ИМӋІЛЕР ХАТЫҒ ОҢДАЙЛАРДА ТОҒЫНЧАЛАР
04.02.2022
Хабарлар
Штаб чыылии. Хакасияда чуртағҷылар ла нимес, имҷілер дее коронавируснаң ағырчалар. Аннаңар искіргеннер оперштабта
Кӱннең кӱнге Хакасияда эпидемиология кирее хомайдаң хомай ла полып одырча. 3 февральға пирілген танығлардаң, халғанӌы суткада 998 кізі ковидке хаптырған! Анзы республикада коронавирус тың тарап сыхханының иң улуғ кӧзідімі. Ағырығның 1 - 4 салғағында даа мындағ кӧп кізі ағырбаан полған! Ідӧк ирткен суткада 392 пациент, хазыхтанып, ибзер позыдылған.
Коронавирусха иртірілчеткен тесттер саны ідӧк хозылған. Лабораториялар хараа-кӱнӧрте тоғынчалар. Ирткен суткада олар алты муң азыра тест сыныхтааннар, анзы пандемия пасталғаннаң ідӧк иң кӧп. Нормативті нинӌе-де хати асча. Кӱннің сай имнег учреждениелерінзер айланған кискектепчеткеннернің саны хозылча. Ирткен не суткада пис муң азыра пациент. Аннаңар республикада чуғынӌах ағырығ табырах тарапчатханын таныхтирға кирек. Имнег учреждениелерінде орғаннар чидісчеткенде, тың ағырчатханнарны сах андох чатырчалар. Республиканың имнег учреждениелерінде 876 орған, оларның 686-зы пос нимес. Пациенттернің саны аннаң андар хозылза, орғаннарның саны ідӧк хозылар.
Хакасияның хазых хайраллаӌаң министрі Олег Ананьевскийнің искіриинең, чуртағӌылардаң пасха, республикада ідӧк имӌілер ковидке хаптырчалар.
- Ағырыбысхан имҷілер паза ортын имнег тоғынчылары имненерге ызылчалар. Имчілер чидіспинчеткен сылтаанда піс ӧнетін имнег учреждениелерінде имнег по лызиин пирерін хызырарға чарадығ алғабыс - ол психиатрия, наркология паза имнег профилактика кіні. Андағы специалисттер Ағбандағы поликлиниказар арғыстарына полызарға ызыларлар, - таныхтаан чооғында министр.
Ідӧк пу кӱннерде имӌілерге полызыға Н.Ф.Катановтың адынаң Хакас хазна университедінің 128 студенті килген. Олар республиканың стационарларында паза поликлиникаларында тоғынып пастабыстылар.
Пандемия пасталчатхандох, имӌілер прай чуртағӌыларны кирілген санитарнай нормаларға тудынарға хығырғаннар. Андағ полбаза, имнег службалары хығыртығ хоостыра чӧрерге, кирек пічіктерні тимнирге, пациенттерні имнирге маңнанмастар тіп сизіндіргеннер. Мына ол тус читті. Ӱр сағирға кирек чох полған. Кӧріңер амғы киректі: поликлиникаларда улуғ теестер, чон пилдең пилге турча, имӌілерні ӱр сағирға килісче, чон тасхар соохта имнег полызиин сахтапча, колл-кіннерзер сығдырадып аларға сидік. Я, оларға аар. А имӌілерге? Оларға хайдағ аар оңдайларда тоғынарға килісче! Аннаңар штаб чыылиинда Хакасия пазы Валентин Коновалов республика чуртағӌыларын пос туста имӌілерге хабазарға хығырған. Телефоннарға нандырар, имнер тарадар, кирек пічіктерні тимнир кізілер киректелче. Ідӧк улуғ кирексіністе машиналығ водительлер, хайзылары имӌілерні пациенттерӌе тарт чӧрерӌік.
Халғанӌы туста пірге колл-кінзер сығдырат полбинчатхан чуртағӌылардаң кӧп хоп кірче. Хайди ілезіне сығысхан, айланчатханнарның кӧбізі коронавирусха тест ирткен осхас. Аның салтарын піліп алар ӱчӱн олар «122» номерге сығдыратчалар. Хайди искірген Олег Ананьевский, чуртағӌыларға тесттің салтарын, 48 час ирт парза, «Хазна полызығлары» порталда піліп аларға чарир. Ағбанда, Харатаста, Саяногорскта паза республиканың олған имнег туразында смс-искірии ызылча.
Пу тусха наа чуғынӌахнаң иң кӧп 30 - 49 частығлар ағырчаттырлар, анаң 50 - 64 частығлар, ӱзінӌізінде - 18 - 29 паза 65 частаң улуғлар. Ам даа ковид тың тарапча Асхыс, Ағбан пилтірі аймахтарында паза Ағбанда.
Хайди таныхтаан чооғында Роспотребнадзорның Хакасияӌа пӧлиинің устағӌызы Татьяна Романова, ковидке ӱгредіг киреенде істенчеткеннер иң кӧп хаптырча, анаң хазна структураларында істенчеткеннер, транспорт системазында паза, тӧртінӌі орында, имнег киреенде тоғынчатханнар.
- Чағынғы ікі неделяда чуғынҷах ағырығ ӧзіп ле одырары кӧрілче, анаң чухтырғаннарның саны хызырылып пастир. Че прайзы санитарнай нормаларға тудынза, - таныхтаан Хакасияның хазых хайраллаӌаң министрі Олег Ананьевский.
Хакасияда эпидемиология кирее чахсыланминчатханда, штаб чыылииның араласчылары наа хатығластар киргеннер. Амды республиканың прай школалары ибдең сығара ӱгренерлер. Хоза ӱгредігні паза спорт секцияларын ідӧк ырахтын иртірерге чӧп пирілче. Чазы читкелек олғаннарға тынанӌаң заведениелерзер улуғлар чох чӧрерге чарабас.
Оперштабтың теестегі чыылии соонаң республика пазы Валентин Коновалов Хакасияның СМИ-ла-рына брифинг иртірген. Ӧӧн тема - олох коронавирус.
Орындағы хабарӌылар Ағбандағы ковид кінде имӌілер санын хозар оңдай пар ба тіп сурғаннар. Хайди піс пілчебіс, имӌілер асхынахтаңар, ағырчатханнар аразында улуғ теес пол парча.
- Пу сидіксіністің ӧӧн сылтаа - имчілер чидіспинчеткені. Амды имнег тоғынчылары ковиднең ағырчатханнарнаң удаа палғалысчалар, аннаңар оларох пастағызын ағырығны чухтырып алчалар. Іди олар, табырах полызығ пирчең паза соона салдырбас службаларның тоғынчылары, больничнайға парғлапчалар. Піс имчілерге полызыға студенттерні тартчабыс, - теен ол.
Ідӧк брифингте хабарӌылар Хакасия пазы Валентин Коноваловтаң «Спутник М» вакцина саарбахтарның хазиина хайди теелчеткеннеңер сурғаннар. Пу вакцинаны Хакасияда палаларға турғызып пастабыстылар. Іӌе-пабаларның кӧбізі ол читіре істезілбеен ӱчӱн сағыссырапча.
- Республиказар «Спутник М» 480 комплект читірілген. Ол 12 -17 частығларға кӧріл парған. 2 февральға ол республиканың 99 кічіг чуртағчызына турғызылған. Минің палам, кӧзідімге, прививка турғыстырарға тимде. Мин аннаң чарасчам. Вакцина пос кӧңнінең турғызылча. Олғанны прививканаң хоза арачылап алза, артых полбас тіп санапчам, - нандырған Хакасия пазы.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде