ХАҶАН ӰРЕГ АЙЛАНДЫРЫЛАР?
04.02.2022
Хабарлар
Ӧӧркі Чӧп. Президиум чыылиинда «Ветеринариядаңар» федеральнай законзар алызығлар кирері ӱзӱрілген
Хайди искірче Хакасияның Ӧӧркі Чӧбінің хабарлар пӧлии, Ӧӧркі Чӧп президиумы 2 февральда теестегі чыылиин иртірген. Чыылығны Ӧӧркі Чӧп кнезі Владимир Штыгашев апарған. Чыылығ сурығларының пірсі «Ветеринариядаңар» федеральнай законзар кирілчеткен алызығларға теелген. Чарыда чоохтаза, Россия правительствозы кирген закон проектіне ӱндезіг пирерге киректелген.
Закон проектінде чоох парча маллар аразында хорғыстығ чуғынӌах ағырығ тараан орынны чох идерінӌе право нормаларынаңар. Іди кирілчеткен алызығларӌа малларын алай мал идінең тимнелген ас-тамаан чох иттіріп ӱреге кірген ээлерге ӱрегні айландырары кӧрілче.
Олох туста закон проектінзер положениелер кирілген: хаӌан ӱрег айландырылча, хаӌан айландырылбинча. Чоох парча ветеринария кирексіністері сайбалғаннаңар, хайзының сылтаанда маллар аразында хорғыстығ чуғынӌах ағырығ тараан, пар алай чох полғанынаңар.
- 2021 чылда Россия Федерациязында сосхалар аразында тарапчатхан африканскай чуманаң палғалыстығ эпидемиология кирее улғаат парған, - таныхтаан аал хонии политиказынӌа, ас-тамахча паза чирнең тузаланарынӌа комитеттің кнезі Пётр Воронин, закон проектінең таныстырып. - Пу чуғынҷах ағырығ тарапчатхан орыннар ілезіне сығысса, 60 километр радиуста прай сосхалар чох иділчелер. Мындағ киректе фермер хоныхтары паза сосха тутчатхан олаңай чуртағчылар ӱреге кірчелер.
Ветеринария кирексіністерін сайбааны паза маллар аразында хорғыстығ чуғынӌах ағырығ тарааны аразында палғалыс пар алай чох полғанын ілезіне сығарар ӧнетін комиссия, хайзы «Ветеринариядаңар» федеральнай законның 17-ӌі статьязы хоостыра тӧстелче.
Закон проектінӌе ӱрег синін санир правилоларны, ӱрег сині хаӌан хызырылчатханын алай саңай айландырылбазын Россия правительствозы турғысча. Ол положение сайбағлығ киректерні аймах-пасха кӧріснең чарыдарын чох идер осхас. Салтарында право саринаң таластар хызырылар, хазнаның паза маллар аразында хорғыстығ чуғынӌах ағырығ тараан орынны чох идерінде ӱреге кіргеннернің кирексіністері оңдайланар тіп кӧрілче. Ӧӧркі Чӧп президиумы алызығлар кирчеткен закон проектінең чарасхан.
Президиум чыылиинда ідӧк февральдағы сессияның кӱн суриинзар «правительство чазын» кир саларға чарат салғаннар. Депутаттар ас саннығ чонға саналчатхан шорларға хабазары хоостыра Хакасия правительствозы хайдағ тоғыстар толдыр салғанын истіп аларға сағынчалар. Ӧӧркі Чӧптің сессиязы 25 февральда иртер тіп кӧрілче.
Автор :
Тимнеен Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде