ХОРҒЫС ЧОХ ЧАХСЫ ЧОЛЛАРНЫҢ САНЫ ӦСЧЕ
02.02.2022
Хабарлар
Чыл сан пирізі. Хакасияның транспорт паза чол хонии министрі Дмитрий Василиади Хакасия пазы Валентин Коноваловха ведомство тоғызының ирткен чылдағы салтарларынаңар чоохтаан
Ирткен чылда федеральнай, регион паза орындағы бюджеттердең позыдылған ахчаа чоллар, автобус тохтағлары тиксі тыхталғаннар, нааҷылалғаннар, тасхархы фонарьлар турғызылған, тротуарлар иптелген, чоллар хастада сиденнелген. Регионның, муниципалитеттер паза ааллар аразындағы чолларның 117,32 километрі тыхталған. Хорадығларның тиксі паазы - 2,7 миллиард азыра салковай.
Ағбан - Кӧк хайа чолның Ким суғ кизіре тахта алнындағы кизегі нааҷылалған паза Таштып аймаандағы Кічіг Анзас суғ кизіре тахта тузаланысха кирілген. Солнечнай аалзар парчатхан чолның 7,6 километр кизегі тыхтал парған. Шира - Новосёлов, Хойбал - Кӧк хайа, Пригорск - Чорба, Ағбан пилтірі - Чарков - Чорба, Ағбан - Саяногорск чолларның кизектері нааҷылалғаннар. Ағбаннаң Хубачарға теере чарытхы тартылған. Региондағы чолларны хайраллап халар ӱчӱн, Ағбан - Ах тобырах чолда таарлағ машиналарның кӧдірімін сыныхтаҷаң пастағы пункт азылған.
Хакасияның транспорт паза чол хонии министерствозының 2021 чылдағы пӧгіні «Хорғыс чох чахсы чоллар» национальнай проектті толдырары полған. Прай тоғыстарға 1 миллиард 178 миллион салковай кӧрілген. Нацпроектче Ағбанда 3 азыра километр чол тыхталған, Харатас городта - 6,6 азыра километр, Ағбан пилтірі аймаанда - 2,3 азыра километр, Алтай аймаанда - 4,9 азыра километр. Ағбан городты ибірчеткен чолны паза Тазоба суғ кизіре тахтаны тыхтирына 200 миллион азыра салковай позыдылған. Ағбан - Бийск транспорт коридорынзар кірчеткен Ағбан - Улуғ Ор - Таштагол паза Асхыс - Пирікчул - Тӧӧ пазы чолларны пӱдіреріне паза нааҷылирына федеральнай бюджеттең 133 миллион азыра салковай пирілген. Улуғ проект хоостыра пу ахчаның 76 миллион салковайы Ағбан - Улуғ Ор - Таштагол чолның Тӧӧ пазы - Шора - Изыхгол кизегін пӱдіреріне хорадылар. Пу тоғыс 3 чылға кӧріл парған. Пӱӱл специалисттер чир тоғыстарын толдырарлар. Федеральнай бюджеттең пирілген 57 миллион салковайы Ағбан - Бийск проектіне кірчеткен Асхыс - Пирікчул - Тӧӧ пазы чолның 68+210 км 73+000 км тыхтирын узарадарына кӧрілген. Амғы туста пу чол республика бюджеді ахчазына нааҷылалча.
Хакасия пазының чахиинаң кӧп чон чыылчатхан орыннарда санитар-эпидемиология кирексіністері толдырылчатханына улуғ хайығ айландырылған. Халых чон чӧрчеткен транспортта наа чуғынҷах ағырығ тарабас ӱчӱн, республиканың транспорт паза чол хонии министерствозының тоғынҷылары чуртағҷылар маска кис чӧрңең режимге тудынчатханын сыныхтааннар.
Турист комплекстерінзер чахсы паза хорғыс чох чидіп алар ӱчӱн, регионның транспорт паза чол хонии министерствозы иң танығлығ орыннарзар парчатхан чолларны тыхтирынаң айғасча.
- Чол-транспорт инфраструктуразын чахсыландырары - Хакасияның тиліс пӧгінерінің пірсі. Аннаң экономика ӧзізі, социальнай паза культура палғалыстарын тыыдары, республика чуртағҷыларының иптіг паза хорғыс чох чуртазы палғалыстығ. Хакасия правительствозы чолларны тыхтирынҷа ахчаны чылдаң чылға кӧптең кӧп пирче, регионда хорғыс чох паза чахсы чолларның саны ӧсче, - таныхтаан Хакасия пазы Валентин Коновалов.
Автор :
Тимнеен Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы