ХАКАСИЯ ИҢ НИИК ЧАРЫТХЫЛЫҒ РЕГИОННАР САНЫНДА
04.02.2022
Хабарлар
Чыл сан пирізі. Хакасияның энергетика паза тарифтерні хайығда тударынҷа хазна комитедінің кнезі Манук Данданян республика пазы Валентин Коноваловха комитеттің тоғызының сан пирізін искірген
КОММУНАЛЬНАЙ ПОЛЫЗЫҒЛАР
Чарытхаа, чылыға, суға, хара тасха тарифтерні хайығда тударынҷа комитет ирткен чылда кӧп тоғыс толдыр салған. 2021 чылда чонға чылығ, суғ паза чарытхы пирчеткен организацияларда саба хорадылған 7,6 млрд салковай сығысхан. Таныхтирға кирек, ол организациялар пу ахчаны тарифтерге кир саларҷыхтар.
Коммунальнай полызығлар ӱчӱн тӧлеглер сині ӧспес ӱчӱн, чылығ, суғ пиреріне паза суғ ағызарына чонға льготалығ тарифтер кӧріл парғаннар.
2022 чылның пастағы чарым чылында коммунальнай полызығлар ӱчӱн тарифтер Харатас городта ла ӧс парған. Республиканың пасха аал-городтарында тарифтер алыспас. Харатаста прай коммунальнай полызығлар тарифтері 6 %-ке теере ӧс парғаннар.
Пӱӱл от айының 1-ғы кӱнінең республикаҷа коммунальнай полызығлар ӱчӱн тарифтер ортымахти 4 %-ке ӧс парарлар, хай пірее муниципалитеттерде ӧзіс 6,8 %-ке чидер.
Ирткен чылда чылығны, чарытхыны льготалығ тарифче пирген организацияларға парыстар читіре албаан ӱчӱн республика бюджедінең субсидиялар пирілген. Субсидияларға тиксі 397,903 млн салковай позыдылған. Пӱӱл пу пӧгінге регион бюджедінде 398,198 млн салковай кӧріл парған.
ЧАРЫТХЫ
Хакасияда чарытхаа тарифтер Россияда иң тӧбіннернің санында. Пӱӱл от айында чарытхы ӱчӱн тӧлег ӧс парза даа, пістің республика хазнада иң ниик тарифтернің аразында, Иркутск облазы соонда ікінӌі орында полар.
2022 чылның пастағы чарым чылында чарытхынаң тоғынчатхан плиталарнаң тузаланминчатхан город чуртағӌылары пір кВт чарытхы ӱчӱн 2,36 салковай тӧлепчелер, чылның ікінӌі чардығында чарытхы паазы 3,81 % кӧдіріл парар, анаң 2,45 салковайға турар.
Аал чуртағӌыларына паза чарытхынаң тоғынчатхан плиталарнаң тузаланчатхан алай чурттарын чарытхынаң чылытчатхан город чуртағӌыларына мындағ тариф турғызылған - 1,65 салковай кВт ӱчӱн. От айында тӧлег 4,24 % ӧс парза, ол 1,72 салковай полар.
Пасха потребительлерге (идінӌектерге, предприятиелерге, бюджет организацияларына) чарытхы паазы 3,55 %, 3,47 %, 2,19 %, 2,55 % ӧс парар.
СӦП-САП ТАРТХАН ӰЧӰН
Республикада сӧп-сапты чығӌаң 6 полигон пар. Регион операторы пис орынға похсахты сығара тартарынӌа тарифтер турғыс салған. Пастағы орынға Орджоникидзе, Шира аймахтары паза Боград аймааның чардығы кірче. 2021 чылда пу аймахтарда пір кубометр сӧп-сапты тартхан ӱчӱн чуртағӌылар 690,59 салковай тӧлеен ползалар, пӱӱл тӧлег 33 % хызырыл парған, 462,2 салковайға тиңнелче. Амды пір чуртағӌы-даң айда 71,2 салковай алылча.
Ікінӌі орынға Абаза город, Таштып аймаа кірчелер, хайзыларында сӧп-сапты сығара тартарынӌа тариф 18,5 % хызырыл парған, ам 399,78 салковайға тиңнелче. Пылтыр пу орыннаң пір кубометр похсахты 490,58 салковайға тартханнар. Пӱӱл пір чуртағӌы айда 61,56 салковай тӧлирге кирек (2021 чылда - 75,5 салковай).
От айында 2, 3, 4 №№ орыннарда похсахты сығара тартар полызығлар ӱчӱн тӧлег 4 % ӧс парар. 2 № орында пір кубометр сӧп-сапты сығарған ӱчӱн регион операторы 316,23 салковай алар (пір кізідең айда - 48,7 салковай); 3 № орында - 605,58 салковай (пір кізідең - 93,3 салковай); 4 № орында - 582,12 салковай (пір кізідең - 89,6 салковай).
ЧЫЛЫҒ ӰЧӰН
2022 чылда чылығ пирерінде 125 тариф турғызылған, ол санда чылыға - 68, чылығны читіреріне - 31, ізіг суға - 26. Республиканың потребительлеріне чылығ ӱчӱн ортымах тариф 2615,26 салковайға тиңнелче. Ол пылтырғызынаң 3,39 % ӧс парған. Че пӱӱл 9 предприятие чылыға тарифті хызырыбысхан. Кӧк хайа аалдағы «Ӱстӱнзархы Сибирьдегі чылығ пирӌең сетьтер компаниязы» ООО тарифті 14,5% тӱзірібіскен.
Пӱӱл комитет тоғынӌылары чылығны пирчеткен предприятиелерде саба хоратхан 798 млн 323 муң салковай тапханнар. Хай пірее аал-городта чылығ ӱчӱн тариф муниципальнай синде турғызылар. Ағбанның, Харатастың паза Ағбан пилтірі аймааның устағ-пастаа чылығны пирчеткен пір организациянаң чӧптезіг ит салған - «Енисейская территориальная генери-рующая компания (ТГК-13)», хайзы пу орыннарда тоғынча. Ағбан чуртағӌылары чылығ ӱчӱн 1667,11 салковайдаң кӧп нимес тӧлепчелер, от айынаң сығара 1798,03 салковай полар.
Харатас чуртағӌылары чылығ ӱчӱн чыл тооза 1751,92 салковай тӧлирлер, Ағбан пилтірі аймааның чуртағӌылары - 1749,91 салковай.
СУҒ ӰЧӰН
2022 чылда суғ пирген паза ағысхан ӱчӱн 93 тариф кӧріл парған, ол санда ісчең суғ ӱчӱн - 66, суғны ағысхан ӱчӱн - 27. Республика чуртағӌылары пір кубометр ісчең суғ ӱчӱн ортымахти 13,8 салковай тӧлепчелер, суғ ағысхан ӱчӱн - 21,48 салковай. Пу тӧлеглер 3,3 % ӧс парғаннар. Пӱӱл комитет тоғынӌылары суғны пирчеткен паза ағысчатхан предприятиелерде саба хоратхан 219 млн 14 муң салковай таап алғаннар.
ГАЗХА ТАРИФТЕР
2021 чылда газха тарифтер турғызарына ікі предприятие айланған: «Быт-сервис» муниципальнай предприятие паза «Красноярсккрайгаз»АО. Пу организацияларға газха розница паалары турғызылған. От айының 1-ғы кӱнінең сығара чонға газ паазы піди ӧс парар: газ резервуарларынаң паза баллоннарнаң садылчатхан газ 4 %, газты потребительлерге баллоннарнаң ибзер читіріп сатханы 3,64 % - 3,74 %.
ХАРА ТАС, ОДЫҢ ПААЗЫ
2022 чылда хатығ топливо паазының ӧзізі кӧрілбинче. Аннаңар Хакасия Правительствозының кӱрген айының 28-ӌі кӱнінде сыххан 707№ чарадиинда пазыл парған.
ЧАРЫТХЫ ӰЗӰРЛИРІ
Манук Данданян ідӧк чарытхы ӱзӱрлирінӌе тоғыстаңар чоохтаан. 2021 чылда республика бюджедінең 15 млн салковай позыдылған. Пу ахчаа 18 муниципалитетте чарытхы ӱзӱрлеӌең 1050 светильник , 70 тірӧс турғызылған паза 25 километр эмек тартылған.
Автор :
Тимнеен Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде