ЧУРТТА ИСТІГ ПОЛАР ӰЧӰН НАНДЫРЧАЛАР
23.03.2022
Хабарлар
Сыйыхтас. Хакасия пазы Валентин Коновалов чонға полызығлар пирҷең паза чурт-коммунальнай хоных тоғынҷыларын профессия ӱлӱкӱнінең алғыстаан
Чыл сай кӧрік айының ӱзінӌі позырах кӱнінде пістің хазнада Чурт-коммунальнай хоных тоғынӌылары кӱні таныхталча. Пӱӱл ол кӧрік айының 20-ӌі кӱніне киліс парған. Ӱлӱкӱнге удур Хакасияның правительство туразында ЖКХ тоғынӌыларын чеестееннер. Таныхтатханнарның аразында муниципальнай предприятиелернің, пӱдіріг паза ЖКХ министерствозының, чонға полызығлар пирӌең пасха даа предприятиелернің тоғынӌылары полғаннар.
- Хакасияның правительствозы чурт-коммунальнай хоныхха улуғ хайығ салча. Аны тилідеріне паза наа чылирына чыл сай асхынах нимес ахча хорадылча. Анзы пістің ӧӧн пӧгіннерібістің пірсі полча. Пӱӱнгі кӱнге килістіре пик коммунальнай хоных чох экономиканы тиліт полбас, экологияны хайраллап полбас.
Сірернің тоғызыңар сылтаанда социальнай объекттер, предприятие-организациялар тохтағ чох тоғынчалар, чуртағҷыларның туралары чылығ паза анда чарытхы, суғ пар. Тоғыстарыңны нандырығлығ паза пӧзік синде толдырчатханнарың ӱчӱн алғыс. Піс, тізең, республиканың чурт-коммунальнай комплексін чахсыландырарына прай кӱзібіс, ол санда ахчалығ, саларын узарадарбыс, - таныхтаан Валентин Коновалов.
Анаң Хакасия пазы чурт-коммунальнай хоныхта тӱзімніг паза кӧп чыл тоғын салған тоғынӌыларға Хакас Республиканың Аарластығ пічіктерін читірген. Оларның санында «Хакресводоканал» хазна предприятиезінің мастері Галина Гейль, «Водоканал» муниципальнай предприятиенің мастері Виктор Погожих, «Хакресводоканал» хазна предприятиезінің Харатастағы пӧлиинің слесарьы Вячеслав Томин паза олох предприятиенің устағӌызы Виктор Фокин полғаннар.
Хакасия пазының алғыстазын алғаннарның санында: Новороссийскай аал чӧбінің «Фортуна» муниципальнай предприятиезінің директоры Татьяна Арсеньева, Алтай аймаа устағ-пастааның ЖКХ, энергетика управлениезі устағӌызының орынӌызы Оксана Шаламова. Хакас Республиканың алғыстас пічиине пу тоғынӌылар турысханнар: Хакасияның пӱдіріг паза ЖКХ министерствозының коммунальнай полызығлар пирерін сыныхтағда тударынӌа пӧлиинің советнигі Александр Арыштаев, «УЖК «Доверие» ООО-ның директоры Алексей Попов паза пасхазы.
Александр Арыштаев чурт-коммунальнай хоныхта 2017 чылдаң сығара тоғын парир.
- Мин, Хакас хазна университедін 2016 чылда тоозып, «Пӱдіріг» специальность алғам. Пастап пӱдірігҷі полғам. 2017 чылда хазна чурт инспекциязынзар тоғысха кіріп алғам. 2018 чылда инспекция республиканың пӱдіріг паза ЖКХ министерствозының холына пиріл парған.
Пістің пӧлік коммунальнай полызығлар пирілчеткені ӱчӱн нандырча. Ідӧк чуртағҷыларның айланыстары хоостыра тоғынчабыс. Айланыстар саны хызырылбинча, че, іди дее полза, оларча тоғынарға хай-хай ниик пол парды. Халғанҷы туста сидіксіністерні телефонҷа пӧгібізерге чарир. Наа ла тоғынып пастаанымда, кӧп чӧрерге килісчең. Кӧп квартиралығ тураларның хай пірее чуртағҷылары, устапчатхан компаниязар айланмин, кӧні піссер килчелер. Піс, тізең, устапчатхан компаниязар сығдыратчабыс. Халғанҷы ікі-ӱс чыл коммунальнай полызығлар чахсыланчатханын сизінчебіс, анзы котельнайлар, суғ паза чылығ пирчең сетьтер нааҷылалчатханынаң паза чурт фондын кӧрчеткен организациялар чахсы тоғын сыхханынаң палғалыстығ.
Пістің пӧлік иң пастап чуртағҷыларға праволарын арачылирға полысча. Пу тоғыс кӧңніме кірче, - теен Александр Арыштаев.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде