АВИАРЕЙСТЕР САНЫ ӦСЧЕ
11.02.2022
Хабарлар
Сыйыхтас. 9 февральда Россияда Гражданскай авиация тоғынӌызының кӱні таныхталған. Ол кӱнде Хакасия пазы Валентин Коновалов Ағбандағы аэропорттың чахсы чидіглер кӧзітчеткен тоғынӌыларына сыйыхтар читірген
Россияның Гражданскай авиация тоғынҷызының кӱнінде республиканың правительство туразының чыылығлар иртірер залында «Ағбан аэропорт» акционерлер пірігізінің тоғынҷылары чыылысханнар. Хакасия пазы Валентин Коновалов оларны профессия ӱлӱкӱнінең чылығ алғыстаан.
- Гражданскай авиация прай хазнада, ол санда пістің Хакасияда, халғанҷы туста чахсы тиліс кӧзітче. Аның тоғызы прай экономиканы ӧскіреріне тӱзімніг хабасча, пістің алныбыста турчатхан пӧгіннерні толдырарға полысча. Ирткен чылның салтарларынҷа Ағбандағы аэропорттаң 250 муң пассажир тартылған, наа авиарейстер азылған. Ідӧк пылтыр аэропортха саблығ летчик, Совет Союзының Матыры, генерал Василий Тихоновтың ады пирілген. Илбек Ада чаа тузында летчиктер Хакасияда тимненіс иртчеңнер. Сірерні Россияны паза Хакасияны чахсы чуртадар тӱзімніг тоғызыңар ӱчӱн алғыстапчам, - теен Валентин Коновалов.
Чооғын тоозып, Хакасия пазы профессияда пӧзік кӧзідімнер кӧзітчеткен аэропорт тоғынҷыларына сыйыхтар читірген. Іди Хакасияның Аарластығ пічиинең сыйыхтатханнар Ағбан аэропорттың чылығ пирчеткен паза сантехника участогының пастығы Александр Авдеев, аэропорттың самолет бортында азыраҷаң паза садығ итчең службазының шеф-повары Снежана Наливайко, ідӧк пассажирлерні, почтаны паза таарлағны авиациянаң тартар тоғысты апарчатхан подразделениенің агенті Екатерина Каплунова.
Хакасия пазының алғыстас пічиинең таныхтатхан аэропорттың самолет бортында азыраҷаң паза садығ итчең службазының технологы Людмила Мартовская.
Ағбандағы аэропорттың прай тоғынҷыларын профессия ӱлӱкӱнінең алғыстап, чоох тутханнар Хакасия пазының орынҷызы Юрий Курлаев, республиканың транспорт паза чол хонии министрі Дмитрий Василиади паза «Ағбан аэропорт» акционерлер пірігізінің ӧӧн директоры Вячеслав Рожнов.
- Гражданскай авиация Хакасияның транспорт системазының хаҷан даа пірге чардығы полған, ам даа полып халча. Ол сыбыра тиліпче, кӧп улуғ пӧгін толдырча. Сірернің профессионализміңер, пу тоғысха пирін салғаныңар чахсы салтарлар ағылғаннар. Оларны паалирға даа сидік. Пу сыйыхтар сірернің пӧзік чидіглеріңні таныхтапча. Сірернің улуғ ӧмеңерге піс полыс турарбыс. Мындағ ынағ ӧменең тағларны даа чылдырарға чарир. Айас тигір, тоғызыңарда пӧзік чидіглер алғапчам. Пик хазых, часка, чахсы чуртас сірерге! - алғыс сӧстерін читірген Хакасия пазы Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде