ЧОНЫБЫС ХУДЫ СӦБІРЕДЕ ЧУРТАЗЫН
29.12.2021
Хабарлар
Сыйыхтас. Ӱр ниместе Ағбанда С.П.Кадышевтің адынаң культура кінінің кічіг залында «Тӧреен тіл - чонның худы» сӧбірелер аразындағы марығда чиңіс тутханнарны таныхтааннар
Чыылған чонға позының теелбегін кӧзіткен «Кӱн чахайағы» сарын паза теелбек ӧмезі. Устағӌызы - Хакасияның саблығ артизі Анна Бурнакова паза балетмейстері - Александра Анжиганова.
«Тӧреен тіл - чонның худы» марығ республика синінде пӱӱл 5-ӌі хати ирткен. Аның тӧстегӌілері - республикадағы хакас чонның Улуғлар чӧбі, Хакасияның ӱгредіг паза наука, национальнай паза территориальнай политика паза культура министерстволары.
Пу марығның ӧӧн пӧгіні хакас сӧбірелерде чон кибірлерін паза пос тілін хайраллиры паза тилідері полча. Марығ араласчылары пастап муниципальнай синде таллағ ирткеннер, анаң республика синіндегі марығда араласханнар.
Марығ ӱс номинацияӌа ирткен: «Хакастарның посты улуғлир киктезі», «Минің род-сӧӧгім» паза «Хакастарның алыптығ нымағы». Прай ӱс номинацияда араласхан сӧбірелер хоза 100 балл ал турғаннар.
Іди, ӱс номинацияда аралазып, ӧӧн чиңіс тутхан сӧбірелерні сыйыхтирға сыххан республикадағы хакас чонның Улуғлар чӧбінің кнезі Пётр Воронин. Ол позының чооғында піди таныхтаан:
- Пу чылда танығлығ ӱлӱкӱннер полғаннар. Піс хакас чонның 14-ҷі съездін иртірібіскебіс, анаң Хакас Республиканың 30 чылын таныхтаабыс. Паза пӱӱл Алыптығ нымах чылы чар-лалған. Аны хоостыра 300 азырох мероприятие иртірілген.
Марығны иртіріп пастааннаң анда 400 азыра сӧбіре араласхан. Аның салтарлары кӧріндіре. Хакас тілін ӱгренчеткен паза пілчеткен олғаннарның саны чыл сай ӧсче. Чоохтирға кирек, пасха нация даа олғаннары хакас тіліне ӱгрен сыхханнар.
Палаларын хакас тіліне паза кибірлеріне ӱгретчеткен паба-іӌелерге улуғ алғызымны читірчем! Анаң Пётр Иванович Воронин чиңісчілерге сыйыхтар читірген.
Іди пастағы орынны Таштып аалдаң килген Тороковтар сӧбірезі алып алған, ирепчее 10 муң салковайға сертификат паза сыйых пирілген. Ікінҷі орында Ағбандағы Домогашевтер сӧбірезі пол парған. Оларға 8 муң салковайға сертификат читірілген. Ӱзінҷі орынны Маткичіг аалдағы Чебодаевтер сӧбірезі алған. Оларға 6 муң салковайға сертификат пирілген.
«Чон кӧглері» ӧме (устағҷы Ираида Карачакова) «Кӧк тайғам» сарынны толдырған соонда сценаа Хакасияның культура министрінің орынҷызы Лариса Киштеева сыххан. Ол «Хакастарның алыптығ нымағы» номинацияда чиңіс тутхан сӧбірелерні таныхтаан.
Іди пастағы орынға сыххан Асхыс аймаандағы Черебеевтер сӧбірезі. Оларға 5 муң салковайға сертификат читірілген. Ікінҷі орында Асхыс аймаандағы Чочиевтер паза Харатас городтағы Угдыжековтар сӧбірелері. Оларға 3-ер муң салковайға сертификаттар сыйлааннар. Ӱзінҷі орынға ӱс тее сӧбірені таллап алғаннар: Асхыс аймаанаң Томочаковтар паза Тайдоновтар сӧбірелері паза Харатас городтағы Шрамовтар сӧбірезі. Оларға 1500-ер салковайға сертификат пиргеннер.
Анаң «Минің род-сӧӧгім» номинацияда утхан сӧбірелерні сыйыхтиры парған. Ол киректі толдырған Хакасияның ӱгредіг паза наука министрінің орынҷызы Юрий Сагалаков. Ол пастап пос кибірлерін паза тілін сӧбірелерде хайраллапчатханнарны алғыстаан. Юрий Гавриловичтің таниинаң, пістің республикада 150 школада паза 83 олған садында 14 муң чарым олған хакас тіліне ӱгренче. Оларның 6 муңы хакас нимес. Анзы ӧріністіг. Килер чылда хакас тіліне пос алынҷа ӱгренер учебниктер паза сӧстіктер сығарылар.
Анаң Юрий Сагалаков чиңісчілерні сыйыхтаан. Чиңіс тутхан Асхыс аймаандағы Сунчугашевтер сӧбірезі. Ікінҷі орында - Ағбан городтағы Шулбаевтер паза Асхыс аймаандағы Бильтрековтар сӧбірелері. Ӱзінҷі орын ӱс сӧбірее пирілген: Ағбан городтағы Топоевтер паза Чебодаевтер сӧбірелері, ідӧк Шира аймаандағы Тороковтар сӧбірезі. Оларға ідӧк ахчалығ сертификаттар читірілген.
«Час ханат» эстрада студиязы теелбек салған соонда сценаа сыххан Хакасияның национальнай паза территориальнай политика министрінің орынҷызы Лев Сафьянов.
Ол «Хакастарның посты улуғлир киктезі» номинацияда чиңіс тутханнарны сыйыхтаан. Чиңіс тутхан Ағбан городтағы Чебодаевтер сӧбірезі. Ікінҷі орында пол парғаннар Ағбан городтағы Топоевтер паза Шира аймаандағы Тороковтар сӧбірелері. Ӱзінҷі орынға ідӧк ікі сӧбіре сыххан: Ағбан городтағы Шулбаевтер паза Асхыс аймаандағы Тахтобиннер. Оларға ідӧк ахчалығ сертификаттар пиргеннер.
Ниме ӧріндірген? Мындағ марығларда чыл сай араласчатхан сӧбірелер саны хозылчатханы. Че ниме хомзындырған: сертификаттар ахчазы асхынах полғаны. Мин сағынғанда, пос тілін паза кибірлерін, хайраллап, тилітчеткен сӧбірелерні турыстығ арах таныхтап турза, чахсы поларҷых.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы