КОВИД ПІРДЕЕЗІНЕ АЙАБИНЧА
02.02.2022
Хабарлар
Кӧні эфир. Хакасия пазы регионда коронавирус тың тарап сыхханы хоостыра соцсетьтерде чуртағҷыларның сурығларына нандырған
Кӱнде наа ағырыға 700 азыра кізі хаптырча. Имҷілерзер улуғ теестер. Аны хоостыра кӧні эфирде регион пазына сурығлар кӧп полған.
- Халғанҷы кӱннерде ковид табырах тарап сыхты, аннаңар имҷілернің тоғызы улам хозыл парды, - искірген Хакасия пазы Валентин Коновалов. - Амды иді ізіпчеткен кізілернің хазиин сыныхтапчатхан кабинеттер 20.00 часха теере тоғынчалар, соона салдыртпин имнег полызиин пирҷең служба - 22.00 часха теере.
Ағырығ ниик иртчетсе, имнег туразынзар парбасха чӧп пирче Хакасия пазы. Ибдең сығара Интернет пастыра nadom@mb19.ru электроннай почтаҷа больничнай лист азарға, имҷіні хығыртарға чарир. Имҷілер дее амғы туста постары кӧп ағырчалар, аннаңар тоғынҷаң кізілер чидіспинче. Че ит ізии пӧзік полза, хайди даа имнег туразынзар айланарға кирек.
Валентин Коновалов, оңдай полза, ибде одырарға, кӧп чон чӧрчеткен орыннарда маска кизерге чӧп пирче. Республиканың хазых хайраллаҷаң министерствозы наа орғаннар санын хосча.
Коронавируснаң кӱресчең кізілер чидіспинчеткенде, имнег училищезінің паза институдының студенттері, волонтёрлар, халыхчылар полызыға килчелер.
- Тесттернің салтарлары хаҷан тимде полча? - сурғаннар социальнай сетьтерде одырчатхан чииттер.
- Тест салтарлары 48 час аразына пілдістіг полбаза, андада ізіг линиязар сығдырадарға чарир. «Хазна полызығлары» порталзар, тізең, салтарлар тудығ чох килчелер, - теен Валентин Олегович.
- Ноға республикада локдаун чарлабинчазар? - пілерге хынғаннар чуртағҷылар.
- Пӱӱнгі кӱнде организацияларның тоғызын тохтатпаҷаң оңдайлар ам даа пар. Пілдістіг, имнег тураларынзар кізілер кӧп кір сыхсалар, піске хатығластар кирерге килізер, - нандырған регион пазы.
- Ноға олған садтары тоғынча? - полған сурығ.
- Олған садтарында дежурнай группалар азарын муниципалитеттер постары пӧкчелер. Кӧп организация-предприятие тоғынча. Олған садтарын чабысса, іҷе-пабаларға иркелерін ибде артысчаң оңдайлар тілирге килізер. Амғы коронавирус палаларға чуғар пол партыр, - теен В.О.Коновалов.
- Ноға «КрасныйЯр», «Батон», «Пятёрочка» садығ туралары кізілернің ит ізиин синебинчелер? - сурған пір ипчі.
- Синирге киректер. Адрестерін пас пиріңер, сыныхтағҷыларны ызарбыс, - полған Хакасия пазының нандырии.
- Культура паза спорт мероприятиелерін тохтадыбызарға киліскен. Андағ чарадығ пазох ла наа чуғынӌахтың тарапчатханынаң палғалыстығ, - теен Валентин Олегович.
Кӧні эфирлерде Хакасия пазынаң ээзі чох адайлардаңар сыбыра сурчалар. Кізілер, андағ адайлардаң чочынып, палаларын школаа постары ӱдесчелер. Ээзі чох адайлар сурығлары ӱчӱн муниципалитет пастары нандырча.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы