Сергей Соколның политикадағы ойыннары
04.02.2022
Хабарлар
Пос кӧрiзi. Пу наада «Хакасия» газетада Хакасиядаң табылған Хазна Думазының депутады Сергей Соколның тоғызынаңар сыххан сағыс-кӧрiстi пирчебiс
Хакасиядаң табылған Хазна Думазының депутады Сергей Сокол тӧртiнҷi айы тоғынча. Тоғынча? Чох, ол анда саналчатханға ла тӧӧй, Хакасия чуртағҷылары Сергей Соколның тузазын кӧрбедiлер нооза.
Соцсетьтерде, тiзең, онарлап искiриин кӧрерге чарир. Тӧрт чӱс муң салковайдаң тӧбiн нимес чал ахчазын алчатхан депутат сомнарда ас-тамахтығ сӱӱмектернi кiзiлерге читiрче. Сынында ағаа кiзiлер ас-тамахха постары тоғын поларға полысчатхан законнарны аларынаң айғазарға кирек нимес пе? Чох. Аннаңар пiс пiр дее ниме испинчебiс.
Культура тураларында иртчеткен чоннаң тоғазығларға алынҷа хайығны айландырарға кирек. Пу мероприятиелернiң тӧӧй сценарий: Сокол республика ӱлгӱлерi «читкiҷе нимес ӧткiн» тудынчатханнаңар чоохтапча, нименi орта паза саба идерiн ӱзӱрче. Соколның позының ӧткiнiн паалап, пiс пiлiп алғабыс, ноға аны тапхан республикаа ол пiр дее тузалығ кирек итпинчеткенiн. Ӏдӧк депутаттың сын пӧгiннерi пiлдiстiг пол парған.
Депутат Сокол табылғаннаң сығара аның адынаң Хакасия правительствозынзар iкi ле айланыс кiрген: полысчыларын тоғысха аларынаңар, тоғыс пӧлиин паза транспорт пирерiнеңер. «Регионға туза ағыларға килген» политикке пасхаҷыл кирек.
Республикаа иң чахсы салтарларға чидер ӱчӱн Хакасия пазынаң чоохтазарға кирек. Федеральнай кiн прай ахча сурығларын, пӱдiрiглернi апарарын регион правительствозынаң хада ӱзӱрче. Федераллардаңар чоох пар сыхханда, депутат Соколның Хакасиянаң палғалыстығ сурығларҷа федеральнай правительствозар айланыстарынаңар iдӧк пiр дее ниме истiлбинче.
Чон аны тапхан. Мына регион, мына Москва. Хайда аның ӧткiнi? Пу риторикалығ сурығ. Ағаа олаңай нандырығ пар: депутат, республика чуртағҷыларына молҷаан сурығларнаң нимес, политика ойыннарынаң айғасча. Анзы республикаа туза ағыларға сағынчатхан кiзiнi пiр дее чазабинча.
Чонға чахсы идерге сағынчатса, политика чаалазығларынаңар ундутчалар. Хакасия правительствозында «Единая Россия» партияның кiзiзi Ирина Войнова ӧӧн орыннарның пiрсiн толдырча – ол республикаа политика чох, фронттарны таныхтабин, тоғынча. Партия кiзiзi полчатханын кӧзiдер тус читсе, позын «единорос» аданарға чалтанминча.
Республика парламентiнiң спикерi Владимир Штыгашев КПРФ-таң пасха чолҷа парчатханын iдӧк таныхтабинча. Анзы пу политиктернiң ӧӧн пӧгiнiнең – часкалығ ӧңненчеткен Хакасиянаң – палғалыстығ. Соколның кӧстее пасха – ол, губернатор Коновалов паза аның командазы итчеткен чахсы киректернi хомайлап, Хакасия правительствозын «хыйыр холлығ» адап, политика карьеразын пӱдiрче.
Олох туста Сокол таныхтабинча, хайди Коноваловтың «хыйыр холлығ» правительствозы ӱс чыл аразына аның алнындағы «кӧнi холлығ» правительство тоғызының ӧӧн чардығын пӧккен: муниципалитеттернiң ӧдiстерiн, хазна ӧдiзiн, сӧӧ тартылған кредиторларға ӧдiстернi чапхан. Бюджеттегiлер чал ахчазын тузында алчалар. Правительство тарифтернi ӧскiрерге пирбеен, республиказар ахча тартча, аймах кӧстеглiг пӱдiрiглер пӱдiрче, тыхтапча, нааҷылапча. Хакасияда кiчiг паза ортын пос киреенiң инвестиция оңдайлары паза ӧзiзi хаҷан даа андағ чахсы полбаан, Коноваловтың тузындағы чiли. Прай ол тӧремiл хомайлапчатхан туста. Ӱлгӱлер хайдағ даа сағыс-кӧрiстiң тузазын аларға, тоғысты чахсыландырарға пiлчелер. Че Соколның сӧстерiн критика тiп полбассың – пiр дее алынҷа танығ чоғыл.
Хакасия чуртағҷыларын республиканаң усанабастаң палғалыс парған кiзiнiң хуруғ чоохтары уйаттырча. Олар Хазна Думазының алындағы депутады Надежда Максимованың сӧстерi киректерiне турысчатханына кӧнiк парғаннар нооза. Аның тоғызы федеральнай синде республиканың сурығларын «чылдырарынаң», Хакасияа хоза ахча тартарынаң палғалыстығ полған. Сокол, тiзең, тоғызын пастыхтарнаң хада сомға суурынарында паза Хазна Думазында пос партиязының пастағларына хабазарында кӧрчеткенге тӧӧй.
Соколны, политика кӧрiстерiне тудынмин, кирек тоғыснаң айғазарға хығырарға килче. Хакасия чуртағҷылары чуртастарын чахсыландырар ӱчӱн аны тапханнар нооза. Че хығыртығлар тикке ле парары пiлдiстiг. Соколға кирек политика чолында блицкриг. Ӏди полбаан полза, ол аның адына кiрген айланыстарны Хакасия правительствозынзар ноға ызарӌых?
Автор :
Пётр МОРОЗОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде