ДРАМАА ТӦӦЙ МАРЫҒЛАР
18.02.2022
Хабарлар
Олимп ойыннары-2022. Россия командазының 24 медаль: тӧрт алтын, сигіс кӱмӱс паза он ікі хола
Пу кӱннерде пістің спортсменнерге ӧме марығларында оң полды. Биатлонда иреннер паза ипчілер эстафета чӱгӱргеннер, саналығ чыларында ікі ӧме спринті полған. Россияның конькиліг чӱгӱрерінде кӱмӱс медаль пар. Илья Буров фристайлда ӱзінӌі орынға сығып алған. Аннаңар алғыда.
Иреннер аразында биатлон эстафетазы чонның сағызында ӱрге халар, неке. Пастағы чардыхты Карим Халилиге чӱгӱрерге ӱлӱс тӱскен. Ол Москва облазынаң, аның толдыра ады - Саид Каримулла Саид Вахидулла Халили. Пабазы - афган чонның оолғы. Карим Халили, пір ле хати чаза атыбызып, позының чардығын иң пурун тоос салған. Анзы сыйыхтығ орынға ізеніс пирген, ӧӧн «ыырӌы» Норвегия - читінӌі орында. Александр Логинов чарызын чалтырама чӱгӱрібіскенде, биатлонда алтын медаль полар тіп ікінӌілес чоғыл. Эстафетаның ӱзінӌі араласчызы Максим Цветков прайзын чичең атызынаң морсындырды. Тиктең нимес аны команданың ӧӧн снайперіне санапчалар. Тӧртінӌі чардыхха биатлонисттер ӧмезі пасхазын 44 секундаа асча. Алтын медаль команданың холында тиирге чарир. Анаң ниме пол парғанын кізілер амға теере чахсы оңар полбинчалар. Халғанӌызын чӱгӱрген Эдуард Латыпов. Пис хати чаза атыбысхан сылтаанда спортсменге хоза ікі хурчағ чӱгӱрерге киліскен. Ол арада Норвегияның ӧмезі пастағы орынға сығып алған, кӱмӱс призерлар - французтар, пістіңнернің хола медаль. Пу эстафетаны хабарӌылар «орыс биатлонның трагедиязы» адап салғаннар.
16 февральда эстафетада ипчілер кӱстерін сынааннар. Тренерлер марыға Ирина Казакевичті, Кристина Резцованы, Светлана Миронованы паза Ульяна Нигматуллинаны сығарыбысханнар. Амғы туста ипчілернің биатлонда киректері уйан арах, аннаңар пірее медаль поларына ізеніс чох полған. Че Олимпиадада кирек удаа сағыбаан оңдайнаң парыбысча. Абахайлар ӧмезі финишке ікінӌізі читкен.
Олох кӱн саналығ чӱгӱрісте ӧме спринттері ирткеннер. Пастап ипчілер марығласханнар, анаң чарысха иреннер сыхханнар. Марығ оңдайларынӌа командазар ікі кізі кірче, олар теестезіп чӱгӱрчелер. Россия ӱчӱн Наталья Непряеванаң Юлия Ступак паза Александр Большуновнаң Александр Терентьев турысханнар. Оме спринтін кӧрерге чӱрексіністіг полтыр. Ам на пістің спортсмен прайзын ас париған, нинӌе-де секунда пазынаң соонда халча, тӱрчедең пазох алнында. Пу чарыстарда чир-суғӌыларыбыс ікі хола медаль утып алғаннар.
Ідӧк ӧме мариинда конькиліг чӱгӱріснең айғасчатханнар постарын турыстыра кӧзіткеннер. Пу чарыс 2006 чылдаң Олимп ойыннарының программазына кирілген. Анда ӱс кізі араласча. Олар пір саңай сығып чӱгӱрчелер. Марыға ікі ӧме сыхча. Командалар пас меетке катоктың ікі пасха саринаң сығып марығласчалар. Пу чарыста ир кізілернің дистанциязы - 3200 метр, ипчілернің - 2400 метр. Дистанцияны пурун тоос салған команда чиңіс тутча. Пістің ӧмеде марығда Даниил Алдошкин, Сергей Трофимов паза Руслан Захаров араласханнар. Ооллар кӱмӱс призерлар полыбысханнар. Руслан Захаровты алынӌа таныхтирға кирек. Ир кізілернің аразында ол пастағы спортсмен, хайзы Олимп ойыннарында шорт-тректе дее, конькиліг чӱгӱрісте дее медаль холға кирген.
Фристайлда турғызылған пӧгіннер хоостыра Россияа медальны Максим Буров ағыларға кирек полған. 23 частығ спортсмен 2019 паза 2021 чылларда тилекей чемпионаттарында чиңіс тутхан. Салтарында Максим квалификация ирт полбаан. Медальлар ӱчӱн аның аӌазы Илья Буров паза арғызы Станислав Никитин харбасханнар. Станислав - 10-ӌы орында, Илья Буров - хола призёр. Пхёнчханда Илья ідӧк ӱзінӌізі полған.
Конькиліг хоос чыларында хыстар марығласчалар. 15 февральда абахайлар хысха программаларын кӧзіткеннер. Камила Валиева пик хуйахтығ кізі полтыр. Андағ сидік оңдайларда ол прайзынаң кӧп сан чыып алған. Анна Щербакова ікінӌізі парча, Александра Трусова - тӧртінӌі орында.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде