ПОС ЧОНЫН ТАСТАБИНЧАБЫС!
23.03.2022
Хабарлар
Митинг. 18 мартта Ағбанда Пастағы май ачыхта Крым Россияа піріккеннең пеер 8 чыл толғанына чарыдылған митинг-концерт ирткен
2014 ЧЫЛДА 18 МАРТТА РОССИЯ ПРЕЗИДЕНТІ ВЛАДИМИР ПУТИН, КРЫМНЫҢ ПАЗА СЕВАСТОПОЛЬНЫҢ УСТАҒҶЫЛАРЫ КРЫМ РЕСПУБЛИКА ПАЗА ФЕДЕРАЛЬНАЙ СИНДЕГІ СЕВАСТОПОЛЬ ГОРОД РОССИЯ ФЕДЕРАЦИЯЗЫНА ХОЗЫЛЧАТХАННАҢАР ЧӦПТЕЗІГ ИТКЕННЕР. ОЛ ТУСТАҢ ПЕЕР ПУ ТАНЫҒЛЫҒ КӰН ЧЫЛ САЙ ПАЙРАМ ЧІЛИ ТАНЫХТАЛЧА. КРЫМ РЕСПУБЛИКАДА ОЛ ТЫНАҒ КӰНІ ТІП ЧАРЛАЛ ПАРҒАН.
Пӱӱл пу кӱн Россияда улам кӧдірілістіг ирткен. Россияның Тирігліг кӱстері Украинада милитаризацияны паза нацизмні чох идер ӱчӱн ӧнетін чаа операциязын иртірче. Украинаның устағҷылары, нацизмге сабыл парыбызып, Донецк паза Луганск чирлерін Россиянаң хада поларға сағынчатханнары ӱчӱн 8 чылҷа бомбаларнаң паза снарядтарнаң тӧреміл чаалап турғаннар. Минск чӧптезіглерін пір дее толдырбааннар.
Пӱӱл Крым Россияа піріккен кӱнні пістің хазнабыста алғым таныхтааннар. Москвада пу пайрам улам кӧдірілістіг ирткен. Ағбанда даа Пастағы май ачыхта ідӧк ол кӱнде чон толдыра чыылысхан. Аймах партияларның паза пірігістернің флагтары чалбырас турғаннар. Чыылысхан чонның алнындағы чазалған сценаа Хакас Республиканың устағҷылары паза халых чон пірігістерінің кізілері сых турғаннар. Іди пастағызын сӧс алған Хакас Республиканың пазы Валентин Коновалов.
Анаң чоох тутханнар Хакасияның Ӧӧркі Чӧп кнезі Владимир Штыгашев, Россия Федерациязы Чӧбінің сенаторлары Валерий Усатюкнаң Александр Жуков паза партия пӧліктерінің кізілері.
Сигіс чыл мының алнында Украинада, хорылыстар полып, ӱлгее чабал сағыстығ кізілер сыхханда, Крым паза Донбасс Россияа пірігерге сағыныбысханнар. Крымдағы чон, референдум иртіріп, пістің хазнабысха хозылған. Донбасста референдум иртірерге маңнанмааннар. Украинаның Тирігліг кӱстері , чаанаң кірібізіп, Донецк паза Луганск республикалар чирлерінің чарымын холға алып алғаннар. Халған чирні холға кирерге кӱстенгеннер. Киректері киліспинчеткенде, чабалланып, минометтарнаң паза артиллериянаң ат турғаннар. США паза Кидеркі Европа Украинаны Донецк паза Луганск республикалардаң на тоғыр нимес, ідӧк Россияа чаанаң кірібізерге кӧӧктір сыхханнар. Аймах-пасха чаа тиріглерін ӱзігі чох пиргеннер, улам халғанӌы туста. Че хаӌан Россия, паза сыдаспин, Украинадаң тоғыр ӧнетін операция пастап, аның чаа техниказын унат сыхханда, США паза Европа ӧӧн чабал хылыхтарын кӧзіткеннер. Россиядаң тоғыр нинӌе пар санкцияларын сығар сыхханнар. Олар, полбаста, кізілердең не тоғыр нимес, че ідӧк адай-хоосхалардаң тоғыр полыбысханнар. Оларны даа постарының чирлерінзер позытпасха хыӌанчалар. Россиядаң хаӌанох парыбызып, пасха хазналарда чуртапчатхан россияннарны хыйыхтап сыхханнар.
Че олар пісті пазындыр полбастар. Пістің сарибыста сын кирек. Піс хаӌан даа фашизмнең тоғырбыс. Піс пістің президентнең хадабыс. Отыс чыл мының алнында СССР сайбал парғанда, Россияның кӱзі чох таа полған. Ол тустағы ӱлгӱлерібіс прай кӧңнілерінең США паза Европа саринзар тартылғаннар. Че США паза Европа, Россияны чиңіп алғабыс тіп, пістің хазнабысты саңай нимее салбиныбысханнар. Олар сизінмин дее халғаннар, хайди Россия азахха пик турыбысхан. Ӧӧнінде тирігліг кӱстерібіс наа чаа техникалығ пол парған. Анзын кӧзітче Украинада полчатхан амғы киректер. Ӱр ниместің не аразына Украина самолеттар, ракеталар паза танктар чох халған.
Піске амды, США-наң Европа санкциялар кирібіскенде, позыбыстың экономиказын улам пӧзік синге кӧдірібізерге кирек. Піс позыбыстың илбек хазнабыста пір кӧңніліг, ынағ ползабыс, пір дее ыырӌы пісті чабыра пас полбас. Чиңіс пісти полар!
Чоох тутхан кізілернің соонда республиканың С.П.Кадышевтің адынаң чон чайаачызының национальнай кінінің паза В.Г.Чаптыковтың адынаң Хакас филармониязының артисттері ойын салғаннар.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде