таа, чибіргі чыл табырах ирт парар. Че ол тус аразына Ағбаныбыс алыс чӧрібізер. Пӱӱл хоосталған орыннарны танып таа полбас. Аннаңар хоостар алтында прай пас саларға кирек тіп чарат салғаннар.
- Піс андада 35 - 40 частығ поларбыс па? Чох, 30 -35 частығ... Чарирчых кӧріп аларға, - сым-туюххан сыбыхтасхлапчалар алнымда одырғлапчатхан ӱгренӌілер.
Анаң Ағбан городтың пазы Алексей Лёмин хоосчыларға паза оларның ӱгренӌілеріне Аарластығ пічіктер, хоостары чыылған сомнығ альбомнар, календарьлар сыйлап пастаан. Ӱгретчілернің піреезі Алексей Викторовичті алғыстап турған. Іди Марианна Касимова мындағ чӧптезіг прайзына туза ағылчатханын таныхтаан. Марат Бурнаков пу тузалығ чӧрімде хайди даа аралазарға пӧгінче, тӱзімніг тоғынар прай оңдайлар табьілчатханын чазырбинча.
Ӱгренӌілер аразынаң Анита Тохтобинаны, Арина Абдиримованы, Саяна Болотаалыеваны паза даа пасхазын таныхтирға чарир. Василиса Нагель, тізең, Ағбанның сіліг кӧрімнерін хоостапчадып, олардаңар хысхаӌах, че уғаа чӱрексіністіг чоох пас салтыр. Аны тоғазығда араласчатхан кізілерге хығыр пирген, махтатхан, матап ӧрінген.
- Пілчезер бе, арғыстар, пазох пір чазыттығ сағызымны ас пирим: 2022 чылда Ағбанның пірее культура учреждениезінде олғаннарның хоостар кӧзідіг залын азарға чарадығ алылған. Амды ағаа килістіре орын кӧрглепчебіс, - анымӌохтазар алнында прайзын ӧріндірген Ағбан городтың пазы Алексей Лёмин.
Автор :
Анатолий ЕГОРОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы