САҒЫС-ПӦГІННЕРІН ТОЛДЫРҶАҢ
04.02.2022
Хабарлар
Сағысха киріп. Чағдапчатхан позырахта Ольга Гавриловна Ултургашеваның 40 кӱні таныхталар. Аны хумартхылап, чуртас чолынаң таныстырчабыс
Хакас филология кафедразы улуғ хомзынызынаң ӱлесче. 74 чазын апарчадып, ӱр ағырған соонаң 31 декабрьда аарлығ ӱгретчібіс, устағӌыбыс Ольга Гавриловна Ултургашева ах чарыхтаң парыбысхан. Ол улуғ чідіріг полды піске. Уғаа кӧп чахсы ниме ит салған ол ӱгренӌілеріне, кафедраа паза хакас чонына. Иткен тоғызы, пӧзік чидіглері ӱчӱн аарластығ аттар паза сыйыхтар алған. Ол Россия Федерациязының пӧзік профессиональнай ӱгредиинің аарластығ тоғынӌызы, Хакас Республиканың саблығ ӱгретчізі, істеніс ветераны полған. «Профессионал России» медальнаң таныхтатхан.
Ольга Гавриловна Ултургашева (15.07.1947 - 31.12.2021) - педагогика наукаларының кандидады, доцент, хакас филология кафедразының устағӌызы. Ол, он пис чыл кафедранаң устап, ырах кӧрістіг, аллығ чӱректіг устағӌы чіли сағыста халған. Иткен тоғызы паалаӌаа чох тузалығ. Степан Павлович Ултургашевтің устаанынаң Ольга Гавриловна Лариса Ильинична Чебодаеванаң хада национальнай школаларның факультедін азарынӌа, соонаң Сойан-Алтай тюркология институдын тӧстирінӌе улуғ тоғыс ит салғаннар. Хайди сағынчазар, оой кирек полған ма ол? Хара сидік кӧп чуххан! Андағ даа полза, наа институт тӧстел парған. Пӧкчең сурығлар, тізең, толдыра. Иң ӧӧні - кадрлар сурии. Ол санда кафедраа наа ученай-ӱгретчілер хозары киректелген. Іди ол Наталья Николаевна Таскаракованы литератураӌа, Пётр Егорович Белоглазовты тілӌе Хазан городтағы аспирантураа ӱгренерге ысча, Алёна Николаевна Чугунекованы Новосибирсктегі аспирантураа кірерге чӧптеп алча. Кадрлар суриина сағыссырап, Ольга Гавриловна ХГУ-да хакас тілінӌе аспирантура азыбызарға пӧгінібіскен. Хайди за, сағызын толдырған. Іди 1995 чылда ол пастағы аспиранттарын чолға кирген. Пір чыл пазынаң пісті - мині, Марина Алексеевна Медведеваны паза Владислав Александрович Боргояковты - ол аспирантураа кирген. Пірдеезі пу чолдаң хыйыспаан, прайзы кафедразар, ученай пол парып, айланған. Анзы устағӌыбыс кізінің пілізін, хылых-оңдайын, сыдамағын тирең кӧр пілчеткенін кӧзітчеткені нимес пе.
Ольга Гавриловна хакас науказын кӧдіреріне улуғ хозым ит салған. Ол 60 азыра наука паза ӱгредіг-методика тоғызын тимнеп салған.
Ол хакас тілі методиказының істезігӌізі полған. Ӧӧнінде Хакас чиріндегі национальнай школаларға ӱгретчілер тимнир сурығларны кӧдірген. Аның сағызында, хакас палаларынаң тоғынчатхан ӱгретчі хайди даа чонның психологиязын, культуразын, чон педагогиказын пілерге кирек. Андада ол олғаннарның сағыс-кӧрізін, пілізін тирең піл полар, оларнаң хада тоғынӌаң методиказын ипти таллап одырар паза олғаннарны наа чидіглерге кӧстеп одырар тіп санаӌаң Ольга Гавриловна.
Пілӌең, нимедеңер пасча. Позы даа, тоң хакас, Тӧӧ суғ хазындағы Полит аалда тӧреен кізі, аалдағы чуртасты ӧтіре пілчетпес пе. Мында аның ӧӧн хылии тапталған: улуғларны улуғлиры, кізілернең чоохтас пілері, кізілерге полызары, чалахай хылии. Ағбандағы институттың хакас пӧлиин тоосхан. Андағы ӱгреніс пос тілін, чонын, чир-чайаанны тирең оңарарға полысхан тіп таныхтаӌаң Ольга Гавриловна.
Ольга Гавриловнаның чуртазы паза тоғызы пос чонынаң палғалыс парған. Аның иткен тоғызы, сағынған сағызы чонына, чиріне хынызы тикке парбазын, аның киреене, аның сағыссыразына турыстығ полалар, андағох ырах кӧрістіг, аллығ сағыстығ, кізее полызаачы, пик хылыхтығ полалар.
Чарых омазы чӱреебісте хаӌан даа оңмас!
Автор :
Инга КЫЗЛАСОВА, хакас филология кафедразыныд устағҷызы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде