ХАКАСИЯДАҒЫ ӦӦН ВУЗ ЧИИТТЕРНІ ХЫҒЫРЧА
02.02.2022
Хабарлар
Абитуриент-2022. Профессиональнай ӱгредіг организацияларында приемнай кампаниялар пасталғалах таа полза, школа тоосчатхан чииттер чуртастарын хайдағ профессиянаң палғалыстырарын амох таллапчалар
ПӦЗІК ПРОФЕССИОНАЛЬНАЙ ӰГРЕДІГ
Ағбандағы Н.Ф.Катановтың адынаң Хакас хазна университедінзер ӱгренерге кірерге сағынчатханнарға ХГУ-ның проректоры Марина Адамова паза приемнай кампанияның кнезі Елена Майнагашева абитуриенттерге кӧні эфир иртіргеннер. Анда олар пу чылдағы приемнай кампаниядаңар чарыда чоохтааннар.
Пӱӱл ХГУ-ның пӧзік профессиональнай ӱгредіг программазына 1116 бюджет орны позыдылча. Абитуриенттерге 75 ӱгредіг программазына кірерге чарир. Иң кӧп бюджет орны позыдылча ӱгретчілерні тимнепчеткен программаларға - 160 орын. Ол орыс, хакас, англия тіллері ӱгретчілерін, школа алнындағы, пасталығ класстар, математика паза даа пасха предметтер ӱгретчілерін тимниріне.
Информационнай специальностьтарға 150 бюджет орны пирілче. Таныхтирға кирек, пӱӱл ХГУ-да пу кӧстегҷе программалар нааҷылалған, андар наа профильлер кирілген. Олар саннығ экономиканаң, искусственнай интеллектнең палғалыстығ полчалар. «Имнег кирее» паза «Ветеринария» специальностьтарға 65 паза 16 бюджет орны пирілче.
Ідӧк очно, заочно паза очно-заочно ӱгренерге чарир. Халғанҷызынҷа ахча ла тӧлеп, ӱгреніп аларға оңдай пар. Ол юриспруденция, менеджмент, экономика, хазна управлениезі, тархын кӧстеглер. Заочно, тізең, ӱгретчі специальнозын таллап алған чииттер ӱгренерлер. Ол ОБЖ, физкультура, школа алнындағы ӱгредіг, логопедия паза даа пасхазы.
ХГУ-да профессия аларға сағынчатхан чииттерге пічіктерні тӧрт оңдайҷа ызарға чарир - посха университетсер киліп, Россия почтазынҷа, «Хазна полызығлары» порталҷа паза ХГУ-ның сайты пастыра («Абитуриент-онлайн»). Приемнай кампанияның тоғынҷылары абитуриенттің пічіктерін сыныхтабызарлар, ол толдыразынаң полбаза, ХГУ чиит кізінең палғалызар. Мына мындағ пічіктер чииттерге тимнеп саларға кирек полар: паспорт, аттестат, сомнар, СНИЛС-тың номері, льгота пічіктері (пар полза).
Приемнай кампания тоғызын 20 июньнаң пастир. Ікінӌі чылы изере абитуриенттерге пис предметтің ЕГЭ салтарларын ағыларға чарир. Пічіктерні ХГУ 25 июльға теере алар. Чайаачы кӧстегні таллап алғаннарға пічіктерні 9 июльға теере пир саларға кирек. Кинек, іҷе-паба хайии чох халған алай ба ӧкіс чииттерге льготалар кӧріл парған. Пу категорияа кірчеткен абитуриенттерге бюджет орыннарының 10 проценті позыдылча. Оларның аразында алынҷа таллағ марии иртер. Ӱгренерге кіріп алза, чиит кізі льготазын чідірбес. Студент ағаа кӧріл парған льго-танаң тузаланар.
Пӱӱл чииттернің чидіглерін санға алары алғыдылча. Хызыл аттестат, диплом ӱчӱн 5 балл кӧрілче, спорт чидіглері ӱчӱн - 2-5 балл. Пӱӱл ідӧк пастағызын на чииттернің волонтер тоғызы санға алылар. Тӧрт чыл волонтер полчатхан абитуриентке 3 балл хозылар.
ОРТЫН ПРОФЕССИОНАЛЬНАЙ ӰГРЕДІГ
Н.Ф.Катановтың адынаң Хакас хазна университедінзер тӧрт колледж кірче. Ол имнег, музыка, аал хонии, педагогика ӱгредии паза право колледжтері. Андар 9 паза 11 класс тоосхан чииттерге ӱгренерге кірерге чарир. Пӱӱл абитуриенттерге 400 бюджет орны позыдылча. 9 класс тоосханнарға 19 программа тимнелген, 11 класстардағыларға - 10.
Иң кӧп бюджет орны пирілген 9 класс тоосхан чииттерге - 325 орын. Аның 50 орны информационнай специальностьтарға. Таныхтирға кирек, пу специальность республиканың істеніс рыногында иң кирек полча. 50 бюджет орны - ветеринарияа, 25-ер - пӱдірігҷілерні, ихтиологтарны, зоотехниктерні, агрономнарны, ӱгретчілерні паза чайаачы специалисттерні тимниріне.
Ідӧк ХГУ-ның колледжтерінде ахча тӧлеп ӱгренерге чарир. Ол экономика, юриспруденция паза чайаачы специальностьтар. Пеер 9 паза 11 класс соонаң кірерге чарир.
11 класс тоосханнарға «Сестринское дело» (50 бюджет орны) паза «Имнег кирее» (25 орын) про-граммалар кӧрілче. Приемнай кампания 20 июньнаң 14 августха теере тоғынар. Чайаачы специальностьтарны аларға сағынчатханнарға пічіктерні 10 августха теере пир саларға кирек.
19 августта ХГУ-зар бюджет орнына кіріп алған абитуриенттернің списогы тимде полар. Андар кір полбааннарға, ХГУ-наң чӧптезіг идіп, ахча тӧлеп ӱгренерге чарир.
Колледжтерде ӱгренерге сағынчатханнарның чидіглері ідӧк санға алылар. Іди Абилимпикс паза WorldSkills марығларның призерларына паза чиңісчілеріне хоза баллар пирілер. Ідӧк Сурдлимпиада паза Паралимпиада ойыннарының чемпионы полыбысхан чииттернің чидіглері санға алылар.
СПО-да кӧстегліг оңдайнаң ӱгренерге чарир. Андада чиит кізее тоғыс пирчеткен организациянаң чӧптезіг идерге кирек. Диплом алза, андар тоғынарға айланар ӱчӱн. Кӧстегліг оңдайҷа ӱгренерге кірчеткеннер пасха абитуриенттернең хада пір списокта поларлар. Че оларның баллары тиң полза, хайығ айландырылар кӧстегліг ӱгредіге кірчеткен кізее.
Музыка колледжінзер кірчеткеннер сыныхтағны орнында иртерлер. Имнег колледжінзер 11 класс ла тоосхан чииттерге кірерге чарир. «Сестринское дело» паза «Имнег кирее» программаларына кірчеткеннер психологияҷа тест иртібізерге кирек. Экзаменнерге пір ле сылтағнаң килбеске чарадылча - абитуриент имнег туразында стационарда имненчетсе.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы