ЧАРЫТХАН СУҒ ИМНІГ ПОЛЧА
20.01.2022
Хабарлар
Худай ӱлӱкӱні. Алнындағы кӱн, 19 январьда, Худайға киртінчеткен кізілер Мылтых ӱлӱкӱнін таныхтааннар
Иисус Христос кірӧске тӱскен кӱнні улуғ ӱлӱкӱнге санапчалар, ідӧк Худай кізілерге кӧрінгенін (Богоявление) таныхтапчалар. Христос кірӧске тӱсчеткенде, Иордан суғзар килген кізілер, хайхастығ нимені, истіп, кӧргеннер. Иисус суғдаң сых килгенде, азыл парған тигірдең Худай Адазының ӱні истілген, анаң Худай Худы, голубь хус полып, Иисус Христоссар, Худай оолғынзар тӱскен. Оларны кізілер Ах арығ Ӱзӧлең (Святая троица) тіпчелер.
Мылтых кӱнінде Ағбан городтағы Никольскай тигірибзер кізілер кӧп чыылысханнар. Анаң, тигірибде пазырған соонда, чарых тонан салған абыстар архиепископ Ионафан устаанынаң ырах ниместегі Ағбан суғзар чол тутханнар. Сах андох Никольскай тигірибнің саңнары кӧгліг сыңырап сыхханнар. Тигірибдегі Худай сарыннарын толдырчатхан ипчілернің кӧглері ибіре ырах истілген. Соонда парчатхан кізілер ол Худай сарыннарына хозылчатханнар. Олаңай кӱн дее полза, ноға-да олғаннар кӧп полған. Школаа парбаан поларлар чи?
Субалыстыра парчатхан кізілер, чікім арах чардаң тӱзіп, ырах ниместе киртіп салған тилті ибіре турғлааннар. Анаң абыстар, кадилодаң ыс пырлада аластап, тилті ибіре кӱн чолында чӧргеннер. Худайға пазырып, молитвалар хығырып, Ӧӧркі Ададаң амыр чуртас, киртініс паза ах сағыстығ поларға сурынғаннар.
Прай киртініс кибірлерін иртіріп, тилтідегі суғны, улуғ кӱмӱс кіреснең ілдірбеӌекте тудып, чарытханнар. Анаң андартын суғ сустып, архиепископ Ионафан ибіркі кізілерге, алғаан оңдайнаң, ол ах арығ суғны чачыратхан. Тигірибде полысчатхан монахтың холынаң ах ӧңніг голубьты алып, Ионафан аны тигірзер позыдыбысхан. Хус, тигірзер ӧӧрлеп, турчатхан чон ибіре учуғып, город саринзар учуғыбысхан.
Тилтідегі суғны кӱмӱс кіреснең чарытхан соонда кізілер андартын постары ағылған аймах ідістерге сустып пастааннар. Анда турчатхан пір иреннең ноға анда кӧп ідіс тудын килгезер тіп сурғанымда, ол мағаа нандырған: «Мин іҷеме паза хонҷыхтарыма апарчам. Позыма даа урып аларға». «Аннаң ниме итчезер?» - аннаң андар тӱптестіргем. «Піс пу суғнаң имненчебіс паза тура істін чабал нимелердең арығлапчабыс», - теен ирен, анаң тилтізер кізілер аразында ирт парыбысхан. Пӱӱл Мылтых ӱлӱкӱнінде чылығдаңар кізілерге хараазын суға кірерге чочыныстығ полбаан.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы