Республика правительствозы пу чылдағы халғанӌы чыылиин иртiрген
28.12.2021
Хабарлар
Хакасияның пазы Валентин Коновалов 28 декабрьда правительствоның пу чылдағы халғанӌы чыылиин иртiрген. Чыылығның ööн сурығлары Хакасияда "Ӱгредiг" паза "Демография" кöстеглерӌе нацпроекттер чуртасха кирiлчеткенiнiң ортынғы салтарлары полған.
Че пастап министрлер кабинедi правительствоның чарадығ проекттерiн ӱзӱрiбiскеннер. Оларның пiрсi автотранспорт техосмотрын иртiрӌең пааларға теелген. Пу сурығӌа Госкомтарифэнерго устағӌызының орынӌызы Елена Лобань чоох тутхан. Аның чооғынаң, мындағ полызығлар пирчеткен пiрiгiстер аразында мониторинг иртiрiлген, техосмотр ӱчӱн пааны кöдiрердеңер чöптер кiрбеендiр. Андағ оңдайнаң, килер чылға тарифтi öскiрбеске, аны 2021 чылның синiнде артыс саларға чарадығ алылған.
Паза пiр чарадығ проектi чуртағӌыларға, устапчатхан компанияларға садылчатхан хара тастың паза одыңның чарадылчатхан иң пöзiк пааларын турғызарынаң палғалыстығ полған. Пу пааларны iдöк 2021 чылның синiнде артыс саларға чарат салғаннар.
"Ӱгредiг" паза "Демография" нацпроекттерӌе тоғыс хайди парчатханынаңар Хакасияның ӱгредiг паза наука министрi Лариса Гимазутина сан пирiс иткен.
- "Ӱгредiг" нацпроектче 2019-2021чылларда республикада 5 школа пӱдiрiлген, - искiрген министр. - Олар прайзы тузаланысха кирiлгеннер паза лицензиялығлар. 2 школа 2022 чылда тузаланысха кирiлер: Пирiкчулда паза Ағбандағы "Солнечный" микрорайонда.
"Демография" нацпроектче пуох тусха Хакасияда 17 олған сады пӱдiрiл партыр. Ағаа хоза, Харатастағы 300 орынға олған сады тӱрчедең тимге сығар осхас.
Ӱгредiг паза наука министрi iдöк кöп школаларда паза олған садтарында тиксi тоғыстары толдырылғанын, кирек ниме-ноолар алылғанын таныхтаан.
Аннаң пасха "Ӱгредiг" нацпроект хоостыра 3 чыл аразына 28 спорт залы тыхталтыр.
Чыылығдағы прай сурығлар ӱзӱрiлген соонаң Хакасияның пазы Валентин Коновалов правительство кiзiлерiне пу чылда чахсы тоғыныбысханнары ӱчӱн алғызын читiрген паза чағдапчатхан наа чылнаң алғыстаан.
Автор :
Альберт Толмашов
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде