ЭЭЗІ ЧОХ АДАЙЛАРНЫҢ САНЫ ТАБЫРАХ ӦСЧЕ
16.02.2022
Хабарлар
Чыылығ. Хакасия правительствозында ээзі чох адайлар сурии хоостыра чыылығ ирткен
2018 чылда 498 № Федеральнай законға алызығлар киріл парғанда, ээзі чох адайларны чох идерге чарадылбиныбысхан. Ол тустаң сығара ээзі чох адайларның саны тың ӧс парған. Амғы туста Ағбан пилтірі аймаанда оларның саны 1,5 муң пасха чит парған, Харатас городта - 2 муң пас, Ағбанда - 3,5 муң пас. Пӱӱл оларны тудып аларына бюджетте 33 миллион салковай кӧріл парған.
Валентин Коноваловтың чооғынаң, пу сидіксініс прай регионнарда пар. Че законға алызығлар киріл парғанда, адайлардаң тоғыр кӱресчең оңдайларны полған на субъект позы тілепче.
- Піске сидіксіністі ӱзӱрерге кирек. Адайларны тутчаң приют пӱдірерге киректелче. Аал хонии министерствозы сананыстарынҷа, 3 муң орыннығ приют пӱдіриине 600 - 700 миллион салковай хорап парар. Пу сидік сурығ. Пӱӱнгі кӱнге бюджет алыл парған, аннаңар Оӧркі Чӧп депутаттарынаң ӱзӱрерге кирек. Чылдаң чылға пу сурығны пӧгерге сидіктең сидік ле полча. Аал-городтарда адайлар кізілерні ызыр салғаннаңар искіріглер саны ӧсче. Чон ікі чардыхха чарыл парған. Пір саринда - аңнарны арачылапчатханнар, ікінҷізінде - адайлардаң хыйалға кіргеннер, - таныхтаан Валентин Коновалов.
Хакасияның аал хонии паза ас-тамах министрі Сергей Труфановтың сӧстерінең, республикада адайларға 4 приют пар, полғанында ла 60-наң 200 пасха теере адай чуртапча. Олар Ағбан, Харатас паза Саяногорск городтарда орныхчалар.
Хакасияда адайларның паза хоосхаларның санын хызырыбызар ӱчӱн, 2021 чылдаң сығара республиканың хазна ветеринар учреждениелерінде аңнарны ниик паанаң сімӌирінӌе тоғыс апарылча. 2020-2021 чылларда ол учреждениелерде 243 аң сімӌілген. Хазнани нимес ветеринар клиникаларында даа аңнарны 25 -50 % ниик паанаң сімӌир оңдай пар. Тізі адайны сімӌібізерге 2000 - 2650 салковай турча, іргек адайны - 1500 салковай, тізі хоосханы - 1200 салковай, іргек хоосханы - 800 салковай. Ниик паанаң тынағдағы кізілер, ветераннар паза кӧп палалығ сӧбірелер тузалан поларлар.
Ағаа хоза, 2020 чылның июльынаң сығара Ағбанда, Харатаста паза Саяногорскта «Аңнарны арачылаӌаң кін» автономнай коммерческай нимес организация ибдегі аңнарны тикке сімӌирінең паза оларға вакцинация иртірерінең айғасча.
Амғы туста ээзі чох адайларны тудып алған соонда, олар сімӌілчелер, таңмалалчалар. Анаң оларға прививка турғызылча, тудылған орынзар нандыра апар салчалар. Пу даа тоғысха илееде ахча киректелче. Пір адайға 7263 салковай хорап парча.
Сергей Труфановтың сӧстерінең, ээзі чох адайларға приют пӱдіреріне проект-смета пічіктерін тимниріне 15 миллион салковай киректелер. Приют 7 гектар чирде поларға кирек. Пір адайға 2 квадрат метр кӧрілче. Пӱдіріг 700 миллионӌа салковай тур парар. Че ӧӧн хорадығ - адайларны тудары, азыриры. Приют пӱдіріл парза, 3100-че адайны пір чыл азырирына 240 миллион 600 муң салковай хорир. Хай пірее регионнарда адайларға хазна приюттары пӱдіріл парған. Кӧзідімге алза, Дагестанда 180 орыннығ приют пӱдіриине 62 миллион салковай хорадылған.
2018 чылға теере Ағбанда чыл сай ээзі чох 1600-че адай чох иділӌең. Іди адайлар саны пір синде тудылӌаң. Город-аймахтар пастары пасха регионнарда ээзі чох адайлардаң тоғыр тоғыс хайди апарылчатханнаңар чоохтааннар. Ағбан пазы Алексей Лёминнің таниинаң, Улан-Удэде адайларны, тудып алып, 20 кӱн приютта пиктегде тутчалар, Хакасияда - 10 кӱн. Хазыр адайлар приютта чуртас тооза чуртирға халчалар. Амыр адайларны позыдыбысчалар. Арығдаң пӱӱрлер паза тӱлгӱлер сыххан туста, хаңырылысча сағыбаан саай режимі кирілче паза прай адайлар хаңырылыстығ тіп саналчалар.
Барнаулда тудып алған адайларны приютта 45 кӱн тутчалар. Ол 650 орынға 2002 чылдох пӱдірілген. Адайның хылиин ветеринар сыныхтапча.
Якутскта сағыбаан саай режимі кирілген. Амғы туста анда прай кӱс ээзі чох адайларны тудып аларына кӧстелген. 1000 пас адайны приютта чаап салғаннар.
Алтай аймааның пазы Татьяна Раменскаяның чооғынаң, кізілер чол хастада орныхчатхан ааллар хыринда кӱӌӱгестерні артыс салчатхан сылтаанда, ээзі чох адайлар саны табырах ӧсче. Амғы туста Алтай аймаанда андағ 1000-ӌа пас адай.
Ағбан пилтірі аймааның пазы Елена Егорова Москвада ээзі чох адайларның санын хызырарынӌа опыттаңар чоохтаан. Анда ээзі чох адайлар приютта ӱс айдаң кӧп чуртабинчаттырлар. Ӱс ай аразына адайға ээзі табылбаза, аны узудыбысчалар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде