ДЕПУТАТТАР ТОҒЫЗЫНАҢ ТАНЫСЧАЛАР
23.03.2022
Хабарлар
Хакасияның Ӧӧркі Чӧбіне - 30 чыл. Пу танығлығ пайрамға чарыдып, республика парламенті чайаачы олғаннарға азых ізіктер кӱннерін иртірерге чаратхан
Мындағ чӧрімнің пастағы араласчылары Таштып аймаандағы 10 школаның 9-11 класстардағы ӱгренӌілері полғаннар. Оларға Хакасия Ӧӧркі Чӧбінің тоғызын «істінең» кӧріп аларға оңдай пирілген.
Пастап Таштып чирінең килген саарбахтарға Ӧӧркі Чӧп тархынының музейінӌе экскурсия иртірілген. Анаң ӱгренӌілер депутаттарның сессиялары иртчеткен улуғ залда пол килгеннер. Оол-хыстар анда иң пурнада, депутаттарның чыылииндағы чіли, Россияның паза Хакасияның гимннерін тура истіп алғаннар. Экскурсовод полған депутат Денис Воронин олғаннарға Хакасия Ӧӧркі Чӧбінің паза Правительство кнестерінің, Хазна Думазы депутадының паза секретариаттың орыннарын кӧзіт пирген. Паза олғаннарға чапсых полған депутаттар ол-пу закон ӱчӱн хайди ӱннерін пирчеткеннерін піліп аларға. Ӱгренӌілерге ідӧк парламенттің «Избранные народом» фильмінің пастағы сериязын кӧріп аларға оңдай пирілген. Че иң ӧӧні улуғ класстардағы оол-хыстар Хакасияның закон сығарӌаң органының тузазын піліп алғаны полча.
- Хакасияның Ӧӧркі Чӧбі кирек законнар алча, чон ӱчӱн турысча, Конституция паза Хакас Республиканың законнары чуртасха хайди кирілчеткенін хайығда тутча, - чарыт пирген Таштыптағы 1 № школаның ӱгренӌізі Карина Шулбаева.
Экскурсияа килген ӱгренӌілернің алнында чоох тутханнар Таштып аймаанаң табылған депутат Наталья Кокорева паза экономика политиказынӌа комитет кнезі Василий Шулбаев. Палалар депутаттарның, оларның тоғызынаң палғалыстығ сурығлар пирерінең пасха, тиксі хазнадағы хорылыстардаңар сағыс-кӧрістерін піліп аларға сағынғаннар.
Олғаннарға Хакасия Ӧӧркі Чӧбінің кнезі Владимир Штыгашевнең, пір стол кистінде одырып, чоох алызарға уламох чапсых полған. Устағӌы кізінің дее, олар аның тӧреен-ӧскен кічіг чир-суунаң килгеннерін піліп алғанда, кӧңні кӧдіріл парған. Владимир Николаевич ӱгренӌілерге, чон тапхан депутаттар тоғызынаң пасха, позының олған тузынаңар, хайда паза кемнернең хада ӱгренгенінеңер, тоғынғанынаңар чоллап пирген.
- Пӱӱнгі кӱнде пістің прайзының ӧӧн пӧгінібіс кізі полары паза чир-суубысха хынары полча! Мин пістің хазна президентін тың улуғлапчам паза аның пастағларынаң толдыразынаң чарасчам. Россия хайди даа пос алынча хазна поларға кирек, - ӱлескен Владимир Николаевич.
- Экскурсия кӧңніме тың кірген. Уламох чӱрексіністіг полған Ӧӧркі Чӧп кнезі Владимир Штыгашевнең, аның кабинедінде одырып, чоох алысханда. Ол кӧп хынығ ниме чоохтап пирген, - кӧңнінең ӱлескен Таштып аймаандағы Улуғ Сии аалдағы школаның ӱгренӌізі Татьяна Чучумакова.
Ирткен неделяда мындағ экскурсия ідӧк Харатас городтағы паза Шира аймаандағы ӱгренӌілерге иртірілген. Пу кӱннерде, тізең, депутаттар Алтай паза Орджоникидзе аймахтарының чайаачы олғаннарын удурлааннар.Чон тапхан депутаттарның тоғызынаң таныстырар пӧгінніг экскурсиялар іди апрельнің ортызына теере иртірілер.
Хозыбызарға кирек. Хакасияның депутаттары иң пастағы сессияа 29 январьда 1992 чылда чыылысханнар. Ана андада Хакасияның Ӧӧркі Чӧбі тӧстелген тіп тархынға киріл парған.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде