АЛЛЫҒ ЧӰРЕКТІГ УЛУСХА - АЛҒЫСТАС
18.02.2022
Хабарлар
Сыйыхтас. Хакасия пазы тымо тузында имнег учреждениелері тоғынӌыларына пос кӧңнінең полысчатхан улусха правительствоның алғыстас пічиин читірген
Волонтер - профессия нимес, ол постың паза полызығ кирексіпчеткен кізілернің кӧңнін часхарғаны. Аннаңар ол кирекнең аллығ чӱректіглер ле айғас полчалар. Пандемия тузында, тізең, пос кӧңнінең полызығ пирчеткеннер уламох аарласта. Олар аға-ууҷаларға ас-тамахнаң имнер ағыл пирчелер, пос машиналарынаң имҷілерні ағырыбысхан кізілерзер тарт чӧрчелер.
- Амғы оой нимес туста иң ӧӧн кирек удур-тӧдір полызысханы полча. Пістің республикада аллығ чӱректіг чуртағчылар кӧп. Анзы тың ӧріндірче. Сірер колл-кіннерде тоғынғазар, имӌілерні тарт чӧргезер. Пілчем, сірер сыйых алар ӱчӱн нимес чонға хабасхазар. Че хайдағ даа тоғыс хайығ кирексіпче нооза. Аннаңар сірерге улуғ алғыс читірчем. Хада-пірге піс прай сидіксіністерні тобырып аларбыс, - теен Хакасия пазы Валентин Коновалов.
Антон Аев - Ағбан город чуртағҷызы. Ол Н.Ф.Катановтың адынаң Хакас хазна университедінде водитель полып тоғынча. Интернетте «Имҷіні ибзер апар сал» чӧрім чарлал парғанын кӧр салғандох, чиит оол пір дее ікінҷілес чох анда аралазарға чаратхан. Іди Антон пылтыр кӱскӱдең сығара волонтер полыбысхан.
- Кізілерге полыс пир турар оңдайнаң тузаланмин пол полбаам. Чӧрімнің сайтында санға турыбысхам. Анаң мағаа пос тузымдағы частарға килістіре хайдағ имӌіні хайдар апар килерінеңер искіріглер киліп пастааннар. Мин оларны позымның машинамнаң тарт чӧрҷеңмін. Минің сағыста даа чох полған мындағ тоғыс ӱчӱн хайдағ-да сыйых алып алары. Кирексіпчеткеннерге полыс пирерге кӱстенгем, - ӱлескен волонтер Антон Аев.
Ол пандемия тузында имҷілерге піди хабасхан ӱчӱн Хакасия пазы Валентин Коноваловтың холынаң Хакасия правительствозының алғыстас пічиин алған. Мындағох сыйыхнаң «Имҷіні ибзер апар сал» чӧрімнің пасха даа араласчылары таныхтатханнар: Людмила Вилисова, Артём Концев, Михаил Лапшин, Александр Лубышев, Оксана Алексеенко паза Виктор Озол.
Ағбан городтың паза пір чиит чуртағҷызы Филипп Дубинин имҷілерге хабазар киректең ідӧк хыйа турбаан. Н.Ф.Катановтың адынаң Хакас хазна университедінде юристке ӱгренчеткен оол «Мы вместе» чӧрімнің араласчызы полча. Олох туста тыс пілбес студент СТО-да тоғынарға паза пос кӧңнінең имҷілерге полызарға маңнанча.
- Кізілерге полызары минің кӧңніме тың кірче. Аннаңар, пос тус ползох, улуғ ӧрініснең паза прай чӱреемнең полызығ кирексіпчеткеннерзер маңзырапчам. Сыйых аларынаңар пір дее сағынмаам, - теен Филипп.
Аллығ чӱректіг оолға, «Мы вместе» чӧрімнің пасха ӧткін волонтерларына тымо тузында республика чуртағҷыларына, имҷілерге тӧреміл хабасхан ӱчӱн ідӧк республика правительствозының алғыстас пічии читірілген. Олар - Ксения Башаева, Данил Кравченко, Егор Нестерчук, Афанасий Пахтаев, Анна Цацорина паза Анна Яковлева.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде