30 МЕДАЛЬҒА ІЗЕНЧЕБІС
04.02.2022
Хабарлар
Олимп ойыннары-2022. Пӱӱн Пекинде тилекейнің иң улуғ марығлары пайрамни азылар. Анда 95 хазнаның спортсменнері кӱстерінең сыназарлар
Пістің хазнада коронавирус матап хайынча. «Омикрон» штаммны хаптырып алғаннарның саны кӱннең кӱнге ӧсче. Іди дее полза, спортха хынчатханнарның улуғ ӧрініс. 4 февральда Пекинде XXIV хысхы Олимп ойыннары пасталча нооза. Чоохтирға кирек, Пекин - пастағы город, хайзында чайғы даа, хысхы даа Олимпиадазы иртер.
Тиксі алза, тилекейнің иң улуғ марығларында 4 муң артиинаң кізі аралазар. Спортсменнер 7 ӧӧн спорт кӧрімінде - бобслейде, биатлонда, кёрлингте, хоккейде, саналығ, конькиліг паза соорлығ спортта - кӱстерін сынирлар. Олар медальларның 109 чыындызы ӱчӱн харбазарлар.
Кибір хоостыра иң кӧп медаль конькиліг чӱгӱрісте. Пу дисциплинада медальларның 14 чыындызы ӱчӱн марығ парар, фристайлда - 13. Иң асхынах медаль - ікілер - скелетонда паза шайбалығ хоккейде кӧріл парған.
Россиядаң Олимп ойыннарында 213 кізі араласча: 109 ирен паза 104 ипчі. Командада Александр Хорошилов часха прайзынаң улуғ. Ол тағ индіре чыларынаң айғасча, 16 февральда спортсменге 38 час толар. Тилекейнің иң улуғ марығларында А.В.Хорошилов 2006 чылдаң тӧреміл араласча. Иң кічіглері - Александ-ра Глазкова (фристайл) паза Камила Валиева (конькиліг хоос чылары). Саарбахтарға пӱӱл часхызын 16 час толар. Россияның командазы Олимпиадада пазох хазнаның флагы паза гимні чох аралазар. Чир-суғҷыларыбыс чиңіс тутса, хазнабыстың гимні орнына композитор П.И.Чайковскийнің музыказы толдырылар.
Россияның Олимп комитедінің президенті Станислав Поздняковтың чооғынаң, пӱӱл Пекинде спортсменнерібіс прай 15 дисциплинада кӱстерін сынирлар, аннаңар олар 32 медаль утып аларына ізеніс пар. 2018 чылда Россия командазы 17 медаль холға кирген: 2 алтьш, 6 кӱмӱс паза 9 хола. Че Ӱстӱнзархы Кореядағы марығларда чииттерге ле аралазарға чаратханнар. Пекинде Россияның піріктірілген командазы сыйыхтығ орынға сыиып алар ба, кӧрінер. Турғызылған пӧгіннерні коронавирус сайбапча. Кӧзідімге, Олимпиада-да скелетонист Никита Трегубов араласпас. Спортсмен 2018 чылда Пхёнчханда кӱмӱс призёр полыбысхан, пӱӱл ол чиңіс тудар тіп сағынғаннар.
Че ПЦР-тесттер Хызылчар чуртағҷызының чуғынҷах ағырығ пар тіп кӧзіт пиргеннер. Биатлонист Валерия Васнецова Пекинзер учух килгенде, аның коронавирус сығыс килген. Амды ол карантинде, аның орнына марығларда Евгения Буртасова аралазар.
23 январьдаң 2 февральға теере COVID-19 ағырығ 230 кізіде табылған, ол санда 76 спортсменде паза командаларзар кірчеткен специалисттерде.
Чоохтирға кирек, пӱӱл Россия ӱчӱн кӱстіг ӧме турысча. Специалисттер конькиліг хоос чыларында ӱс алтын медаль хайди даа полар тіп таныхтапчалар. Ӧӧн «чылтыс» - 15 частығ Камила Валиева. Амғы сезонда татар чонның хызы прай турнирлерде чиңіс тутча. Пустағы теелбекте Никита Кацалаповнаң Виктория Синицина пастағы орынға сығып алар оңдайлығлар. Саналығ чарыста Александр Большунов, Наталья Непряева, Иван Якимушкин, Юлия Ступак норвегиядағыларға маң пирбеске киректер. Фристайлда 23 частығ Максим Буровха ізенчелер. Ол тилекей чемпионаттарында ікі хати чиңіс тутхан. Конькиліг чӱгӱрісте Россиядаң 16 спортсмен аралазар. Ол санда тилекей чемпионнары Ангелина Голикованаң Руслан Мурашов, Сочидегі Олимпиаданың кӱмӱс призёры Ольга Фаткулина, рекордсмен Павел Кулижников. Хоккеисттер Пхёнчханда чіли алтын медаль утып аларға пӧгінчелер.
Коронавирус тарапчатханнаңар, Пекинде марығлар кӧрігҷілер чох иртер. Ағаа хоза, политика саринаң сидіксіністер пар. Пӱӱл 14 хазнаның делегациялары Олимпиада азарында араласпасха чаратханнар. Ӧӧн сылтағ - Хыдатта Синцзянь провинцияда чуртапчатхан уйгурларның праволары сайбалчатханы. Че спортсменнер марығлазарлар, аннаңар пу чарадығны 1980 паза 1984 чыллардағы бойкоттарнаң тиңнестір полбас.
Олимп ойыннары 4-20 февральда иртер. Таңда пастағы медальлар ӱчӱн харбазығ парар. Спортсменнер биатлонда, конькиліг чӱгӱрісте, саналығ чарыста, трамплиннең сегірерінде, фристайлда, шорт-тректе кӱстерін сынирлар. Пастағы кӱндӧк чир-суғҷыларыбыс алтын медальлар холға кирерлер тіп ізенчебіс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде