НАУКАА УЛУҒ ХОЗЫМ ИТКЕН
18.02.2022
Хабарлар
Кізі ады. Анна Сергеевна Логачёва (Доможакова) Хакасияда пастағы философ-ипчі полча
Аның пабазы Сергей Иванович Доможаковтың тӧреен чирі - Ағбан пилтірі аймаандағы Чарков аал. Че пічік пілген паза Худайға киртінген кізі Томск облазынзар ыстырыбысхан. Анда ол илееде тус чуртап салған. Пастағы хонығы киліспеен - сӧбірезі, ӧкпе ағыриин хаптырып, ӱреп парған.
Анна Сергеевна пабазының ікінӌі хонығында тӧреен. Іӌезі Сус аймаандағы Субботино аалдаң сыххан хан офицерінің хызы Антонида Яковлевна Доможакова (хыс фамилиязы - Машковцева) полған. Ызығ тузында чиит ирепчінің ідӧк Николай оолғы паза Мария хызы тӧрееннер.
Таныхтирға кирек, Доможаковтарның прай палалары пӧзік чидіглерге читкеннер. Николай Сергеевич пастап Хызылчар крайындағы, анаң Тверь облазындағы заводтарның устағӌызы полған. Мария Сергеевна Ағбандағы имнег туразында хирург полып істенген, «Хакасияның саблығ имӌізі» атха турысхан. Анна Сергеевна, тізең, педагогика паза наука киреенде сабланған.
Анна Сергеевна пасталығ класстарда Томск облазындағы аалда ӱгренген, анаң Яя станцияда, Сорығ, Ағбан городтарда піліс алған. Ортымах школаны тоозып, іӌезінің чӧбінең ол Хызылчардағы ӱгретчілер институдының тархын-филология пӧлиинзер кірерге чаратхан. Анда Анна Сергеевна орыс тілі, литература паза тархын ӱгретчізінің специальнозын алған. Институтта ӱгренчедіп, ол школада тоғын турған. Пӧзік ӱгредіг алып, істеніс чолын Хызылчар крайындағы Рыбинсктегі аал хонии техникумында, анаң Томсктағы тимір чол техникумында узаратхан. Ол пу ӱгредіг заведениелерінде тархын паза литература уроктарын иртірӌең. Олох туста ол Томсктағы радиоэлектроника паза электроннай техника институдының иирде ӱгренӌең пӧлиинзер чӧрген. Чиит хыс анда «Электронные и ионные приборы» специальностьча курстарда араласхан. Че сӧбіре сидіксіністері ӱчӱн ағаа анда читіре ӱгренерге паза диплом алып аларға киліспеен.
Анна Сергеевна Томск облазында тоғынчатханда, радиотехника инженері Анатолий Павлович Логачёвха ирге парған. Андартын олар, оолғының хазии уйаннап сыхханда, Сус аймаандағы Субботино аалзар кӧскеннер. Ирепчі наа орында ідӧк ӱгредіг киреенде істенгеннер.
Соонаң Анна Сергеевна Логачёва тоғыс орнын алыстырыбысхан. Ол 1969 - 1972 чылларда Сибирьдегі технологическай институттың философия кафедразының ассистенті полған. 1972 чылда, тізең, Уралдағы хазна университедінің философия кафедразының аспирантуразынзар очнай ӱгредіге кіріп алған. Аны ол 1975 чылда тоосхан, че вузтарда диссертациялар арачылирын тохтадыбысхан сылтағнаң ағаа кандидат диссертациязын сала соонаң арачылирға киліскен.
Анаң аны Ағбандағы ӱгретчілер институдынзар ызыбысханнар. Анна Сергеевна халых наукалар кафедразының улуғ ӱгретчізі полған. Олох туста хазнаның социология ассоциациязының философия пірігізінің араласчызына алылған паза халых тоғыстарынаң айғасхан (областьтағы чон сыныхтаа комитедінің штаттағы нимес инспекторы полған). Анна Сергеевна предприятиелерде аймах сыныхтағлар иртірӌең, телевидениеде «Листок народного контроля» передачаны апарған.
1987 - 2000 чылларда Хызылчарның политехническай институдының Ағбандағы пӧлиинің философия кафедразының доценті полған. Ол пу атты 1992 чылда алып алған. Чоохтирға кирек, студенттер аның ӱгретчі тоғызын тӧреміл пӧзік паалаӌаңнар. «Ол предмедін чахсы пілчеткен ӱгретчі, лекцияларда, семинарларда материалларны пілдістіг чоохтапча. Піс ағаа улуғ алғыс читірчебіс. Ол пісті ідӧк посты паза пасхазын улуғлирға ӱгреткен...» - пасчаңнар чииттер.
2000 - 2010 чылларда Анна Сергеевна Логачёва Хакасиядағы тіл, литература паза тархын наука-істезігліг институттың экономика паза социология секторында улуғ наука тоғынӌызы полған. Ол пу учреждениезер «философия наукаларының кандидады» аттығ килген. Ученай кізі диссертациязын 1979 чылда Алма-Ата городта арачылаан. Аның тоғызы «Научные работники как социально-профессиональная группа советской интеллигенции в условиях развитого социализма» адалған, наука устағӌызы В.А.Копырин полған. Диссертация тоғызына ӱндезіг пасхан философия наукаларының докторы, профессор Г.Н.Волков. Ол Анна Сергеевна Логачёваның тоғызын пӧзік паалаан. Паза аның пу істезии пасха наука тоғыстарына кӧстеглер пирген тиирге кирек. Кӧзідімге алып аларға чарир «Этническое самосознание (на примере хакасского языка)»(2000 - 2006 ч.ч.), «Научные кадры: социально-философский анализ» (2007 - 2010 ч.ч.) тоғыстарын.
Ідӧк алынӌа таныхтирға кирек аның ХакНИИЯЛИ-да істенген туста сығарған монографияларын. Ол тиксі 50 азыра наука статьязын тимнеп салған. Паза ол 2000 чылларда ирткен Востоковедтернің чоннар аразындағы конгрезі араласчыларының пірсі полған.
Тиксі чоохтаза, Анна Сергеевна хакас ипчілернің аразында философия наукаларының кандидады ат алған пастағы ипчі полча.
Логачёвтарның оолғы ідӧк турыстыра ӱгредіг алған, пархалары даа, школаны алтын медальға тоозып, Санкт-Петербургтағы, Новосибирсктегі, Екатеринбургтағы наука кіннерінде піліс алғаннар.
Автор :
Ирина ТРОШКИНА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде