СПОРТ ТАРХЫНЫНДА ХАЛАР ЧИҢІСТЕР
16.02.2022
Хабарлар
Олимп ойыннары-2022. Пістің спортсменнер 11 - 14 февральда 7 медаль холға киргеннер, оларның санында ікі алтын
Амғы туста хысхы Олимпиадада саналығ чӱгӱрісте алты чарыс иртче. Пӱӱнгі кӱнде спортсменнер тӧрт марығда кӱстерін сынирға маңнанғаннар. Пістің оолларыбысха оң полды. Чир-суғҷыларыбыс полған на чарысты медальнаң тоосчалар. Пастап скиатлонда чидіглернең Александр Большуновнаң Денис Спицов ӧріндіргеннер. Олар пастағы паза ікінҷі орыннарға сығып алғаннар. Александр Терентьев пос оңдайлығ спринтте хола призёр полыбысхан.
11 февральда программада 15 километрге чарыс полған. Ӧӧн «чылтызыбыс» Большунов хайди даа медаль утып алар тіп ікінҷілес чоғыл. Чиңіс тудар ни? Кізілер іди сағыссырабасчыхтар, неке. Че 10 февраль Россия командазына медальларға «хуруғ» кӱн полған. Наталья Непряеваа ӱзінҷі орынға 0,1 секунда читпин парған. Конькиліг хоос чыларында ооллар марығласханнар. Иң чахсы салтарлар Евгений Семененконың, ол Олимп ойыннарында сигізінҷізі полыбысхан. «Ағырчатхан» улустың кӧңні тӱсчетпес пе. Пятницада спортсменнер классика оңдайынаң чӱгӱргеннер. Чарым дистанция пазынаң ілезіне сығысхан: Александр Большуновтың финн Иво Нисканенні чидіп алар оңдайы чоғыл. Хабарҷыларның таниинаң, 25 частығ чир-суғҷыбысты ікінҷі орын тың на ӧріндірбиндір.
Тынағ кӱннерінде оол-хыстарыбыс эстафетада араласханнар. 12 февральда чарысха абахайлар сыхханнар. Марығ оңдайларынҷа дистанцияның узуны - 20 километр, полған на спортсмен 5 километр чӱгӱрче. Эстафета пір тыныснаң ирткен тиирге чарир. Юлия Ступак пастағы чардығын иң пурун тоос салған, Наталья Непряеванаң Катарина Хеннинг (Германия) азах меетке тиңнең тиңе килгеннер. Татьяна Сорина ӱзінҷі чардығында кӧмес соона халтыр. Халғанҷы 5 километрні 21 частығ Вероника Степановаа чӱгӱрерге ӱлӱс тӱскен. Ачых-чарых кӧңніліг Вероника пірдеезіне маң пирбеске кӱстенче. Пастағыох хурчағда ол Софи Крельні ас парыбысхан. Пістің хыстар эстафетада 2006 чылда Туринда халғанҷызын чиңіс тутханнар, аннаңар прайзының ӧрінізі пу чир полбаан. Хайди таныхтаан Вероника Степанова, оларға чахсы кӧзідім Александр Большунов полча. Аның чидіглері пасхазына кӱс хосча.
Иреннер позырахта марығласханнар. Эстафета тузында олар абахайларыбыстың тактиказына тудынғаннар. Алексей Червоткин, Юлия Ступак чіли, пастағы 10 километрні прайзынаң пурун чӱгӱрібіскен. Аның соонаң Александр Большунов дистанцияа сыххан. Ол алнынзар пірдеезін позытпаан. Ідӧк чапчаң хайынған Денис Спицов. Сергей Устюговха халғанҷы чардыхта Йоханнес Клебонаң чарызарға киліскен. Че Кемеров облазынаң сыххан спортсмен пастағы хурчағ соонда «ыырҷызын» 53 секундаа ас парыбысханда, Россия командазы чиңіс тудар тіп пілдістіг полған. Ипчілер эстафетада 16 чыл пазынаң пазох алтын медаль утхан ползалар, иреннер пу чидіге 42 чыл пазынаң килгеннер.
13 февральда Россия спортсменнері ідӧк шорт-тректе, биатлонда, конькиліг чӱгӱрісте сыйыхтығ орыннарға сыхханнар. 21 частығ Константин Ивлиев 500 метр дистанцияда кӱмӱс призер полыбысхан. Чиит кізі шорт-трекнең 6 частығдаң айғасчаттыр. Пӱӱл аның пастағы Олимпиада. Дистанцияны Константин 40,431 секундаа чӱгӱрібіскен. Конькиліг чӱгӱрісте Ангелина Голикова ӧріндірді. Ол 500 метр дистанцияда хола медаль холға кирген. Биатлонда Эдуард Латыпов ӱзінҷізі полыбысхан.
Пустағы теелбекче марығ 12 паза 14 февральда парған. Хазнабыс ӱчӱн ӱс дуэт турысхан: Виктория Синицинанаң Никита Кацалапов, Александра Степанованаң Иван Букин паза Диана Дэвиснең Глеб Смолкин. Чечіме кӱнде спортсменнер ритм-теелбекті кӧзіткеннер, понедельникте - пос оңдайлығ теелбекті. Алында Викториянаң Никита, ӧме турнирінде аралазып, улуғ нимес алҷаастар ит салғаннар. Че алынҷа марығласханда, дуэт программаларын чалтырама толдырыбысхан. Салтарында оларның кӱмӱс медаль. Он кӱн аразына Россияның командазы 18 медаль утып алған: 4 алтын, 6 кӱмӱс паза 8 хола.
Пу кӱннернің ӧӧн хабары - Камила Валиева Олимп ойыннарында аралазар. Андағ чарадығ алған спорт чарғызы.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде